Read Xasasti talacaxlan San Marcos 5 Bible Online

San Marcos 5 - Xasasti talacaxlan bible

San Marcos 5

¹Ni̠ xli̠maka̠s tácha̠lh nac aktum ca̠chiquí̠n huanicán Gadara a̠li̠quilhtu̠tu pupunú.

²Lá tacutli Jesús nac barco lákmilh cha̠tum chixcú hua̠nti̠ xakchipaniko̠ni̠t xtalacapa̠stacni akskahuiní.

³Amá chixcú xlá xca̠tasapu̠lay nac ca̠pú̠sa̠ntu y luu li̠xcájnit xli̠catzi̠y ni̠ti̠ lay xmakatlajay xlacata nachi̠huili̠cán.

⁴Maklhu̠hua tzaksácalh li̠lacchí̠calh cadena nac xtantú̠n xa̠hua cxmacán pero xlacputxa y ni̠tu̠ xca̠liucxilha.

⁵Tantacú tantascaca xtasatapu̠li̠y nac ca̠ke̠sti̠ní̠n xa̠hua ca̠pú̠sa̠ntu, y sacstu xli̠ma̠take̠hui̠cán chíhuix.

⁶Makatcú xmima Jesús acxni̠ úcxilhli, tokosú̠n lákmilh y acxni̠ cha̠lh nícu xuí lakatatzokóstalh.

⁷Pero Jesús li̠ma̠péksi̠lh: —Huix xespíritu akskahuiní, camactaxtu tamá chixcú. La̠ta xe̠k tásalh chiné kálhti̠lh: —Jesús Xkahuasa Dios xala ta̠lhmá̠n, ¿túcu xpa̠lacata quila̠li̠pektanu̠yá̠hu? Lanca li̠tlá̠n cca̠squiniyá̠n ni̠ naquila̠ma̠pa̠ti̠ni̠yá̠hu.

⁹Jesús kalhásquilh: —¿Túcu huanicana? Amá xespíritu akskahuiní chiné kalhtí̠nalh: —Cli̠tapa̠cuhui̠yá̠hu Legión porque quilhu̠huacán hua̠nti̠ cmactanu̠ma̠náhu eé chixcú.

¹⁰Luu lanca li̠tlá̠n tasquínilh Jesús xlacata ni̠ naca̠macá̠n a̠lacatunu pu̠latama̠n.

¹¹Y antá lacatzú nac ke̠stí̠n xtalapu̠lay ma̠x cumu aktiy mi̠lh paxni,

¹²acxni̠ taúcxilhli a̠ma̠ko̠lh xespíritu akskahuiní luu lanca li̠tlá̠n tasquínilh Jesús y chiné tahuánilh: —Caquila̠ma̠xquí̠hu quilhtamacú nactanu̠yá̠hu nac a̠ma̠ko̠lh paxni talayá̠nalh tanú lacatzú.

¹³Jesús ca̠má̠xqui̠lh quilhtamacú, y a̠ma̠ko̠lh xespíritu akskahuiní antá tamactánu̠lh. Pero a̠ma̠ko̠lh paxni tzúculh takosnún, táalh nac aktum talhpá̠n, tataju̠chá nac chúchut y antá tajicsuako̠lh.

¹⁴Ama̠ko̠lh hua̠nti̠ xtamaktakalhmá̠nalh paxni acxni̠ taúcxilhli lácu tani̠ko̠lh paxni, tape̠cuáxni̠lh, takosú̠n tatzá̠lalh y cani̠huá nac tiji chu nac ca̠chiquí̠n tali̠chuhuí̠nalh hua̠ntu̠ xca̠okspulani̠t, y lhúhua cristianos támilh taucxilha hua̠ntu̠ xlani̠t.

¹⁵Acxni̠ tachilh antaní xyá Jesús, taúcxilhli a̠má chixcú hua̠nti̠ xapu̠lh xkalhi̠y xespíritu akskahuiní, antá xlá culucs xuí y niaj xkalhi̠y li̠xcájnit xtalacapa̠stacni. Pero xlacán xtape̠cuaniy.

