Read William Morgan Bible 1588 original edition Numeri 3 Bible Online

Numeri 3 - William Morgan Bible 1588 original edition bible

Numeri 3

¹Rhif, lle, a swyddau y Lefiaid: y rhai a ddewisodd yr Arglwydd i wasanaethu yn ei babell ef, yn lle y cyntafanedic, neu y cynfab. Ac dymma genhedlaethau Aaron, a Moses: ar y dydd y llefarodd yr Arglwydd wrth Moses ym mynydd Sinai.

²Dymma henwau meibion Aaron, y cyntaf-anedic [oedd] Nadab, yna Abihu, Eleazar, ac Ithamar.

³Dymma henwau meibion Aaron yr offeiriaid eneinioc y rhai a gyssegrodd efe i offeiriadu.

⁴A marw a wnaeth Nadab, ac Abihu ger bron yr Arglwydd, pan offrymmasant dân dieithr ger bron yr Arglwydd yn anialwch Sinai: a meibion nid oedd iddynt, am hynny yr offeiriadodd Eleazar ac Ithamar yng-ŵydd Aaron eu tâd.

⁵A’r Arglwydd a lefarodd wrth Moses gan ddywedyd.

⁶Nessâ di lwyth Lefi, a gwna iddo sefyll ger bron Aaron yr offeiriad, fel y gwasanaethant ef.

⁷A gwnant wasanaeth drosto ef, a gwasanaeth dros yr holl gynnulleidfa, o flaen pabell y cyfarfod, gan wasanaethu gwasanaeth y tabernacl.

⁸A chadwant holl ddodrefn pabell y cyfarfod, a [gwnant] wasanaeth dros feibion Israel, gan wasanaethu gwasanaeth y tabernacl.

⁹A thi a roddi y Lefiaid i Aaron, ac iw feibion, y rhai ydynt wedi eu rhoddi yn rhodd iddo ef o feibion Israel.

¹⁰Ac vrdda di Aaron ai feibion i gadw eu hoffeiriadaeth: a’r dieithr-ddyn a ddelo yn agos a roddir i farw.

¹¹Llefarodd yr Arglwydd hefyd wrth Moses, gan ddywedyd.

¹²Wele mi a gymmerais y Lefiaid o blith meibion Israel yn lle pob cyntaf-anedic [sef pob cyntaf] agorydd croth o feibion Israel: a’r Lefiaid fyddant eiddo fi.

¹³Canys eiddo fi pob cyntafanedic er y dydd y tarewais y cyntafanedic yn nhîr yr Aipht, cyssegrais i’m fy hun bob cyntafanedic yn Israel o ddyn ac anifail: eddo fi ydynt, myfi [ydwyf] yr Arglwydd.

¹⁴Yr Arglwydd hefyd a lefarodd wrth Moses yn anialwch Sinai gan ddywedyd.

¹⁵Cyfrif feibion Lefi yn ôl tŷ eu tadau, drwy eu teuluoedd, cyfrif hwynt pob gwryw o fab misyriad ac vchod.

¹⁶A Moses ai cyfrifodd hwynt wrth air yr Arglwydd, fel y gorchymynnasid iddo.

¹⁷A’r rhai hyn oeddynt feibion Lefi wrth eu henwau, Gerson, Cehath hefyd, a Merari.

¹⁸Ac dymma henwau meibion Gerson yn ol eu teuluoedd: Libni a Semei.

¹⁹A meibion Cehath, yn ôl eu teuluoedd: Amram, Iesaar, Hebron, ac Oziel.

²⁰A meibion Merari yn ôl eu teuluoedd, Maheli, a Musi: dymma hwynt teuluoedd Lefi wrth dŷ eu tadau.

²¹O Gerson [y daeth] ty-lwyth y Libniaid, a thy-lwyth y Simiaid: dymma hwynt teuluoedd y Gersoniaid.

²²Eu rhifedigion hwynt dan rif pob gwryw o fâb misyriad, ac vchod, eu rhifedigion [meddaf oeddynt] saith mil a phump cant.

²³Teuluoedd y Gersoniaid a werssyllant ar y tu ôl i’r tabernacl tua’r gorllewyn.

²⁴A phennaeth tŷ tâd y Gersoniaid [fydd] Eliazaph mab Lael.

²⁵Gorchwyliaeth meibion Gerson ym mhabell y cyfarfod [fydd] y tabernacl, a’r babell-lenn, ei thô [hefyd,] a chaead-len drws pabell y cyfarfod.

²⁶A throelloc lenni y cynteddfa, a chaeadlen drws y cynteddfa yr hwn [sydd] yng-hylch y tabernacl, a’r allor o amgylch, ai rhaffau iw holl wasanaeth.

