Read Xasasti talacaxlan San Lucas 1 Bible Online

San Lucas 1 - Xasasti talacaxlan bible

San Lucas 1

¹Amigo Teófilo: Luu xli̠ca̠na li̠pa̠xúhu ctzokniyá̠n a̠má tachuhuí̠n hua̠ntu̠ lhu̠hua cristianos tatzaksani̠t li̠huana̠ xtatzokputún la̠ta túcu kantáxtulh nac xlatáma̠t Jesucristo y luu li̠huana̠ xtama̠lacti̠tumi̠putún,

²chuná cumu la̠ quinca̠li̠ta̠chuhui̠nani̠tán hua̠nti̠ luu ma̠n taucxilhní̠t la̠ta lácu titzucuchá, y acali̠stá̠n xlacán na̠ tzúculh taliakchuhui̠nán eé tachuhuí̠n porque xtacatzi̠y pi̠ xli̠cána hua̠ntu̠ xtali̠chuhui̠nán.

³Aquit na̠ luu li̠huana̠ cputza̠nani̠t y ckalhasquini̠nani̠t xli̠hua̠k hua̠ntu̠ qui̠táxtulh hasta la̠ta lácu luu titzucuchá, y lá̠mpara luu tla̠n clacpuhuán pi̠ nactzokniyá̠n y nacma̠lacti̠tumi̠niyá̠n pu̠tum hua̠ntu̠ qui̠taxtuni̠t nac xlatáma̠t Quimpu̠chinacán,

⁴la̠qui̠ na̠chuná huix nacatzi̠ya li̠huana̠ hua̠ntu̠ aya li̠ma̠kalhchuhui̠ni̠cani̠ta. Cha̠tum ángel an ma̠catzi̠ni̠nán pi̠ nalacachín Juan Bautista

⁵Pus la̠nchú nacuaniyá̠n lácu luu mini̠tanchá eé tachuhuí̠n: Amá maká̠n quilhtamacú acxni̠ Herodes gobernador xuani̠t nac Judea, na̠ acxni̠ xlama cha̠tum cura xuanicán Zacarías xlá antá xca̠ta̠tapeksi̠y makapitzí̠n cura hua̠ntu̠ maká̠n quilhtamaxcú tima̠lacatzuqui̠chá Abías. Xpusca̠t Zacarías xuanicán Isabel, xlá na̠ xli̠talakapasni xuani̠t a̠má hua̠nti̠ luu xapu̠lh cura xuanicán Aarón.

⁶Zacarías chu Isabel luu aksti̠tum xtalamá̠nalh nac xlacatí̠n Dios y xtalaktzaksamá̠nalh hua̠k tla̠n natama̠kantaxti̠y xli̠ma̠peksí̠n Quimpu̠chinacán, xli̠ca̠na luu tla̠n xtacatzi̠y.

⁷Xlacán ni̠ xtakalhi̠y xcamán, xa̠huachí luu xlacxtumcán xcha̠tiycán aya xtako̠lumá̠nalh.

⁸Maktum quilhtamacú acxni̠ lákcha̠lh la̠ta lácu natalakachixcuhui̠nán a̠ma̠ko̠lh cura antanícu xmaktapeksi̠y Zacarías, pus huata antá alh nac lanca xpusiculan Dios xalac Jerusalén.

⁹Y cumu luu chuná xtali̠smani̠ni̠t cura natamacá̠n suerte la̠qui̠ natacatzi̠y xatícu nalakchá̠n la̠qui̠ pu̠lh natanu̠y y nalakachixcuhui̠nán, pus huata huá lákcha̠lh Zacarías natanu̠y antanícu xlakachixcuhui̠cán Dios hua̠ntu̠ huilachá nac xpu̠lacni lanca pu̠siculan la̠qui̠ antá nalhcuyuy ciensus.

¹⁰Li̠huán clhcuma ciensus xa̠makapitzí̠n xli̠lhu̠hua cristianos xtakalhtahuakanimá̠nalh Dios nac xaquilhtí̠n.

