Read Xasasti talacaxlan San Marcos 16 Bible Online

San Marcos 16 - Xasasti talacaxlan bible

San Marcos 16

¹Ti̠taxtuko̠lh sábado acxni̠ ni̠ti̠ cscuja, y acxni̠ tzí̠sualh huatiyá a̠má quilhtamacú, María Magdalena, María xtzí José y Santiago, xa̠hua Salomé, xlacán táalh tatama̠huay xalacuán perfumes la̠qui̠ nataán tali̠tlahuapu̠xtuy xtiyatli̠hua Jesús.

²Li̠cha̠lí domingo luu lacatzi̠sa tatá̠qui̠lh y táalh antaní xma̠cnu̠cani̠t Jesús cajcu xtaxtuma̠chi chichiní.

³Sacstucán chiné xtala̠huaniti̠lhay: —¿Tícu chú nama̠take̠nu̠y cahuá a̠má lanca chíhuix hua̠ntu̠ lacahuili̠cani̠t a̠má lhucu?

⁴Pero acxni̠ tácha̠lh taúcxilhli pi̠ ta̠má lanca chíhuix hua̠ntu̠ xli̠lakatalacani̠t nac lhucu aya xma̠take̠nu̠cani̠t.

⁵Tatánu̠lh tzinú nac xpu̠lacni lhucu y antá taúcxilhli pi̠ xuí cha̠tum kahuasa, pero luu snapapa xlháka̠t y pu̠lhmá̠n hua̠ntu̠ clhaka̠ni̠t, xlacán luu la̠n tape̠cualh.

⁶Pero xlá chiné ca̠huánilh: —Ni̠ cape̠cuántit. Huixinín putzayá̠tit Jesús xalac Nazaret hua̠nti̠ pekextokohuacácalh nac cruz. Pero xlá aya lacastacuánalh nac ca̠li̠ní̠n. Ma̠squi luu caucxílhtit uú ni̠ti̠ antaní xtarami̠cani̠t.

⁷Xa̠huachí capitittá y caca̠huanipítit xdiscípulos xa̠hua Pedro xlacata pi̠ naca̠pu̠laniyá̠n naán a̠má nac Galilea y antá naucxilha̠pítit porque chuná tica̠huanín.

⁸Ama̠ko̠lh lacchaján xtape̠cuacán tzúculh talhpipiy; la̠li̠huán tatáxtulh y tokosú̠n táalh. Pero ni̠ti̠ tuncán tali̠ta̠chuhuí̠nalh hua̠ntu̠ xtaucxilhni̠t porque xtape̠cuaxni̠má̠nalh. Jesús tasiyuniy María Magdalena (Juan 20.11‑18)

⁹Acxni̠ nia̠ cxkakako̠y a̠má quilhtamacú domingo Jesús xlacastacuanani̠ttá nac ca̠li̠ní̠n; pero pu̠lh María Magdalena tasiyúnilh la̠qui̠ xlá naucxilha pi̠ lama xastacná. Huá eé pusca̠t hua̠nti̠ xtamacxtunini̠t kalhatujún xespíritu akskahuiní.

¹⁰Acxni̠ xlá úcxilhli Jesús xlá ca̠lákalh a̠ma̠ko̠lh xcompañeros Jesús hua̠nti̠ maka̠s quilhtamacú xtata̠latapu̠li̠ni̠t y ca̠huánilh lácu xucxilhni̠t, xlacán xtali̠puhuamá̠nalh y xtatasaxni̠má̠nalh.

¹¹Pero acxni̠ xlacán ca̠huanícalh pi̠ Jesús xlacastacuanani̠t y xlama xastacná, ni̠ taca̠nájlalh. Jesús ca̠tasiyuniy cha̠tiy xtama̠kalhtahuaké̠n (Lucas 24.13‑35)

¹²Caj li̠puntzú na̠ ca̠tasiyúnilh cha̠tiyli̠tum xtama̠kalhtahuaké̠n xlacán xtayá̠nalh nac tiji xtaamá̠nalh nac aktum ca̠chiquí̠n; ca̠tasiyúnilh la̠qui̠ nataucxilha pi̠ xlama xastacná.

