Read William Morgan Bible 1588 original edition Barn-wŷr 14 Bible Online

Barn-wŷr 14 - William Morgan Bible 1588 original edition bible

Barn-wŷr 14

¹1 Samson yn gwreica ym mysc y Philistiaid. 6 Yn lladd llew. 12 Yn dal cynglwyst ar ddirnad dammeg. 17 Ei wraig yn ei fradychu ef. 19 Yntef yn lladd dec ar hugain o’r Philistiaid i dalu y gynglwyst. 20 Ei wraig yn priodi vn arall. A Samson a aeth i wared i Thimnath: ac a ganfu wraig yn Thimnath o ferched y Philistiaid.

²Ac efe a ddaeth i fynu, ac a fynegodd iw dâd, ac iw fam, ac a ddywedodd, gwelais wraig yn Thimnath o ferched y Philistiaid: cymmerwch yn awr honno yn wraig i mi.

³Yna y dywedodd ei dad ai fam wrtho ef, onid [oes] ym mysc merched dy frodyr, nac ym mysc fy holl bobl wraig, pan ydwyt ti yn myned i geisio gwraig o’r Philistiaid dienwaededic? a dywedodd Samson wrth ei dâd, cymmer hi i mi canys y hi sydd [dda] iawn gennif,

⁴Ond ni wybu ei dâd ef nai fam mai oddi wrth yr Arglwydd [yr oedd] hyn, [ac] mai ceisio achos yr oedd efe yn erbyn y Philistiaid: canys y Philistiaid oeddynt y pryd hynny yn arglwyddiaethu ar Israel.

⁵Yna Samson a aeth i wared, ai dâd, ai fam i Thimnath: ac a ddaethant hyd winllannoedd Thimnath, ac wele genew llew yn rhuo yn ei gyfarfod ef.

⁶Ac yspryd yr Arglwydd a ddaeth arno ef, ac efe a holltodd [y llew] fel yr holltid mynn, ac nid [oedd] dim yn ei law ef: ac ni fynegodd efe iw dad, nac iw fam yr hyn a wnelse.

⁷Yna efe a aeth i wared, ac a ymddiddanodd a’r wraig, ac yr oedd hi yn hawddgâr yng-olwg Samson.

⁸Ac yn ôl ychydig ddyddiau efe a ddychwelodd iw chymmeryd hi, ac a drodd i edrych yscyrbwd y llew: ac wele haid o wenyn a mêl yng-horph y llew.

⁹Ac efe ai cymmerth yn ei law, a thann gerdded y cerddodd, ac y bwyttaodd, ac efe a aeth at ei dâd ai fam, ac a roddodd iddynt, a hwynt a fwyttawsant: ond ni fynegodd iddynt hwy mai o gorph y llew y dugase efe y mêl.

¹⁰Felly ei dad ef a aeth i wared at y wraig: a Samson a wnaeth yno wlêdd, canys felly y gwnae y gwŷr ieuaingc.

¹¹A phan welsant hwy ef, yna y cymmerasant ddec ar hugain o gyfeillion i fod gyd ag ef.

¹²Yna Samson a ddywedodd wrthynt, rhoddaf i chwi ddychymmyg yn awr, os gan fynegu y mynegwch ef i mi o fewn saith niwrnod y wlêdd, ac ai cewch: yna y rhoddaf i chwi ddêc ar hugain o linllionennau, a dec ar hugain pâr o wiscoedd newyddion.

¹³Ond os chwi ni fedrwch ei fynegu i mi, yna chwi a roddwch i mi ddec ar hugain o linllionennau, a dec pâr ar hugain o wiscoedd: hwythau a ddywedasant, traetha dy ddychymmyg fel y clywom ef.

¹⁴Ac efe a ddywedodd wrthynt, o’r hwn oedd yn bwytta y daeth bwyd allan, ac o’r cryf y daeth allan felustra: ond ni fedrent ddirnad y dychymmig [mewn] tri diwrnod.

¹⁵Ac yn y seithfed dydd y dyŵedasant wrth wraig Samson huda dy ŵr fel y mynego efe i ni y dychymmyg, rhac i ni dy losci di, a thŷ dy dâd a thân: ai i’n gorescyn ni i’n gwahoddasoch, ai nade?

¹⁶Yna gwraig Samson a ŵylodd wrtho ef, ac a ddywedodd, yn ddiau y mae yn gâs gennit fi, ac ni’m hoffaist: dychymmyg a roddaist i feibion fy mhobl, ac ni’s mynegaist i mi: a dywedodd yntef, wele nis mynegais i’m tad, nac i’m mam, ai mynegwn gan hynny i ti?

¹⁷Felly hi a ŵylodd wrtho ef y saith niwrnod hynny tra yr oeddid yn cynnal y wlêdd, ac yn y seithfed dydd y mynegodd efe iddi hi: canys yr oedd hi yn ei flino ef, yna hi a fynegodd y dychymmyg i feibion ei phobl.

¹⁸Yna gwŷr y ddinas a ddywedasant wrtho ef y seithfed dydd cynn machludo yr haul, beth [sydd] felusach na mêl? a pheth gryfach na llew? dywedodd yntef wrthynt, oni buase i chwi aredic a’m anner i, ni chawsech allan fy nychymmyg.

¹⁹Ac yspryd yr Arglwydd a ddaeth arno ef, ac efe a aeth i wared i Ascalon, ac a darawodd o honynt ddec ar hugain, ac a gymmerth eu hispail, ac a roddodd y gwiscoedd newyddion i’r rhai a fynegasent y dychymmyg: ai ddigllonedd ef a lidiodd, ac efe a aeth i fynu i dy ei dâd.

²⁰A phriododd gwraig Samson ei gyfell ef ei hun, yr hwn oedd gyfeillgar ag ef.