¹¹Y caj xamaktum xángel Quimpu̠chinacán tasiyúnilh Zacarías y úcxilhli pi̠ antá nac xpekstácat xlaya altar antanícu clhcuma ciensus.

¹²Acxni̠ Zacarías úcxilhli a̠má ángel pé̠cualh y niaj para xcatzi̠y túcu natlahuay.

¹³Pero ángel chiné huánilh: —Ni̠ capé̠cuanti Zacarías, porque luu lakati̠y Dios la̠ kalhtahuakaniya, xlá aya kaxmatni̠t hua̠ntu̠ huix maksquina y mimpusca̠t Isabel ámaj ma̠lakatuncuhui̠y cha̠tum actzu̠ skata y huix nali̠ma̠pa̠cuhui̠ya Juan.

¹⁴Huix luu xli̠ca̠na nali̠pa̠xuhuaya minkahuasa y na̠chuná xa̠makapitzí̠n xli̠lhu̠hua cristianos natali̠pa̠xuhuay acxni̠ xlá nalacachín,

¹⁵porque a̠má minkahuasa luu xli̠ca̠na lanca tascújut nakalhi̠y nac xlacatí̠n Dios. Xlá ni̠ catíhualh cuchu, y kalhi̠y nahuán xli̠tlihueke Espíritu Santo hasta acxni̠ nia̠ lacachín nahuán.

¹⁶Y lhu̠hua cristianos xalac Israel hua̠nti̠ takalhakaxmatmakani̠t Quimpu̠chinacán xlá naca̠ma̠akata̠ksni̠y pi̠ xma̠n huá Dios nakaxmatko̠y y chuná xlacán natali̠pa̠huamparay.

¹⁷Amá minkahuasa Juan napu̠laniy Quimpu̠chinacán hua̠nti̠ mima, y na̠chuná nakalhíy xtalacapa̠stacni chú xli̠tlihueke hua̠ntu̠ xkalhi̠y xamaká̠n profeta Elías la̠qui̠ naca̠lakpali̠niy xtalacapa̠stacnicán xnacujcán xanatla̠tni la̠qui̠ natapa̠xqui̠y xcamancán, y hua̠nti̠ luu lacli̠pe̠cuánit xtalacapa̠stacnicán xlá naca̠ma̠siyuniy lácu natakalhakaxmatni̠nán hua̠ntu̠ Dios ca̠li̠ma̠peksi̠putún. Y chuná xlá naca̠ma̠kalhchuhui̠ni̠y cristianos la̠qui̠ cha̠catzi̠ya natakalhkalhi̠y Quimpu̠chinacán hua̠nti̠ namín.

¹⁸Zacarías kalhásquilh a̠má ángel: —¿Pero lácu chú nacli̠catzi̠y para xli̠ca̠na hua̠ntu̠ quihuanípa̠t? Porque aquit aya ko̠lutá y na̠chuná quimpusca̠t na̠ aya tzicaná.

¹⁹Amá ángel chiné kálhti̠lh: —Aquit quihuanicán Gabriel, y aquit cta̠scujma Dios, xlá quimacamini̠t la̠qui̠ nacta̠chuhui̠naná̠n y nacma̠catzi̠ni̠yá̠n u̠má xasa̠sti tama̠catzi̠ní̠n.

²⁰Pero cumu huix ni̠ ca̠najla hua̠ntu̠ cuanín pus huix la̠nchú pímpa̠t ko̠ko̠na, y ni̠lay catichuhuí̠nanti hasta acxni̠ nakantaxtuko̠y hua̠ntu̠ cuanini̠tán y nalacachín minkahuasa.

²¹Y nac xaquilhtí̠n a̠má lanca pu̠siculan antanícu xlakachixcuhui̠nancán, xli̠lhu̠hua cristianos xtakalhi̠má̠nalh la̠qui̠ nataxtuya̠chi Zacarías, pero xlacán akatiyuj xtalamá̠nalh porque ni̠ pála xtaxtuma̠chi nac pu̠siculan.

