Read William Morgan Bible 1588 original edition Colossiaid 2 Bible Online

Colossiaid 2 - William Morgan Bible 1588 original edition bible

Colossiaid 2

¹1 Gwedi iddo destiolaethu ddaed ei ewyllys ef iddynt, 4 Y mae efe yn eu rhybuddio, na ddychwelent yn eu hol oddi wrth Grist, 8 I wasanaeth Angelion, ne ddychymmyg arall neu Ceremoniau y gyfraith, 17 Y rhai a derfynwyd yng-Hrist. Canys ewyllysiwn i chwi wybod pa faint ymdrech sydd arnaf er eich mwyn [chwi] a’r rhai o Laddicia, a phwy bynnag ni welsant sy wyneb yn y cnawd,

²Fel y cyssurid eu calonnau, wedi eu cyssyltu hwy yng-hariad, ac ym mhob golud cwbl gredadwy ddeall, i adnabod dirgelwch Duw y Tâd, a Christ.

³Yn yr hwn y mae yn guddiedig oll drysorau doethineb a gwybodaeth.

⁴A hyn yr ydwyf yn ei ddywedyd rhag i nêb eich twyllo â geiriau hygoel.

⁵Canys er fy mod yn absennol yn y cnawd, er hynny yr ydwyf gyd â chwi yn yr yspryd yn llawenychu, ac yn gweled eich trefn a chadernid eich ffydd chwi, yr hon [sydd] yng-Hrist.

⁶Megis gan hynny y derbyniasoch Grist Iesu yr Arglwydd, felly rhodiwch ynddo,

⁷Wedi eich gwreiddio a’ch adailadu ynddo ef, ac wedi ymgadarnhau yn y ffydd, fel i’ch discwyd, gan ymamlhau ynddi drwy ddiolch.

⁸Edrychwch rhac bod neb vn eich anrheithio trwy Philosophi a gwâg dwyll wrth draddodiad dynion, yn ôl gwyddorion y byd, ac nid yn ôl Crist.

⁹Canys ynddo ef y mae cyflawnder y Duwdod yn presswylio yn gorphorol.

¹⁰Ac yr ydych chwi wedi eich cyflawni ynddo ef, yr hwn yw pen holl dywysogaeth ac awdurdod.

¹¹Yn yr hwn hefyd, i’ch enwaedwyd ag enwaediad nid o waith llaw, gan ymddiosc pechadurus gorph y cnawd trwy enwaediad Crist.

¹²Wedi eich cyd-gladdu gyd ag ef trwy fedydd yn yr hwn hefyd i’ch cyd-gyfodwyd trwy ffydd gweithrediad Duw, yr hwn a’i cyfodes ef o feirw.

¹³A chwithau y rhai oeddech feirw ym mhechodau, ac yn nienwaediad eich cnawd, a gyd-fywhaodd efe gyd ag ef, gan faddeu i chwi eich holl gamweddau,

¹⁴Gan ddileu scrifen-law yr ordeiniadau yr hon [oedd yn] ein herbyn, yr hon oedd yng-wrthwyneb i ni, efe ai cymmerodd oddi ar y ffordd, gan ei hoelio wrth ei groes,

¹⁵Ac a speiliodd y Tywysogaethau a’r Nerthoedd, ac ai herddangosodd hwy yn gyhoeddus, gan orfoleddu arnynt ynddo ei hun.

¹⁶Am hynny na farned nêb arnoch chwi am fwyd a diod, neu o ran dydd gwyl, ne leuad-newydd ne Sabbothau,

¹⁷Y rhai nid ydynt onid cyscod pethau ar ddyfod, eithr y corph sydd o Grist.

¹⁸Na thwylled neb chwi yn ewyllyscar, am y gynglwyst trwy ostyngeiddrwydd, ac addoliad angelion, gan ruthro i bethau nis gwelodd wedi ymchwyddo yn ofer gan ei feddwl cnawdol ei hun,

¹⁹Heb gyfattal y pen o’r hwn y mae’r holl gorph wedi ei ymgoleddu ai gyfansoddi â chymmalau, ac â rhwymau, yn cynnyddu gan gynnydd Duw.

²⁰Am hynny os ydych feirw gyd â Christ oddi wrth wyddorion y byd, pa ham, fel pe baech byw yn y byd eich arwenir wrth draddodiadau?

²¹Na chyffwrdd na archwaetha, na theimla:

²²Yr hyn oll ydynt mewn llygredigaeth wrth eu harfer, yn ôl gorchymynnion, ac athrawiaeth dynion.

²³Gan yr hyn bethau y mae cyffelybrwydd doethineb mewn amcan wasanaeth a gostyngeiddrwydd meddwl, a bod heb arbed y corph, ac nid mewn parch i gyflawni y cnawd.