Read William Morgan Bible 1588 original edition 2.Corinthiaid 10 Bible Online

2.Corinthiaid 10 - William Morgan Bible 1588 original edition bible

2.Corinthiaid 10

¹Y mae efe yn ei amddeffyn ei hun a’i hyder yn erbyn y gau-athrawon, 12 y rhai oeddynt yn eu canmol eu hun am lafur a phoen eraill. Ond myfi Paul ydwyf yn attolwg i chwi er addfwynder a chymmesurdeb Crist, yr hwn ŵydd yng-ŵydd [wyf] ddiystyr yn eich plith, ac yn absennol ydwyf yn hyderus arnoch.

²A hyn yr ydwyf yn ei ddymuno, na orfyddo i mi fod yn hydêrus pan fyddwyf bresennol â’r vn rhyw hyder, ac yr ydys yn meddwl fy mod yn hyderus ar ryw rai, y sawl sy yn meddwl bod ni yn rhodio megis ar ôl y cnawd.

³O blegit er ein bôd yn rhodio yn y cnawd, etto nid ydym yn rhyfela ar ôl y cnawd.

⁴Canys arfau ein rhyfel ni nid ydynt gnawdol, ond nerthol trwy Dduw i fwrw cestill i’r llawr,

⁵Gan fwrw i lawr dychymmygion, a phôb vchel-beth a dderchefir yn erbyn gwybodaeth Duw, a chan gaethiwo pob meddwl i vfydd-dod Crist.

⁶A chennym yn barod ddial ar bob annufydd-dod, wedi y cyflawner eich vfydd-dod chwi.

⁷Ai edrych yr ydych chwi ar bethau o herwydd golwg? os ymddiried nêb ynddo ei hun ei fod ef yn perthyn i Grist, ystyried hyn trachefn o honaw ei hun, fel y mae efe yn perthyn i Grist, felly yr ydym ninnau yn perthyn i Grist.

⁸O blegit pe bostiwn beth ychwaneg hefyd am ein hawdurdod, yr hon a roddodd yr Arglwydd i ni er adeilad, ac nid er eich dinystr chwi, ni’m cywilyddid:

⁹Rhag tybied fy mod, megis yn eich ofni chwi â llythyrau.

¹⁰Canys y llythyrau (meddant hwy) sy drymmion a chedyrn, eithr presennoldeb y corph sydd wan, a’i ymadrodd yn ddibris.

¹¹Meddylied y cyfryw vn hyn, mai fel yr ydym ar air drwy lythyrau yn absennol, felly [yr ydym] hefyd mewn gweithred yn bresennol.

¹²Canys ni feiddiwn ni ymyrryd neu ymgyffelybu â’r rhai sy yn eu canmol eu hunain: eithr nid ydynt yn deall eu bôd yn mesuro eu hunain wrthynt eu hunain, ac yn cyffelybu eu hunain ag hwynt eu hunain.

¹³Eithr ni orfoleddwn ni yn anghymmesurol, ond yn ôl mesur y rheol trwy yr hon y rhannodd Duw i ni fesur i gyrhaeddyd hyd attoch chwithau.

¹⁴Canys nid ydym yn tra ymestyn, megis pe na chyrhaeddasem hyd attoch chwi: canys hyd attoch chwi hefyd y daethom ag Efengyl Grist:

¹⁵Nid gan orfoleddu yn anghymmesur, sef am boen rhai eraill: eithr gan obeithio wedi y cynnyddo eich ffydd, gael ein mawrygu yn eich plith yn ôl ein mesur yn helaeth,

¹⁶Fel y gallwyf bregethu yr Efengyl tu hwnt i chwi: [ac] nid gorfoleddu am y pethau a baratoiwyd trwy reol neb arall.

¹⁷Eithr yr hwn a orfoleddo, gorfoledded yn yr Arglwydd.

¹⁸Canys nid yr hwn sydd yn ei ganmol ei hun sydd gymmeradwy, ond yr hwn y mae yr Arglwydd yn ei ganmol.