²²Pero acxni̠ taxtuchi Zacarías xko̠ko̠ni̠t y ni̠lay xchuhui̠nán huata caj xca̠macahuaniy acxni̠ xca̠kalhti̠putún hua̠ntu̠ xtahuaniy; pus acxnicú tacátzi̠lh a̠ma̠ko̠lh cristianos pi̠ ma̠x tzanká túcu xli̠ma̠lacahua̠ni̠cani̠t nac xpu̠lacni pu̠siculan antanícu xlakachixcuhui̠nama.

²³Acxni̠ lákcha̠lh quilhtamacú la̠ta tama̠kátzi̠lh xtascujutcán li̠lakachixcuhuí̠nat nac lanca pu̠siculan xalac Jerusalén Zacarías táspitli nac xca̠chiquí̠n nac xchic.

²⁴Chi̠nchú Isabel hua̠nti̠ xpusca̠t Zacarías acxnitiyá tzúculh maklhcatzi̠y pi̠ niaj sacstu xlama, y ma̠x a̠huayu akquitzis papá niaj ni̠ nícu alh; y xlá chiné xlacpuhuán:

²⁵“Huá chuná quili̠tlahuani̠t Quimpu̠chinacán la̠nchú la̠qui̠ cristianos niaj pucutá naquintali̠kalhkama̠nán.” Cha̠tum ángel ma̠catzi̠ni̠nán pi̠ nalacachín Jesús

²⁶Xliakcha̠xán papá Dios maca̠mpá ángel Gabriel nac aktum ca̠chiquí̠n xuanicán Nazaret cxapu̠latama̠n Galilea

²⁷la̠qui̠ naán lakapaxia̠lhnán cha̠tum tzuma̠t xuanicán María, u̠má tzuma̠t aya xli̠kalhti̠ni̠t José la̠qui̠ nata̠tamakaxtoka; a̠má José na̠ xli̠talakapasni xuani̠t xamaká̠n rey David.

²⁸Amá ángel laktanu̠chá antanícu xuí María y chiné huánilh: —¡Luu ca̠na li̠pa̠xúhu clakchimá̠n huix tzuma̠t hua̠nti̠ Dios lacsacni̠tán! Dios Quimpu̠chinacán huix ankalhi̠ná ta̠huilán, y xa̠huachí a̠tzinú huix siculana̠tlahuani̠tán ni̠ xachuná xa̠makapitzí̠n lacchaján.

²⁹Acxni̠ María úcxilhli ángel xlá xli̠ca̠na cacs li̠lacáhua la̠ta tu̠ xli̠xakatli̠ma, y xlá xlacpuhuama túcu cahuá chuná xli̠huanima.

³⁰Pero ángel tuncán huanipá: —María, ni̠ capé̠cuanti porque Dios lacsacni̠tán la̠qui̠ nama̠kantaxti̠ya hua̠ntu̠ xlá laclhca̠huili̠ni̠t.

³¹Huix la̠nchú pímpa̠t kalhkalhi̠ya cha̠tum actzu̠ skata, y acxni̠ nalacachín huix nali̠ma̠pa̠cuhui̠ya Jesús.

³²Xlá luu xli̠ca̠na tali̠pa̠hu chixcú nahuán nac xlaksti̠pa̠ncán cristianos y luu namini̠niy nali̠tapa̠cuhui̠y Xkahuasa Dios hua̠nti̠ luu lanca xlacatzúcut. Xa̠huachí Dios nali̠ma̠xtuy lanca rey cumu la̠ xamaká̠n xli̠talakapasni rey David,

³³la̠qui̠ nama̠peksi̠nán nac xli̠ca̠lanca xpu̠latama̠n Israel cane̠cxnicahuá quilhtamacú, xa̠huachí xli̠ma̠peksí̠n ne̠cxni catiláksputli nac ca̠quilhtamacú.