²⁷Ac o Gehath [y daeth] ty-lwyth yr Amramiaid, a thy-lwyth y Iesariaid, a thy-lwyth yr Hebroniaid, a thy-lwyth yr Ozeliaid: dymma hwynt ty-lwyth y Cehathiaid.

²⁸O rif pob gwryw o fab misyriad ac vchod, wyth mil a chwe chant [oeddynt] yn gorchwylio y cyssegr.

²⁹Teuluoedd meibion Cehath a werssyllant ar ystlys dehau i’r tabernacl.

³⁰A phennaeth y tŷ pennaf o dy-lwyth y Cehathiaid [fydd] Elisaphan mab Oziel.

³¹Ai gorchwyliaeth hwynt [fydd] yr Arch, a’r bwrdd, a’r canhwyllbren, a’r allorau, a llestri y cyssegr, y rhai y gwasanaethant a hwynt, a’r gaead-len, ai holl wasanaeth.

³²A chapten a’r bennaethiaid y Lefiaid [fydd] Eleazar mab Aaron yr offeiriad: awdurdod a’r wenidogion y cyssegr [fydd iddo ef].

³³O Merari [y daeth] ty-lwyth y Maheliaid, a thy-lwyth y Musiaid: dymma hwynt ty-lwyth Merari.

³⁴Ai rhifedigion hwynt, o gyfrif pob gwryw o fab misyriad ac vchod, [oeddynt] chwe mil a deu cant.

³⁵A phennaeth y tŷ pennaf o dy-lwyth Merari [fydd] Zuriel mab Abihael: ar ystlys y tabernacl y gwerssyllant tua’r gogledd.

³⁶A gorchwyliaeth meibion Merari [fydd] ystyllod y tabernacl, ai drossolion, ai golofnau, ai forteisian, ai holl offer, ai holl wasanaeth.

³⁷A cholofnau y cynteddfa o amgylch, ai morteisiau, ai hoelion, ai rhaffau.

³⁸A’r rhai a werssyllant o flaen y tabernacl, tua’r dwyrain o flaen pabell y cyfarfod oddi wrth godiad haul [fydd] Moses ac Aaron, ai feibion y rhai a gadwant orchwyliaeth y cyssegr, a gorchwyliaeth meibion Israel: a’r dieithr a ddelo yn agos a roddir i farwolaeth.

³⁹Holl rifedigion y Lefiaid y rhai a rifodd Moses ac Aaron wrth eu teuluoedd yn ol gair yr Arglwydd, [sef] pob gwryw o fab misyriad ac vchod [oeddynt] ddwy fil ar hugain.

⁴⁰A dywedodd yr Arglwydd wrth Moses cyfrif bob cyntaf-anedic gwryw o feibion Israel, o fab misyriad ac vchod, a chymmer rifedi eu henwau hwynt.

⁴¹A chymmer y Lefiaid i mi (myfi [ydwyf] yr Arglwydd) yn lle pob cyntaf-anedic o feibion Israel: ac anifeiliaid y Lefiaid yn lle pob cyntaf-anedic o anifeiliaid meibion Israel.

⁴²A Moses a rifodd megis y gorchymynnodd yr Arglwydd iddo bob cyntaf-anedic o feibion Israel.

⁴³A’r rhai cyntafanedic oll, o rai gwryw dan rif [eu] henwau, o fab misyriad ac vchod oeddynt drwy eu rhifedigion, yn ddwy fil ar hugain, a dau cant, a thri ar ddec a thrugain.

⁴⁴A llefarodd yr Arglwydd wrth Moses gan ddywedyd.

⁴⁵Cymmer y Lefiaid yn lle pob cyntafanedic o feibion Israel: ac anifeiliaid y Lefiaid, yn lle eu hanifeiliaid hwynt: a bydded y Lefiaid i mi: myfi ydwyf yr Arglwydd.

⁴⁶Ac [am] y tri ar ddec a thrugain a’r ddau cant gwaredic (y rhai ydynt dros ben y Lefiaid) o gyntaf-anedic meibion Israel,

⁴⁷Cymmer hefyd bum sicl am bob penn, o sicl y cyssegr y cymmeri, vgain Gerah[fydd] y sicl.

⁴⁸A dod ti yr arian i Aaron, ac iw feibion [am] y rhai gwaredic a fyddant yn chwaneg arnynt.

⁴⁹A chymmerodd Moses arian y gwaredigaeth gan y rhai oeddynt yn chwaneg ar y rhai a waredasid am y Lefiaid.

⁵⁰Gan gyntafanedic meibion Israel y cymmerodd efe yr arian: pump a thrugain a thry chânt, a mil o siclau y cyssegr.

⁵¹A Moses a roddodd arian y gwaredigion i Aaron ac iw feibion, yn ôl gair yr Arglwyd megis y gorchymynnase’r Arglwydd i Moses.