Read William Morgan Bible 1588 original edition 2.Machabæaid 10 Bible Online

2.Machabæaid 10 - William Morgan Bible 1588 original edition bible

2.Machabæaid 10

¹1 Iudas Machabaeus yn ennill trachefn y ddinas a’r Deml. 10 Gweithredoedd Eupator. 16 Yr Iddewon yn ymladd yn erbyn yr Idumeaid. 24 Timotheus yn gorescyn Iudaea, yn erbyn yr hwn y mae Iudas yn rhyfêla. 29 Pum gwr sydd yn ymddangos yn yr awyr i helpu yr Iddewon. 37 Lladdiad Timotheus. Machabaeus hefyd a’r rhai oeddynt gyd ag ef, drwy fôd yr Arglwydd yn llywydd [iddynt] a ennillodd trachefn y ddinas a’r Deml.

²Ac hwy a fwriasant i lawr yr allorau a’r Cappelau a wnaethe yr cenhedloedd yn yr heolydd.

³Ac wedi glanhau ’r Deml, hwy a weithiasant allor arall: ac wedi iddynt daro tân allan o gerrig tanllyd, hwy a offrymmasant aberth yn ôl dwy flynedd, ac a arlwyasant arogl-darth a Iusernau, a bara gosot.

⁴Wedi hynny hwy a attolygasant i’r Arglwydd gan syrthio i lawr ar eu hwynêbau, na bydde iddynt mwyach syrthio mewn cyfryw ddrygau: ond os pechent trachefn vn amser, bod iddo ef ei hun eu cospi drwy drugaredd, ac nas rhodde ddim o honynt mwy i’r cablaidd a’r creulon genhedloedd.

⁵A’r dydd hefyd yr halogasid y Deml gan y dieithraid, y digwyddodd gwneuthur puredigaeth y Deml yr vn dydd, sef y pummed dydd ar hugain o fis Casleu.

⁶Hwy a gadwasant â llawenydd tros wyth niwrnod ddydd gwyl y pebyll, gan gofio fel y gorfase iddynt ychydig o’r blaen gadw gŵyl y pebyll yn y mynyddoedd a’r ogfeuydd yn ôl modd anifeiliaid.

⁷Am hynny hwy a gymmerasant ganghenau îr, a cheingciau hardd, a blodau, ac a ganasant psalmau i’r hwn a roddase iddynt rwydddeb i lânhau ei fangre [ei hun.]

⁸Hwy a ordeiniasant hefyd drwy gyffredin orchymyn a deddf ym mysc hôll genedl yr Iddewon, gadw y dyddiau hyn [yn ŵyl] bôb blwyddyn.

⁹Ac fel hyn y bu ddiwedd Antiochus a gyfenwid Epiphanes.

¹⁰Weithian hefyd ni a fynegwn y pethau a wnaethpwyd yn amser Eupator Antiochus yr hwn ydoedd fâb yr annuwiol hwnnw) gan dalfyrru yng-hŷd y beunyddiol ddrygau y rhai oblegit rhyfêloedd a ganlynasant.

¹¹Canys hwn wedi cymmeryd arno y deyrnas a seiniodd ryw vn a elwid Lysias, i fod yn olygwr ar [ei] faterrion, yr hwn a fuase yn gapten pennaf o Caeles Syria a Phenicia.

¹²Canys Ptolomeus yr hwn a henwasid Macron (ai fryd ar wneuthur cyfiawnder a’r Iddewon, o blegit y cam a wnaethe iddynt) a aeth yng-hylch dwyn eu materion hwy i benn yn heddychol.

¹³Am hynny efe a gyhuddwyd ger bron Eupator gan ei geraint, ac efe a alwyd yn fynych yn fradychwr, o blegit gadel o honaw Cyprus, yr hon a roddase Philometor yn ei gadwriaeth ef, a myned o honaw at Antiochus Epiphanes: am hynny pan weled nad ydoedd mewn bri ardderchog, efe a gymmerth wenwyn, ac ai gwenwynodd ei hun, ac a fu farw.

¹⁴Ond pan wnaethwyd Gorgias yn ben llywydd y lleoedd hyn, efe a groesawodd estroniaid, ac a ryfelodd yn fynych yn erbyn yr Iddewon.

¹⁵Yr Idumeaid hefyd a gytunasant ag ef, ac a flinent yr Iddewon, gan ennill y lleoedd cedyru, a thrwy derbyn y rhai a yrrid ar herw o Ierusalem hwy a ymroddasant i gadw rhyfel.

¹⁶Am hynny y rhai oeddynt gid â Machabaeus drwy weddio a ddeisyfasant ar Dduw fod yn gymmorthwr iddynt, ac yna hwy a ruthrasant ar gedyrn leoedd yr Idumeaid.

¹⁷I’r rhai pan redasant yn rymmus, hwy a wnaethpwyd yn gyfrannogion o’r lleoedd, ac wedi iddynt ddial ar yr hôll rai a oeddynt ar y gaer hwy a laddasant y rhai a gyfarfyddent, ac a ddienaidasant nid llai nag vgain mil.

