Read William Morgan Bible 1588 original edition Deuteronomium 33 Bible Online

Deuteronomium 33 - William Morgan Bible 1588 original edition bible

Deuteronomium 33

¹Moses yn bendithio y bobl cyn ei farw. 26 Ac yn dangos rhagoriaeth Duw a rhagoriaeth ei bobl ef. Ac dymma y fendith [drwy]’r hon y bendithiodd Moses (gŵr Duw) feibion Israel o flaen ei farwolaeth.

²Ac efe a ddywedodd, yr Arglwydd a ddaeth allan o Sinai, ac a gododd o Seir iddynt, ymlewyrchodd o fynydd Pharan: ac efe a ddaeth gyda myrddiwn o sainct [a] thanllyd gyfraith oi ddeheulaw iddynt.

³Caru y mae efe y bobl, ei holl sainct [ydynt]yn dy law: a hwynt a ymlynasant wrth dy draed, [ac] a gymmerasant o’th eiriau.

⁴Moses a orchymynnodd gyfraith i ni yn etifeddiaeth cynnulleidfa Iacob.

⁵Ac efe oedd [fel] brenin yn Israel, pan ymgasclodd pennau y bobl yng-hyd [a] llwythau Israel.

⁶Bydded fyw Ruben, ac na fydded farw, a bydded ei ddynion [ychydig o] rifedi.

⁷[Bydded] hyn hefyd i Iuda, a dywedodd clyw ô Arglwydd lais Iuda, ac at ei bobl dŵg ef, digon yw iddo ei ddwylo ei hun, os byddi yn gymmorth rhac ei elynion.

⁸Ac am Lefi y dywedodd, dy Thummim, a’th Urim [a roddaist] i’th ŵr trugarog yr hwn a brofaist ym Massa, [ac] a gynhennaist ag ef wrth ddyfroedd y gynnen,

⁹Yr hwn a ddywedodd am ei dâd, ac am ei fam (ni welais ef) ai frodyr nis adnabu, ac nid adnabu ei feibion ei hun: canys cadwasant dy eiriau, a chynhaliasant dy gyfammod.

¹⁰Dyscant dy farnedigaethau i Iacob, a’th gyfraith i Israel: gosodant arogldarth yn dy ffroen, a llosc-aberth ar dy allor.

¹¹Bendithia ô Arglwydd ei olud ef, a bydd fodlon i waith ei ddwylo ef: archolla lwynau [y rhai] a godant iw erbyn, ai gaseion fel na chodant.

¹²Am Beniamin y dywedodd efe, annwylyd yr Arglwydd a drig mewn diogelwch gyd ag ef, yr hwn fydd yn cyscodi trosto yr holl ddydd ac yn aros rhwng ei escwyddau ef.

¹³Ac am Ioseph y dywedodd efe, ei dîr ef sydd wedi ei fendigo o’r Arglwydd a hyfrydwch y nefoedd, a gwlith, ac a dyfnder yn gorwedd isod.

¹⁴Hefyd a hyfrydwch cynnyrch yr haul, ac a hyfrydwch addfed-ffrwyth y lleuadau.

¹⁵Ac a [hyfrydwch] penn mynyddoedd y dwyrain, ac a hyfrydwch brynnau tragywyddoldeb.

¹⁶Ac a hyfrydwch y ddaiar, ac ai chyflawnder, a bodd presswylydd y berth a ddelo ar benn Ioseph, ac ar goryn yr hwn a nailltuwyd oddi wrth ei frodyr.

¹⁷Cyntafanedic ei ŷch ef [sydd] brydferthwch iddo, ai gyrn ef [ydynt] gyrn vnicorn, a hwynt y cornia efe y bobl ynghyd [hyd] eithafoedd y ddaiar: ac dymma fyrddiwn Ephraim, îe dymma filoedd Manasses.

¹⁸Ac am Zabulon y dywedodd efe, ymlawenycha Zabulon yn dy fynediad allan, a [thi] Issachar yn dy bebyll.

¹⁹Galwant bobloedd i’r mynydd, yna’r aberthant ebyrth cyfiawnder: canys cyfoeth y moroedd a sugnant, a chuddiedic dryssorau y tywod.

²⁰Ac am Gad y dywedodd efe, bendigedic yw ehangudd Gad, megis llew y mae efe yn aros, fel y rhwygo efe yr yscwyddoc a’r penn.

²¹Edrychodd am dano ei hun yn y dechreuad canys yno [’r ydoedd] ran y cyfraith-wr yn guddiedic, efe a ddaeth [gyd] a phennaethiaid y bobl, gwnaeth efe gyfiawnder yr Arglwydd, ai farnesig aethau gyd ag Israel.

²²Am Dan hefyd y dywedodd efe, Dan yn genew llew a neidia o Basan.

²³Ac am Nephthali y dywedodd efe, ô Nephthali llawn o hawddgarwch, a chyflawn o fendith yr Arglwydd: gorescyn di y gorllewyn a’r dehau.

²⁴Ac am Aser y dywedodd efe, bendigedig o feibion [fydd] Aser: bydd efe gymmeradwy [gan] ei frodyr, ac efe a wlych ei droed mewn olew.

²⁵Haiarn a phrês [a fyddant] dan dy escid ti: a megis dy ddyddiau [y bydd] dy nerth.

²⁶Nid [oes] megis Duw Israel yr hwn sydd yn marchogeth y nefoedd, yn gymmorth it: a’r wybrennau yn ei fawredd.

²⁷[Dy] noddfa [yw] Duw tragywyddol, a thann freichiau tragwyddol [y byddi fyw,] efe a wthia dy elyn o’th flaen, ac a ddywed difetha [ef.]

²⁸Israel hefyd a drîg ei hun yn ddiogel, ffynnon Iacob [a fydd] mewn tîr ŷd, a gwîn: ei nefoedd hefyd a ddiferant wlith.

²⁹Gwynfydedic wyt ti o Israel pwy [sydd] megis ti? ô bobl gadwedic gan yr Arglwydd tarian dy gynhorthwy, yr hwn hefyd [yw] cleddyf dy ardderchawgrwydd: a’th elynion a ymostyngant i ti, a thi a sethri a’r eu huchel-leoedd hwynt.