Read William Morgan Bible 1588 original edition Ezeciel 46 Bible Online

Ezeciel 46 - William Morgan Bible 1588 original edition bible

Ezeciel 46

¹Pa aberthau fyddent ar y Sabbothau, a’r newydd-loerau. 8 Pa ffordd y delid i’r Deml, ac yr elid allan o honi. Fel hyn y dywed yr Arglwydd Dduw, porth y cyntedd nessaf i mewn, yr hwn sydd yn edrych tua’r dwyrain fydd yn gaead y chwe diwrnod gwaith, ond ar y dydd Sabboth yr agorir ef: felly’r agorir ef ar ddydd y newydd loer.

²A’r tywysog a ddaw oddi allan [ar hyd] ffordd cyntedd y porth, ac a saif wrth orsing y porth, yna yr offrymma’r offeiriad ei boeth offrwm ef, ai aberthau hedd, ac yr addola efe wrth riniog y porth, ac a aiff allan, a’r porth ni cheuir hyd yr hwyr.

³Pobl y tîr a addolant hefyd [wrth] ddrws y porth hwnnw ar y Sabbothau, ac ar y newydd-loerau o flaen yr Arglwydd.

⁴A’r offrwm poeth yr hwn a offrymmo’r tywysog i’r Arglwydd ar y dydd Sabboth [fydd] chwech o ŵyn perffaith-gwbl, a bwrdd perffaith-gwbl.

⁵A bwyd offrwm o Epha gyd a’r hwrdd, a rhodd ei law o fwyd offrwm gyd a’r ŵyn, a Hin o olew gyd a’r Epha:

⁶Ac ar ddydd y newyddloer, bustach ieuangc perffaith-gwbl, a chwech o ŵyn, a hwrdd [y rhai hynny fyddant perffaith-gwbl.

⁷Offrymmed hefyd Epha gyd a’r bustach, ac Epha gyd a’r hwrdd yn fwyd offrwm: a chyd a’r ŵyn fel y cyrhaeddo ei allu ef, a Hin o olew gyd â [phob] Epha.

⁸A phan ddelo yr tywysog i mewn [ar hŷd] ffordd cyntedd y porth y daw: ac ar hŷd y ffordd honno yr aiff allan.

⁹A phan ddelo pobl y tir o flaen yr Arglwydd ar y gwyliau gosodedic, yr hwn a ddelo trwy borth y gogledd i addoli a aiff allan trwy borth y deau: a’r hwn a ddelo trwy borth y deau a aiff allan trwy borth y gogledd, na ddychweled i’r hwn y daeth i mewn trwyddo, eithr eled allan ar ei gyfer.

¹⁰A phan ddelont hwy i mewn y daw’r tywysog yn eu mysc hwy, a phan elont allan yr aiff yntef allan.

¹¹Ar yr vchel wyliau hefyd y bydd y bwyd offrwm o Epha gyd â [phob] bustach, ac Epha gyd â [phob] hwrdd, a rhodd ei law gyd a’r ŵyn, a Hin o olew gyd a’r Epha.

¹²A phan offrymmo yr tywysog offrwm gwirfodd neu aberth hedd gwîrfodd i’r Arglwydd, yna’r egir iddo’r porth yr hwn sydd yn edrych tua’r dwyrain, ac yr offrwm ei boeth offrwm, ai aberthau hedd, fel y gwnae ar y dydd Sabboth: ac a aiff allan ac a gaea’r porth ar ol ei fynediad allan.

¹³Oen blwydd perffaith-gwbl hefyd a offrwmmi yn boeth offrwm i’r Arglwydd beunydd: o foreu i foreu yr offrymmi ef.

¹⁴Offrymmi hefyd yn fwyd offrwm gyd ag ef o foreu i foreu, chweched ran Epha [o beillied, a thrydedd rann Hin o olew i gymmyscu’r peillied: [sef] yn fwyd offrwm i’r Arglwydd [trwy] ddeddfau tragywyddol byth.

¹⁵Felly’r offrymmant yr oen a’r bwyd offrwm, a’r olew, o foreu i foreu yn boeth offrwm byth.

¹⁶Fel hyn y dywed yr Arglwydd Dduw, os rhydd y tywysog rodd i neb oi feibion oi etifeddiaeth eiddo ei feibion fydd hynny, eu cyfiawnder hwy [yw] hynny o etifeddiaeth.

¹⁷Ond pan roddo efe rodd oi etifeddiaeth i vn oi weision bydd hefyd eiddo hwnnw hyd flwyddyn y rhydd-did, yna y dychwel i’r tywysog, etto ei etifeddiaeth [sydd eiddo] ei feibion, [ac] eiddynt hwy fydd.

¹⁸Ac na chymmered y tywysog o etifeddiaeth y bobl, gan eu gorthrymmu hwynt am eu cyfiawnder, rhodded etifeddiaeth iw feibion, oi gyfiawnder ei hun, fel na wascarer fy mhobl bob vn allan oi etifeddiaeth.

¹⁹Ac efe am dûg trwy’r ddyfodfa yr hon [oedd] ar ystlys porth yr offeiriaid i’r stafelloedd cyssegredic y rhai oeddynt yn edrych tua’r gogledd: ac wele yno le yn yr ystlyssau nessaf i’r dwyrain.

²⁰Ac efe a ddywedodd wrthif, dymma’r fann lle y beirw’r offeiriaid yr aberth tros gamwedd, a’r pech aberth, [ac] lle y pobant y bwyd offrwm heb ddwyn [dim] i’r cyntedd nessaf allan i gyssegru’r bobl.

²¹Ac efe a’m dûg i’r cyntedd nessaf allan, ac a’m tywysodd i bedair congl y cyntedd, ac wele gyntedd ym mhob congl i’r cyntedd.

²²Ym mhedair congl y cyntedd [yr ydoedd] gynteddau cyssylltiedic, o ddeugain [cufydd] o hŷd, a dêc ar hugain o lêd: vn fessur [oedd] i’r conglau ill pedair.

²³Ac [yr ydoedd] mûr o amgylch ogylch iddynt ill pedair, a chegînau wedi eu gwneuthur oddi tann y muroedd oddi amgylch.

²⁴Ac efe a ddywedodd wrthif, dymma dŷ y cogau, lle y beirw gwenidogion y tŷ aberth y bobl.