Read William Morgan Bible 1588 original edition Mathew 6 Bible Online

Mathew 6 - William Morgan Bible 1588 original edition bible

Mathew 6

¹Am eluseni, 5 gweddi, 16 ympryd, 25 gwahardd gofalu am bethau bydol. Gochelwch rhag gwneuthur eich elusen yng-ŵydd dynion er mwyn cael eich gweled ganddynt, os amgen, ni chewch dâl gan eich Tâd yr hwn sydd yn y nefoedd.

²Am hynny pan wnelech elusen, na phâr ganu vdcorn o’th flaen, fel y gwna’r rhagrithwŷr yn y synagogau, ac ar yr heolydd iw moli hwy gan ddynion, yn wir meddaf i chwi, y maent yn derbyn eu gwobr.

³Eithr pan wnelech ti elusen, na ŵyped dy law asswy pa beth a wna dy law ddehau,

⁴Fel y byddo dy elusen yn ddirgel, a’th Dad yr hwn a wêl yn y dirgel, efe a dâl i ti yn yr amlwg.

⁵A phan weddiech, na fydd fel y rhagrithwŷr, canys hwy a garant sefyll a gweddio yn y Synagogau, ac yng-honglau yr heolydd, er mwyn cael eu gweled gan ddynion: yn wîr meddaf i chwi, y maent yn derbyn eu gwobr,

⁶Tithe pan weddiech dos i’th stafell, ac wedi cau dy ddrws, gweddia ar dy Dâd yr hwn [sydd] yn ddirgel, a’th Dad yr hwn a wêl yn y dirgel a’th obrwya di yn yr amlwg.

⁷Hefyd pan weddioch na fyddwch siaradus fel y cenhedloedd, canys y maent hwy yn tybied y gwrandewir hwy am eu haml eiriau.

⁸Am hynny na thybygwch iddynt hwy, canys gŵyr eich Tâd pa bethau sy arnoch eu heisieu, cyn ceisio o honoch ganddo.

⁹Am hynny gweddiwch chwi fel hyn, Ein tâd yr hwn ydwyt yn y nefoedd, sancteiddier dy enw.

¹⁰Deled dy deyrnas, bydded dy ewyllys ar y ddaear, megis yn y nefoedd.

¹¹Dyro i ni heddyw ein bara beunyddiol.

¹²A maddeu di i ni ein dyledion fel y maddeuom ninnau i’n dyled-wŷr.

¹³Ac nac arwain ni i brofedigaeth, eithr gwaret ni rhag drwg: canys eiddot ti yw’r deyrnas, a’r nerth, a’r gogoniant, yn oes oesoedd, Amen.

¹⁴O blegit os maddeuwch i ddynion eu camweddau, eich Tâd nefol a faddeu hefyd i chwithau.

¹⁵Eithr oni faddeuwch i ddynion eu camweddau, ni faddeu eich Tâd i chwithau eich camweddau.

¹⁶[8]Hefyd pan ymprydioch, na fyddwch wyneb sarric fel rhagrith-wŷr: canys anffurfio eu hwynebau y byddant, er ymddangos i ddynion yn ymprydio, yn wir meddaf i chwi, y maent yn derbyn eu gwobr.

¹⁷Eithr pan ymprydiech di, eneinia dy benn, a golch dy wyneb,

¹⁸Rhag ymddangos i ddynion fod yn ymprydio, onid i’th Dâd ’r hwn sydd yn y dirgel; a’th Dâd yr hwn a wêl yn ddirgel a dâl i ti yn yr amlwg.

¹⁹Na chesclwch dryssor i chwi ar y ddaiar, lle y mae gwyfyn a rhwd yn llygru, a lle y mae lladron yn cloddio trwodd, ac yn lladratta.

²⁰Eithr cesclwch i chwi dryssorau yn y nef, lle nid oes na gwyfyn na rhwd yn llygru, a lle ni’s cloddia’r lladron trwodd, ac ni’s lladratânt.

²¹Canys lle y mae eich tryssor, yno y bydd eich calon hefyd.

²²Goleuni’r corph yw’r llygad, am hynny o bydd dy lygad yn syml, dy holl gorph fydd yn oleu.

²³Eithr os bydd dy lygad yn ddrwg, dy holl gorph fydd yn dywyll, am hynny os bydd y goleuni yr hwn sydd ynot yn dywyllwch, pa faint [fydd] y tywyllwch?

²⁴[9] Ni ddichon neb wasanaethu dau arglwydd, canys naill ai efe a gasâ’r naill, ac a gâr y llall, ai efe a ymlyn wrth y naill, ac a esceulusa’r llall: ni ellwch wasanaethu Duw a golud-bydol.

²⁵Am hynny meddaf i chwi, na ofelwch am eich bywyd pa beth a fwyttaoch, neu pa beth a yfoch: nac am eich cyrph, pa beth a wiscoch: onid yw’r bywyd yn fwy nâ’r bwyd? a’r corph yn fwy nâ’r dillad?

²⁶Edrychwch ar adar y nefoedd, o blegit nid ydynt nac yn medi, nac yn cywain i’r yscuboriau, ac y mae eich Tâd nefol yn eu porthi hwynt, onid ydych chwi yn rhagori arnynt hwy?

²⁷A phwy o honoch gan ofalu a ddichon chwanegu vn cufydd at ei faint?

²⁸A pha ham yr ydych chwi yn gofalu am ddillad? dyscwch pa wedd y mae lili’r maes yn tyfu: nid ydynt yn llafurio, nac yn nyddu.

²⁹Eithr yr wyf yn dywedyd i chwi, na bu Solomon yn ei holl ogoniant mor drwsiadus ag vn o’r rhai hyn.

³⁰Am hynny os dillada Duw lysieun y maes, yr hwn sydd heddyw, ac y foru a fwrir i’r ffwrn, oni [ddillada efe] chwi yn fwy o lawer, ô rai o ychydig ffydd?

³¹Am hynny na ofelwch gan ddywedyd, beth a fwytawn? neu beth a yfwn? neu â pha beth yr ymddilladwn?

³²Canys am y pethau hyn holl yr ymofyn y cenhedloedd, o blegit eich Tâd nefol a ŵyr fod arnoch eisieu yr holl bethau hyn.

³³Eithr yn gyntaf ceisiwch deyrnas Dduw ai gyfiawnder, a’r holl bethau hyn a roddir i chwi yn chawneg.

³⁴Na ofelwch gan hynny dros drannoeth, canys trannoeth a ofala trosto ei hunan, digon i’r diwrnod ei ddryganiaeth ei hun.