¹⁶Makapitzí̠n cristianos hua̠nti̠ xtaucxilhni̠t a̠má chixcú acxni̠ tamactáxtulh xespíritu akskahuiní y acxni̠ tani̠ko̠lh a̠má paxni antaní tatánu̠lh, tzúculh tali̠chuhui̠nán.

¹⁷Pero acxni̠ tla̠n taakáta̠ksli hua̠ntu̠ xtlahuani̠t Jesús tzúculh tahuaniy xlacata catláhualh li̠tlá̠n catatampú̠xtulh nac xca̠chiqui̠ncán.

¹⁸Acxni̠ Jesús táju̠lh nac barco, a̠má chixcú hua̠nti̠ xapu̠lh xkalhi̠y xtalacapa̠stacni akskahuiní chiné huánilh: —Catlahua li̠tlá̠n, quima̠xqui quilhtamacú nacsta̠laniyá̠n.

¹⁹Pero Jesús ni̠ tla̠n tlahuánilh hua̠ntu̠ xmaksquima huata chiné huánilh: —Caca̠lakpi mili̠talakapasni nac mínchic, caca̠li̠ma̠kalhchuhui̠ni lácu Dios lakalhamani̠tán y ma̠pacsani̠tán.

²⁰Amá chixcú alh, xlá tzúculh li̠chuhui̠nán lácu Dios xmakta̠yani̠t, y hua̠nti̠ xtakaxmata luu xtaca̠cni̠y Jesús caj xpa̠lacata xtascújut hua̠ntu̠ xlá xca̠tlahuay, cani̠huá xli̠chuhui̠nancán Jesús antá nac a̠má akcá̠hu ca̠chiquí̠n xca̠huanicán Decápolis. Cha̠tum pusca̠t xamaniy clháka̠t Jesús y pacsa (Mateo 9.18‑26; Lucas 8.40‑56)

²¹Acxni̠ Jesús qui̠táspitli a̠li̠quilhtu̠tu pupunú y tacutli cbarco lhu̠hua cristianos tatamacxtúmi̠lh nac xquilhtú̠n chúchut antanícu xlá xlaya, y antá xlá tzúculh ca̠ma̠kalhchuhui̠ni̠y.

²²Caj li̠puntzú chilh cha̠tum xapuxcu ma̠peksi̠ná xalac xpu̠siculancán judíos xuanicán Jairo. Acxni̠ úcxilhli Jesús alh lakatatzokostay,

²³y chiné huánilh: —Quintzuma̠t luu snu̠n ta̠tatlay y amajá ni̠y, catlahua li̠tlá̠n caquinta̠pi nac quínchic la̠qui̠ huix naliacchipaya mimacán, nama̠pacsaya y li̠pa̠xúhu nalatama̠y.

²⁴Pus Jesús tá̠alh pero luu xtzamacán nac tiji hasta xla̠lakxquititi̠lhacán.

²⁵Y nac xlaksti̠pá̠n cristianos xmakmima cha̠tum pusca̠t hua̠nti̠ aya xkalhi̠y akcu̠tiy ca̠ta la̠ta xta̠tatlay cstajmakama kalhni y ne̠cxni cxuncniy antaní xtaka̠hui̠ni̠t.

²⁶Y lhu̠hua doctores xtacuchi̠ni̠t pero caj la̠n xtama̠pa̠ti̠ni̠ni̠t porque ni̠tu̠cu xtatlahuanini̠t, caj la̠n xtamaklhti̠ni̠t xtumi̠n hua̠ntu̠ xlá xkalhi̠y y li̠huaca xtasnu̠ni̠ma.

²⁷Huá xpa̠lacata acxni̠ káxmatli la̠ta xli̠chuhui̠nancán Jesús xlá chiné lacpúhua: “Huatiyá para xacqui̠xamánilh tzinú clháka̠t eé quintajátat ámaj pacsa.” Cumu luu xtzamacán xlá lakasiyu laktalakatzúhui̠lh y tze̠k xamánilh clháka̠t Jesús.

²⁹Tuncán tachókolh xkalhni y maklhcátzi̠lh pi̠ aya xpacsni̠t.

