Read William Morgan Bible 1588 original edition Mathew 16 Bible Online

Mathew 16 - William Morgan Bible 1588 original edition bible

Mathew 16

¹Atteb Crist i’r rha a geisiâsant ganddo ef arwydd. 6 Cyngor i wrthod sur a llefeinllyd athrawiaeth y Pharisæaid. 13 Tyb y bobl am Grist, 17 Ffydd yn dyfod oddi wrth Dduw. 18 Craig yr Eglwys, ac agoriadau nef. 21 Crist yn prophwydo am ei farwolaeth. 24 Cyflwr y gwir ddiscybl. 27 A dyfodiad Crist. Yna y Pharisæaid a’r Saducæaid, gan ddyfod a themtio a geisiâsant ganddo ddangos iddynt arwydd o’r nef.

²Ac efe a attebodd, ac a ddywedodd wrthynt, pan fyddo hi yn hwyr y dywedwch, hi a fydd tywydd têg, canys y mae’r wybr yn gôch.

³A’r boreu, [y dywedwch] heddyw [y bydd] dryg-hin, am fôd yr wybr yn gôch, ac yn drist: ô ragrith-wŷr, medrwch ddeall wyneb yr wybr, ac oni [fedrwch] farnu am arwyddion yr amserau?

⁴Y mae y genhedlaeth ddrwg a godinebus yn ceisio arwydd, ac arwydd ni’s rhoddir iddi, onid arwydd y prophwyd Ionas: ac felly efe a’u gadawodd hwynt, ac a aeth ymmaith.

⁵Ac wedi dyfod ei ddiscyblion ef i’r lann arall, hwy a ollyngasent tros gof gymmeryd bara [gŷd ag hwynt.]

⁶A’r Iesu a ddywedodd wrthynt, edrychwch, a mogelwch rhag sur-does y Pharisæaid, a’r Saducæaid.

⁷Ac hwy a resymmâsant yn eu plith eu hunain, gan ddywedyd, hyn sydd am na ddugasom fara.

⁸A’r Iesu yn gŵybod [y peth,] a ddywedodd wrthynt, chwy-chwi o ffydd fechan, pa ham yr ydych yn meddwl ynoch eich hunain, na ddygasoch fara?

⁹Onid ydych chwi yn ddeall etto, nac yn cofio pum torth, pan oedd bum mîl [o bobl] a pha sawl bascedaid a gymmerasoch chwi?

¹⁰Na’r saith torth pan oedd saith mil [o bobl,] a pha sawl cawellaid a gymmerasoch chwi?

¹¹Pa ham nad ydych yn deall, mai nad am fara y dywedais wrthych, ar ymogelyd ohonoch rhag sur-does y Pharisæaid, a’r Saducæaid?

¹²Yna y deallasant hwy, na ddywedase efe am ymogelyd o honynt rhag sur-does bara, ond rhac athrawiaeth y Pharisæaid, a’r Saducæaid.

¹³[20]Ac wedi dyfod yr Iesu i dueddau Cæsaria Philip, efe a ofynnodd iw ddiscyblion, pwy y mae dynion yn dywedyd fy mod i Mâb y dŷn.

¹⁴A hwy a ddywedasant, rhai sy yn dywedyd mai Ioan Fedyddiwr, a rhai mai Elias, ac eraill mai Ieremias, neu vn o’r prophwydi.

¹⁵Ac efe a ddywedodd wrthynt, pwy meddwch chwi ydwyfi?

¹⁶Yna Simon Petr a attebodd, ac a ddywedodd, ti ydwyt Crist, Mâb y Duw byw.

¹⁷A’r Iesu a ddywedodd wrtho, gwyn dy fŷd ti Simon mâb Ionas, canys nid cîg a gwaed a ddatcuddiodd [hyn] i ti, eithr fy Nhâd yr hwn sydd yn y nefoedd.

¹⁸Yr ydwyf fi hefyd yn dywedyd i ti, mai ti ydwyt Petr, ac ar y graig hon yr adailadaf fy Eglwys, a phyrth vffern ni’s gorchfygant hi.

¹⁹Ac mi a roddaf i ti agoriadau teyrnas nefoedd, a pha beth bynnag a rwymech ar y ddaiar, a fydd rhwymedic yn y nefoedd: a pha beth bynnag a ryddhaech ar y ddaiar, fydd wedi ei ryddhau yn y nefoedd.

²⁰Yna y gorchymynnodd efe iw ddiscyblion na ddywedent i neb, mai efe oedd Iesu Grist.

²¹O hynny allan y dechreuodd yr Iesu fynegu iw ddiscyblion fod yn anghenrhaid iddo fyned i Ierusalem, a dioddef llawer gan yr henuriaid, a chan yr arch-offeiriaid, a’r gwŷr llên, a’i ladd, a chyfodi y trydydd dydd.

²²Yna Petr a’i cymmerth ef o’r nailltu, ac a ddechreuodd ei geryddu ef, gan ddywedyd, Arglwydd trugarhâ wrthit ty hun, ni’s bydd hyn i ti.

²³Yna y trôdd efe, ac a ddywedodd wrth Petr; dôs ar fy ôl Satan, canys rhwystr ydwyt ti i mi, am nad ydwyt yn deall y pethau sy o Dduw, ond y pethau sy o ddynion.

²⁴Yna y dywedodd yr Iesu wrth ei ddiscyblion, os myn nêb ddyfod ar fy ôl i, gwaded ag ef ei hun, a chymmered ei groes, a dilyned fi.

²⁵Canys pwy bynnag a ewyllysio gadw ei fywyd, a’i cyll, a phwy bynnac a gollo ei fywyd o’m plegit i, a’i caiff.

²⁶Canys pa lesâd i ddŷn er ennill yr holl fŷd, o chyll efe ei enaid ei hun? neu pa beth a rydd dŷn yn gyfnewid am ei enaid?

²⁷Canys Mâb y dyn a ddaw yng-ogoniant ei Dâd, gyd â’i angelion, ac yna y rhydd efe i bob dŷn yn ôl ei weithredoedd.

²⁸Yn wîr y dywedaf wrthych, fod rhai o’r sawl sydd yn sefyll ymma, a’r ni phrofant angeu, hyd oni welant Fâb y dŷn yn dyfod yn ei frenhiniaeth.