Read William Morgan Bible 1588 original edition Deuteronomium 34 Bible Online

Deuteronomium 34 - William Morgan Bible 1588 original edition bible

Deuteronomium 34

¹Moses wedi gweled gwlâd Canaan yn marw. 8 Israel yn wylo am dano. 9 Iosuah yn cael ei swydd ef. 10 Clod Moses. Yna Moses a escynnodd o rossydd Moab, i fynydd Nebo [i] ben y brynn yr hwn [sydd] ar gyfer Iericho: a’r Arglwydd a ddangosodd iddo holl wlâd Gilead, hyd Dan.

²A holl Nephthali, a thîr Ephraim, a Manasses, a holl dîr Iuda, hyd y môr olaf.

³Y dehau hefyd, a gwastadedd dyffryn Iericho, dinas y palm-wydd hyd Zoar.

⁴A’r Arglwydd a ddywedodd wrtho, dymma y tîr yr hwn a dyngais i Abraham, i Isaac, ac i Iacob, gan ddywedyd: i’th hâd ti y rhoddaf ef, perais it ei weled a’th lygaid, ond nid ei di trosodd yno.

⁵A Moses gwâs yr Arglwydd a fu farw yno yn nhîr Moab, yn ôl gair yr Arglwydd.

⁶Ac efe ai claddodd ef mewn glyn yn nhîr Moab gyferbyn a Beth-Peor: ac nid adnabu neb ei fedd ef hyd y dydd hwn.

⁷A Moses [ydoedd] fab vgain mlwydd a chant, pan fu efe farw, ni chrychase ei lygad, ac ni chiliase ei ireidd-dra ef.

⁸A meibion Israel a ŵylasant am Moses yn rhossydd Moab ddeng-nhiwrnod ar hugain: a chyflawnwyd dyddiau wylofain galar Moses.

⁹Ac Iosuah mab Nun [ydoedd] gyflawn o yspryd doethineb, o herwydd Moses a roddase ei ddwylo arno: a meibion Israel a wrandawsant arno, ac a wnaethant fel y gorchymynnase’r Arglwydd wrth Moses.

¹⁰Ac ni chododd prophwyd etto yn Israel megis Moses (yr hwn a adnabu’r Arglwydd wyneb yn wyneb. )

¹¹Ym mhob [rhyw] arwyddion, a rhyfeddodau y rhai yr anfonodd yr Arglwydd ef iw gwneuthur yn nhîr yr Aipht, ar Pharao, ac ar ei holl weision, ac ar ei holl dîr ef.

¹²Ac ym mhob llaw gadarn, ac ym mhob ofn mawr y rhai a wnaeth Moses yng-olwg holl Israel.