³⁰Pero Jesús cátzi̠lh pi̠ xli̠tlihueke hua̠ntu̠ xkalhi̠y xmacni xli̠pacsni̠t cha̠tum. Xlá talakáspitli, tzúculh lacaputza̠nán antaní xtayá̠nalh cristianos, y chiné kalhasquiní̠nalh: —¿Tícu xámalh quilháka̠t?

³¹Xdiscípulos takálhti̠lh: —Huix ucxílhpa̠t pi̠ lhu̠hua tzamacán y cati̠huá qui̠toklhmá̠n, todavía kalhasquini̠nana: “¿Tícu xámalh quilháka̠t?”

³²Pero Jesús lacaxtum xlacaputza̠nama xlacata nalacamaclay tícu cxamanini̠t clháka̠t y xma̠pacsani̠t.

³³Amá pusca̠t xcatzi̠y pi̠ huá xma̠pacsacani̠t por eso tzúculh li̠pe̠cuán, clhpipima talacatzúhui̠lh antaní xyá Jesús, talakatatzokóstalh nac xlacatí̠n, huánilh pi̠ huá cxamanini̠t clháka̠t y xma̠pacsani̠t.

³⁴Jesús huánilh: —Huix pacsni̠ta porque ca̠najlani̠ta pi̠ aquit tla̠n nacma̠pacsayá̠n, li̠pa̠xúhu capit nac mínchic porque la̠nchú aya pacsni̠t mintajátat.

³⁵Jesús chunacú xchuhui̠nama acxni̠ tachilh makapitzí̠n cristianos xlacán taminchá nac xchic Jairo. Chiné tahuánilh xtla̠t a̠má tzuma̠t: —Puntzujcú ni̠lh mintzuma̠t, huata ma̠squi niaj cata̠pi ma̠kalhtahuake̠ná Jesús.

³⁶Pero Jesús ni̠ li̠ta̠katzánke̠lh hua̠ntu̠ xlacán xtaquilhuamá̠nalh y chiné huánilh Jairo: —Huix chunacú caquili̠pá̠huanti y ni̠ capé̠cuanti.

³⁷Ni̠ lacásquilh pu̠tum natasta̠laniy sino caj xma̠n Pedro, Santiago xa̠hua Juan xta̠Santiago.

³⁸Acxni̠ tácha̠lh nac xchic Jairo, úcxilhli pi̠ lhu̠hua xtzamacán y hua̠k xtasama̠kó̠calh y xtali̠puhuamá̠nalh.

³⁹Jesús tánu̠lh nac chiqui y ca̠huánilh: —¿Túcu xpa̠lacata li̠tasapá̠tit y li̠puhuampá̠tit? Pus tamá tzuma̠t caj lhtatama, ni̠ xaní̠n cumu la̠ huixinín lacpuhuaná̠tit.

⁴⁰Y huata caj tzúculh tali̠li̠tziyán xtachuhuí̠n. Jesús ca̠huánilh xlacata pu̠tum catatáxtulh, caj xma̠n xtzí xa̠hua xtla̠t a̠má tzuma̠t y hua̠nti̠ xca̠ta̠mini̠t ca̠ta̠tánu̠lh antaní xmá a̠má tzuma̠t.

⁴¹Jesús macachípalh a̠má tzuma̠t y huánilh: —Talita cumi —u̠má tachuhuí̠n huamputún: Huix cuanimá̠n, tzuma̠t, cata̠qui.

⁴²Y a̠má tzuma̠t cajcu xakcu̠tiy ca̠ta xuani̠t, tuncán tá̠qui̠lh y xlá tzúculh tla̠huán. Y hua̠nti̠ xtaucxilhmá̠nalh cristianos tzúculh tapa̠xuhuay.

⁴³Acali̠stá̠n Jesús ca̠li̠ma̠péksi̠lh xnatla̠tni xlacata ni̠ natali̠chuhui̠nán la̠ ma̠lacastacuáni̠lh xtzuma̠tcán y na̠ ca̠huánilh catamá̠hui̠lh.