¹³Acxni̠ taucxilhko̠lh, xlacán la̠li̠huán tatáspitli y táalh tali̠ta̠chuhui̠nán xa̠makapitzí̠n discípulos pi̠ xli̠ca̠na xlacastacuanani̠t. Pero xlacán ni̠para chuná taca̠nájlalh. Amá tascújut hua̠ntu̠ natama̠kantaxti̠y apóstoles (Mateo 28.16‑20; Lucas 24.36‑49; Juan 20.19‑23)

¹⁴Y acali̠sta̠n li̠túm Jesús ca̠tasiyúnilh pacs kalhaca̠huitu xdiscípulos la̠qui̠ nataca̠najlay pi̠ xli̠ca̠na lama xastacná. Xlacán xtahuilá̠nalh nac mesa xtahua̠yamá̠nalh; xlá ca̠lacaquílhni̠lh tzinú porque luu ni̠ xtaca̠najlaputún para xli̠ca̠na xlama xastacná, porque caj taliaklhu̠huá̠tnalh acxni̠ xli̠chuhui̠nancani̠t pi̠ xlacastacuanani̠t.

¹⁵Acali̠stá̠n acxni̠ xlacán lacatum xtatamacxtumi̠ni̠t chiné ca̠huánilh: —Capítit xli̠hua̠k ca̠chiquí̠n hua̠ntu̠ tahuilá̠nalh xli̠ca̠lanca ca̠quilhtamacú y caca̠li̠ma̠kalhchuhui̠ní̠tit xli̠hua̠k cristianos eé quintachuhuí̠n hua̠ntu̠ ma̠sta̠y laktáxtut.

¹⁶Hua̠nti̠ naquintali̠pa̠huán y natataakmunuy natalakma̠xtuy xli̠stacnicán, pero hua̠nti̠ ni̠ naquili̠pa̠huán pus ámaj ma̠laktzanke̠y xli̠stacni nac xlacatí̠n Dios acxni̠ naca̠ma̠xoko̠ni̠cán hua̠ntu̠ tatitlahuani̠t.

¹⁷Y xlacáta natacatzi̠y pi̠ Dios lama nac milatama̠tcán makapitzí̠n hua̠nti̠ naquintali̠pa̠huán naca̠ma̠xqui̠cán li̠tlihueke xlacata tla̠n natama̠pacsay hua̠nti̠ ca̠makatlajani̠t xespíritu akskahuiní y tla̠n natali̠chuhui̠nán ti̠pa̠katzi tachuhuí̠n hua̠ntu̠ xlacán nia̠ xtacatzi̠y.

¹⁸Hasta tla̠n natachipay lu̠hua y ni̠tu̠ catica̠tlahuánilh, y para túcu natahuay hua̠ntu̠ kalhi̠y veneno ni̠tu̠ catitali̠lánilh, y caj xmacán tla̠n natali̠ma̠pacsay ta̠tatlaní̠n. Jesús an nac akapú̠n (Lucas 24.50‑53)

¹⁹La̠ chuná ca̠ta̠chuhui̠nanko̠lh Quimpu̠chinacán Jesús tzúculh tata̠lhma̠ni̠y y alh nac akapú̠n antaní huilachá Dios.

²⁰Y acali̠stá̠n a̠ma̠ko̠lh xtama̠kalhtahuaké̠n tatáca̠xli y táalh antaní tahuilá̠nalh lactzu̠ ca̠chiquí̠n, tzúculh tama̠kalhchuhui̠ni̠y cristianos xtachuhuí̠n Cristo hua̠ntu̠ ma̠sta̠y laktáxtut. Y cumu Dios xca̠makta̠yama xlacán xtatlahuay lhu̠hua laclanca li̠cá̠cni̠t tascújut la̠qui̠ chuná nacatzi̠cán pi̠ Dios xlama nac xlatama̠tcán y xli̠ca̠na xtali̠chuhui̠namá̠nalh xtalacapa̠stacni.