Read William Morgan Bible 1588 original edition Amos 6 Bible Online

Amos 6 - William Morgan Bible 1588 original edition bible

Amos 6

¹Prophwydoliaeth yn erbyn tywysogion Israel. 8 A siccrwydd o ddialedd iddynt. Gwae y rhai esmwyth arnynt yn Sion, ac sydd yn ymddyried ym mynydd Samaria, y rhai oeddynt enwoc yn nechreuad y cenhedloedd: â thŷ Israel a ddaethant attynt hwy.

²Trammwywch i Chalneh, ac edrychwch, ac ewch oddi yno i Hemath fwyaf, a descynwch i Gath y Philistiaid: ai gwell ydynt na’r teyrnasoedd hyn? ai helaethach eu terfyn hwynt na’ch terfyn chwi?

³Y rhai ydych yn pellhau y dydd drwg, ac yn nesau eisteddle crais.

⁴Gorwedd y maent ar welau Ifori, ac yn ymestyn ar eu gwâl, ac yn bwytâ yr ŵyn o’r praidd, a’r lloi o ganol y cytt.

⁵Y rhai a ddatcanant gyd â llais y nablau dychymygasant iddynt eu hun offer cerdd megis Dafydd.

⁶Y rhai a yfant win mewn phiolau, ac a ymîrant a’r olew pennaf, ac nid ymofidiasant am ddryllio Ioseph.

⁷Am hynny’r awr hon hwynt a ddygir yn gaeth gyd a’r cyntaf a ddygir yn gaeth: a galar y rhai a ymestynnant a nessâ.

⁸Tyngodd yr Arglwydd Dduw iw enaid ei hûn, ffiaidd gennifi draha Iacob, a chaseais ei balasau, a mi a roddaf i fynu y ddinas ac sydd ynddi, medd Arglwydd Dduw y lluoedd.

⁹A bydd os gweddillir mewn vn tŷ ddêc o ddynnion y byddant feirw.

¹⁰Ei ewythr ai cyfyd i fynu, ac ai llŷsc, i ddwyn yr escyrn allan o’r tŷ, ac a ddywed wrth yr hwn a fyddo wrth ystlysau y tŷ, a oes neb gyd â thi? ac efe a ddywed, nac [oes:] a dywed yntef, taw, am na [wasanaetha] coffau enw’r Arglwydd.

¹¹O herwydd wele’r Arglwydd yn gorchymyn, ac efe a deru y tŷ mawr â defni, a’r tŷ bychan â holltau.

¹²A rêd meirch ar y graig? a ardd [neb hi] ag ychen? canys troesoch farn yn fustl, a ffrwyth * cyfiawnder yn wermod.

¹³Llawenychu’r ydych heb achos gan ddywedyd: o’n nerth ein hun y cymmerasom i ni gryfder.

¹⁴Ond wele mi a gyfodaf i’ch erbyn chwi tŷ Israel medd Arglwydd Dduw y lluoedd genhedlaeth, ac hwynt a’ch gwascant chwi, o’r ffordd yr ewch chwi i Hemath hyd afon y diffaethwch.