Read William Morgan Bible 1588 original edition Iosuah 14 Bible Online

Iosuah 14 - William Morgan Bible 1588 original edition bible

Iosuah 14

¹Naw llwyth a hanner yn cael tir Canaan ei gyd. 6 Rhan Caleb. Dymma hefyd [y lleoedd] y rhai a etifeddodd meibion Israel yng-wlâd Canaan: y rhai a roddodd Eleazar yr offeiriad, ac Iosuah mab Nun, a phennau cenedl llwythau meibion Israel iddynt hwy iw etifeddu.

²Wrth goel-bren eu hetifeddiaeth hwynt: fel y gorchymynnase’r Arglwydd drwy law Moses [eu rhoddi] i’r naw llwyth, ac i’r hanner llwyth.

³Canys Moses a roddase etifeddiaeth i ddau lwyth, ac i hanner llwyth o’r tu hwnt i’r Iorddonen: ond i’r Lefiaid ni roddase efe etifeddiaeth yn eu mysc hwynt.

⁴Canys meibion Ioseph oeddynt ddau lwyth, Manasses, ac Ephraim: am hynny ni roddasant rann o’r tîr i’r Lefiaid, onid dinasoedd i drigo, ai meusydd pentrefol iw hanifeiliaid hwynt, ai gloud.

⁵Fel y gorchymynnase yr Arglwydd i Moses, felly y gwnaeth meibion Israel, pan rannasant y wlâd.

⁶Yna meibion Iuda a ddaethant at Iosuah yn Gilgal, a Chaleb mab Iephun y Ceneziad a ddywedodd wrtho ef: tydi a wyddost y gair yr hwn a lefarodd yr Arglwydd wrth Moses gŵr Duw o’m plegit i, ac o’th blegit dithe yn Cades Barnea.

⁷Mab deugain mlwydd oeddwn i pan anfonodd Moses gwâs yr Arglwydd fyfi o Cades Barnea i edrych ansodd y wlad: a dugum air iddo ef trachefn, fel [yr oedd] yn fyng-halon.

⁸Ond fy mrodyr y rhai a aethant i fynu gyd a mi a ddigalonnasant y bobl: etto myfi a gyflawnais [fyned] ar ôl yr Arglwydd fy Nuw.

⁹Am hynny y tyngodd Moses y diwrnod hwnnw gan ddywedyd, oni bydd y wlâd yr hon y sathrodd dy droed ynddi yn etifeddiaeth i ti, ac i’th feibion hyd byth, [nid geir-wir fi:] am it gyflawni [myned] ar ôl yr Arglwydd dy Dduw.

¹⁰Ac yn awr wele’r Arglwydd a’m cadwodd yn fyw fel y llefarodd efe, dymma y bummed flwyddyn a deugain er pan lefarodd yr Arglwydd y gair hwn wrth Moses: tra y rhodiodd Israel yn yr anialwch: ac yn awr wele fi heddyw yn fab pum mlwydd a phedwar vgain.

¹¹Yr ydwyf etto morr gryf heddyw a’r dydd yr anfonodd Moses fi, fel [yr oedd] fy nerth i yna, felly [y mae] fy nerth i yn awr, i ryfela, ac i fyned allan, ac i ddyfod i mewn.

¹²Yn awr gan hynny dyro i mi y mynydd ymma am yr hwn y llefarodd yr Arglwydd y dwthwn hwnnw: canys ti a glywaist y dwthwn hunnw fod yr Anciaid yno, a dinasoedd mawrion caerog, ond odid yr Arglwydd [fydd] gyd a mi, fel y gorescynnwyf hwynt megis y llefarodd yr Arglwydd.

¹³Yna Iosuah ai bendithiodd ef: ac a roddodd Hebron i Galeb fab Iephun yn etifeddiaeth.

¹⁴Am hynny y mae Hebron yn etifeddiaeth i Galeb fab Iephun y Ceneziad hyd y dydd hwn: o herwydd iddo ef gwplau [myned] ar ôl Arglwydd Dduw Israel.

¹⁵Ac enw Hebron o’r blaen [oedd] Caer Arba, yr [Arba hwnnw] oedd ddŷn mawr ym mysc yr Anaciaid: yna y wlâd a orphywysodd heb ryfel.