Read William Morgan Bible 1588 original edition Amos 5 Bible Online

Amos 5 - William Morgan Bible 1588 original edition bible

Amos 5

¹1 Y mae y prophwyd yn dangos y tristwch a’r galar a ddoe i Israel. 4 Ac yn eu hannog i droi at Dduw a daioni. 8 Ac yn gosod allan weithredoedd Duw, a dydd eu hymweledigaeth. 21 Yn beio hefyd ar eu gwasanaeth. Gwrandewch y gair gofidus ymma, ’r hwn a dderchafaf arnoch tŷ Israel.

²Y weryf Israel a syrthiodd, ac ni chyfyd mwy: gadawyd hi ar ei thîr, nid [oes] ai cyfyd.

³Canys y modd hyn y dywed yr Arglwydd Dduw, y ddinas a êl allan [â] mîl a weddill gant, a’r hon a êl allan [ar] ei chanfed a weddill ddêc i dŷ Israel.

⁴O herwydd fel hyn y dywed yr Arglwydd wrth dŷ Israel, ceisiwch fi, a byw fyddwch.

⁵Ac nac ymgeisiwch â Bethel, ac nac ewch i Gilgal, ac na thrammwywch Beerseba: o herwydd gan gaeth-gludo y caeth-gludir Gilgal, a Bethel a fydd yn ddiddim.

⁶Ymgeisiwch a’r Arglwydd a byw fyddwch rhac iddo ef fyned tros dŷ Ioseph fel tân, ai ddifa, ac na byddo ai ddiffoddo yn Bethel.

⁷Troi y maent farn yn wermod: a chyfiawnder a adawant ar y llawr.

⁸Yr hwn a wnaeth Pleiades, ac Orîon, yr hwn a dry gyscod angen yn foreu-ddydd, ac a dywylla y dydd yn nôs: yr hwn a eilw ddyfroedd y môr, ac ai tywallt ar wyneb y ddaiar: yr Arglwydd [yw] ei enw.

⁹Yr hwn sydd yn nerthu dinistrudd yn erbyn y cryf: fel y delo y dinistrudd ar yr amddeffynfa.

¹⁰Câs ganddynt a geryddo yn y porth, a ffiaidd ganddynt a lefaro yn berffaith.

¹¹O herwydd hynny am iwch sathru y tlawd, a dwyn y baich ŷd oddi arno: chwi a adailadasoch dai o gerric nadd, ac ni thrigwch ynddynt: plannasoch winllanoedd blyssiol, ac nid yfwch eu gwîn hwynt.

¹²Canys mi a adwen eich anwireddau lawer, a’ch pechodau cryfion, y rhai ydych yn blino y cyfiawn, yn cymmeryd iawn, ac yn gŵyro y tlawd yn y porth.

¹³Am hynny y neb a fyddo call a ostega’r amser hwnnw, canys amser drwg yw.

¹⁴Ymgeisiwch â daioni, ac nid â drygioni fel y byddoch fyw, ac felly Arglwydd Dduw y lluoedd fydd gyd â chwi fel y dywedasoch.

¹⁵Casewch ddrygioni, a hoffwch ddaioni, a gosodwch farn yn y porth: galle Arglwydd Dduw y lluoedd fod yn raslawn i weddill Ioseph.

¹⁶Am hynny fel hyn y dywedodd yr Arglwydd [sef] Arglwydd Dduw y lluoedd, ym mhob heol [y bydd] tristwch, ac ym mhob priffordd y dywedant, oh, oh, a galwant yr arddwr i dristwch, a galar i’r neb a fedro alaru.

¹⁷Ac ym mhob gwinllan [y bydd] tristwch, canys trammwyaf trwy dy ganol di, medd yr Arglwydd.

¹⁸Gwae y neb sydd yn dymuno dydd yr Arglwydd, beth [yw] hwn i chwi? tywyllwch ac nid goleuni yw dydd yr Arglwydd.

¹⁹Megis pe ffoe gŵr o flaen y llew, ac arth yn cyfarfod ag ef, a myned i’r tŷ a phwyso ei law ar y pared, ai frathu o sarph:

²⁰Oni [bydd] dydd yr Arglwydd yn dywyllwch ac nid yn oleuni, yn dywyllwch ac heb lewyrch iddo?

²¹Caseais, a ffieiddiais eich gwiliau, ac nid aroglaf yn eich cynnulleidfaoedd.

²²Canys er i chwi offrymmu i mi boeth offrymmau, a’ch offrymmau bwyd, ni fyddaf fodlon, ac nid edrychaf ar hedd offrwm eich pascedigion.

²³Symmud oddi wrthif luosogrwydd dy ganiadau: canys ni wrandawaf buroriaeth dy nablau.

²⁴Ond barn a ymdreigla fel dwfr, a chyfiawnder fel ffrŵd grêf.

²⁵A offrymmasoch chwi i mi aberthau, a bwyd offrymmau yn y diffaethwch ddeugain mlhynedd tŷ Israel?

²⁶Ond dugasoch Siccwth eich brenin, Chiwn hefyd eich delwau, [a] seren eich duwiau yr hon a wnaethoch iwch eich hunain.

²⁷Am hynny y caeth-gludaf chwi i’r tu hwnt i Ddamascus medd yr Arglwydd, Duw y lluoedd [yw] ei enw ef.