Read William Morgan Bible 1588 original edition Ezeciel 13 Bible Online

Ezeciel 13 - William Morgan Bible 1588 original edition bible

Ezeciel 13

¹Bygwth ar y gau brophwydi. A Gair yr Arglwydd a daeth attaf gan ddywedyd:

²Prophwyda fab dŷn yn erbyn prophwydi Israel, y rhai ydynt yn prophwydo, a dywet wrth y rhai a brophwydant oi meddwl eu hun, gwrandewch air yr Arglwydd.

³Fel hyn y dywed yr Arglwydd Dduw, gwae’r prophwydi ynfyd y rhai a rodiant yn ôl eu hyspryd eu hun, ac heb weled [dim.]

⁴Dy brophwydi Israel ydynt fel llwynogod yn yr anialwch.

⁵Ni safasoch yn yr adwyau, ac ni chaeasoch gae o amgylch tŷ Israel: i sefyll yn y rhyfel ar ddydd yr Arglwydd.

⁶Gwagedd, a gau ddewiniaeth a welsant, y rhai a ddywedant, dywedodd yr Arglwydd: a’r Arglwydd heb eu hanfon hwynt: a pharasant ddisgwil am gyflawni [eu] gair.

⁷Onid gau weledigaeth a welsoch, a gau ddewiniaeth a draethasoch, pan ddywedasoch, yr Arglwydd a ddywedodd, a minnef heb ddywedyd?

⁸Am hynny fel hyn y dywed yr Arglwydd Dduw: am lefaru o honoch wagedd, a gweled o honoch gelwydd: am hynny wele fi i’ch erbyn medd yr Arglwydd Dduw.

⁹A bydd fy llaw yn erbyn y prophwydi y rhai ydynt yn gweled gwagedd, ac yn dewino celwydd, yng-hyfrinach fy mhobl ni byddant, ac o fewn scrifen tŷ Israel ni scrifennir hwynt: i dir Israel hefyd ni ddeuant, fel y gŵybyddant mai myfi [ydwyf] yr Arglwydd Dduw.

¹⁰O achos, ac o herwydd hudo o honynt fy mhobl gan ddywedyd, heddwch, lle nid [oedd] heddwch: pan yw hwn yn adailadu mûr, wele hwythau yn ei galchu ef â salwedd.

¹¹A dywet wrth y rhai a galchant â salwedd, y syrth efe: canys cur-law a fydd, a chwithau gerric cenllysc a syrthiwch: a gwynt temhestloedd a rwyga.

¹²Wele pan syrthio’r mûr, oni ddywedir wrthych? mae’r calch a’r hwn y calchasoch?

¹³Am hynny fel hyn y dywed yr Arglwydd Dduw, minne a rwygaf â gwynt yspryd temhestloedd yn fy llid, a chur-law fydd yn fy nig: a cherric cenllysc mewn llidiawgrwydd i ddifetha.

¹⁴Felly y dinistriaf y mûr yr hwn a galchasoch â salwedd, a tharawaf ef i’r llawr, fel y gŵypoch mai myfi [ydwyf] yr Arglwydd.

¹⁵Pan orphennwyf fy llid ar y mûr, ac ar y rhai ai calchant â salwedd: yna y dywedaf wrthych: y mûr nid [yw,] na’r rhai ai calchasant,

¹⁶[Sef] prophwydi Israel y rhai a brophwydant am Ierusalem, ac a welant iddi weledigaeth heddwch, pan nad [oes] heddwch medd yr Arglwydd Dduw.

¹⁷Tithe fâb dŷn gosot dy wyneb yn erbyn merched dy bobl y rhai a brophwydant wrth eu meddwl eu hun: a phrophwyda yn eu herbyn hwynt.

¹⁸Dywet hefyd, fel hyn y dywed yr Arglwydd Dduw, gwae y gwniadyddesau clustôgau tann holl elinoedd dwylo fy mhobl, a’r rhai a weithiant foledau am benn pob sefyll-beth, i hela eneidiau. Ai eneidiau fy mhobl a heliwch chwi, i gadw yn fyw enioes i chwi?

¹⁹A halogwch chwi fi wrth fy mhobl er dyrneidiau o haidd, ac am dammeidiau o fara, gan ladd yr eneidiau y rhai ni byddent farw, ac addo enioes i’r rhai ni byddent fyw, gan ddywedyd o honoch gelwydd wrth fy mhobl y rhai a wrandawent gelwydd?

²⁰Am hynny fel hyn y dywedodd yr Arglwydd Dduw, wele fi at eich clustogau chwi, â’r rhai yr ydych yn hela eneidiau i beri iddynt ehedec, a rhwygaf, hwynt oddi wrth eich breichiau: a gollyngaf yr eneidiau [sef] yr eneidiau y rhai yr ydych yn eu hela i beri iddynt ehedeg.

²¹Rhwygaf hefyd eich moledau chwi, a gwaredaf fy mhobl o’ch llaw chwi, ac ni byddant mwy yn eich llaw chwi yn helfa, fel y gŵypoch mai myfi [ydwyf] yr Arglwydd.

²²Am dristau calon y cyfiawn drwy gelwydd, a minne heb ei ofidio ef, ac am gadarnhau dwylo’r annuwiol, fel na ddychwele oi ffordd ddrygionus iw fywhau,

²³O herwydd hynny, ni welwch wagedd, ac ni ddewinwch ddewiniaeth mwy, canys gwaredaf fy mhobl o’ch llaw chwi, fel y gŵypoch mai myfi [yw’r] Arglwydd.