¹⁸Canys pan gyd-ffoese naw mil o’r lleiaf i ddau dŵr cadarn tros ben, gan fod ganddynt bôb peth ang-henrheidiol er gwarchau,

¹⁹Machabaeus a adawodd Simon ac Ioseph a Zaccheus hefyd, a’r rhai oeddynt gid ag hwynt i amgylchu [y tŷrau,] ac efe a aeth ei hun lle yr oedd mwy o eisieu.

²⁰Ond y rhai oeddynt gyd â Simon, am eu bod yn chwannog i arian, a lygrwyd ag arian gan y rhai oeddynt yn y tyrau: ac wedi cymmeryd dêng mîl a thrugain drachmau hwy a ollyngasant rai i ffoi.

²¹Yr hwn beth pan fynegwyd i Machabaeus efe a gynhullodd yng-hyd bendefigion y bobl, ac a gwynodd arnynt hwy ddarfod iddynt werthu eu brodyr am arian, gan ollwng eu gelynion yn eu herbyn hwynt.

²²Am hynny efe ai lladdodd hwynt wedi eu tittio o draeturiaeth, ac yn ddisymmwth efe a ennillodd y ddau dŵr hynny.

²³Ac efe a arferodd yr arfau y rhai oeddynt yn [eu] dwylo yn llwyddiannus, ac a laddodd fwy nac vgain mil yn y ddau le hynny.

²⁴Timotheus hefyd yr hwn a ddarfuase i’r Iddewon ei orch-fygu o’r blaen, wedi casclu llawer o luoedd dieithr a llawer o wŷr meirch o Asia, a ddaeth yno ar fedr ennill Iudaea wrth arfau.

²⁵Ond y rhai oeddynt gyd a Machabeus, pan ydoedd yn nessau, a droesont i weddio-ar yr Arglwydd,

²⁶Gan danu pridd ar eu pennau, a gwregysu eu lwynau â lliensach, a syrthio ar eu hwynebau i’r llawr wrth droed yr allor, ac a attolygasant iddo drugarhau wrthynt, a bod yn elyn iw gelynnion, a gwrthwynebu eu gwrthwyneb-wŷr, megis ac y mynêga y gyfraith.

²⁷Ac wedi diweddu eu weddi, hwy a gymmerasant eu harfau, ac a aethant ym mhellach oddi wrth y ddinas, a phan ddaethant yn agos at eu gelynnion hwy a gymmerasant ofal am danynt eu hun.

²⁸Ac er cyntedd yr ymddangosodd cyfodiad haul, hwy a aethant bob vn yng-hŷd: y naill ran a’r Arglwydd ganddynt yn noddfa, ac yn ŵystyll llwyddiant, a buddugoliaeth ardderchog, a’r lleill yn gosod calondid yn llywydd rhyfel.

²⁹A thra ’r oedd y gâd yn dost fe a ymddangosodd i’r gelynnion o’r nef bum gŵr harddwychion, yn eistedd ar feirch a ffrwynau aur, a dau [o honynt] yn blaenori’r Iddewon.

³⁰Y rhai gan gymmeryd Machabeus erbyn ei ganol ai gwiscasant ai barfau rhai ydoedd am danynt, ai cadwasant yn ddiniwed: ac a saethasant bicellau a mellt yn erbyn y gelynnion: am hynny wedi eu gwascaru â dallineb, hwy a syrthiasant i lawr yn llawn blinder.

³¹Am hynny y lladdwyd o wŷr traed vgain mil a phymp cant, ac o wŷr meirch chwe-chant.

³²Ond Timotheus hwnnw a ffôdd i Gazara yr hon a elwid yn lle cadarn, lle yr ydoedd y pen llywydd Chereas.

³³Ond mil-wŷr Machabeus a ymgylchynasant y lle hwnnw yn galonog bedwar diwrnod ar hugain.

³⁴Ond y rhai oeddynt oddi mewn yn ymddyried yng-hadernid y lle [hwnnw] a gablasant yn ddirfawr, ac a ddywedasāt eiriau ffîaidd.

³⁵Pan oleuodd hi y pummed dydd ar hugain, gwŷr ieuaingc y rhai oeddynt gyd â Machabeus, yn llosci yn eu meddyliau o blegit y gabledd, a ddaethant at y gaer, ac a laddasant yn ŵrol â chalon egnius bôb vn a gyfarfyddent â hwynt.

³⁶Eraill hefyd a ddringasant oddi amgylch yn erbyn y rhai oeddynt oddi mewn, ac a loscasant y tyrau, ac wedi cynneu tân hwy a loscasant y cabl-wŷr yn fyw.

³⁷Yn ddiweddaf rhai eraill a dorrasant y pyrth, ac a dderbyniasant i mewn weddill y llu, ac a ennillasant y ddinas, ac a laddasant Timotheus yr hwn ydoedd wedi ymguddio mewn rhyw ffôs, efe ai frawd Chereas, ac Apollophanes.

³⁸Wedi darfod iddynt wneuthur y pethau hyn hwy a foliannasant yr Arglwydd â chaniadau, ac a mawl, yr hwn ag ardderchog ddaioni a helpase Israel, ac a roddase iddo oruchafiaeth.