³⁴María kalhásquilh a̠má ángel: —¿Pero lácu chú luu naqui̠taxtuy porque aquit ni̠ti̠ cta̠hui chixcú?

³⁵Xlá kálhti̠lh: —Espíritu Santo nalakminá̠n y xli̠tlihueke Dios naakmiliyá̠n cumu lá puclhni, pus huá xpa̠lacata a̠má kahuasa hua̠nti̠ nalacachín xla Dios nahuán y luu Xkahuasa Dios nali̠ma̠pa̠cuhui̠cán.

³⁶Na̠chuná cacatzi pi̠ minta̠puxnímit Isabel na̠ nama̠lakatuncuhuiy cha̠tum actzu̠ skata ma̠squi aya tzicaná. Pus ma̠squi chuná huancán pi̠ xlá ni̠lay kalhi̠y xcamán pus chú aya le̠ma xliakcha̠xán papá la̠ta niaj sacstu lama.

³⁷Porque xli̠hua̠k hua̠ntu̠ xtalacasquín Dios ni̠lay catitamákxtekli para ni̠ nakantaxtuy.

³⁸Acxnitiyá María chiné huá: —Aquit cli̠taxtuy cumu la̠ xtasa̠cua Quimpu̠chinacán, pus chuná catláhualh Dios nac quilatáma̠t la̠ta hua̠ntu̠ huix quihuanini̠ta. Acxni̠ chuná huanko̠lh María, a̠má ángel na̠ alhá. María an lakapaxia̠lhnán Isabel

³⁹Ni̠ li̠maka̠s quilhtamacú María la̠li̠huán alh nac xapu̠latama̠n Judea hasta nac aktum ca̠chiquí̠n hua̠ntu̠ xuilachá nac ca̠sipijni.

⁴⁰Acxni̠ cha̠lh nac xchic Zacarías tuncán tánu̠lh y xakátli̠lh xta̠puxnímit Isabel,

⁴¹y acxni̠ káxmatli Isabel pi̠ xakátli̠lh María tuncán maklhcátzi̠lh pi̠ tasaká̠li̠lh cskata nac xpulacni y lákchilh xli̠tlihueke Espíritu Santo.

⁴²Y palha chiné huá: —¡Dios a̠tzinú huix siculana̠tlahuani̠tán ni̠ xachuná xa̠makapitzí̠n lacchaján, y na̠chuná siculana̠tlahuani̠t minkahuasa hua̠nti̠ nalacachín!

⁴³¿Túcu aquit quinkásat la̠qui̠ namín quilakapaxia̠lhnán hua̠nti̠ xtzí Quimpu̠chiná?

⁴⁴Porque caj la̠ ckáxmatli pi̠ quixakatli, a̠má quiskata caj la̠ta pa̠xúhualh tasaká̠li̠lh nac quimpu̠lacni.

⁴⁵Xli̠ca̠na luu li̠pa̠xúhu huix lápa̠t nahuán porque ca̠najla xtachuhuí̠n hua̠ntu̠ huanín; pus luu xli̠ca̠na pi̠ chuná nakantaxtuy hua̠ntu̠ ma̠catzi̠ni̠ni̠tán Quimpu̠chinacán.

⁴⁶Acali̠stá̠n María na̠ chiné tzúculh chuhui̠nán:Quili̠stacni makapa̠xuhuay Quimpu̠chiná;

⁴⁷chi̠nchú quinacú luu li̠pa̠xuhuay quiDios hua̠nti̠ quima̠akapu̠taxti̠ná.

⁴⁸Porque xlá quiucxilhlacachini̠t aquit koxuta li̠ma̠xken xtasa̠cua,hasta la̠ la̠nchú eé quilhtamacú xli̠hua̠k cristianos naquintali̠chuhui̠nán lácu Dios xli̠ca̠na quima̠xqui̠ni̠t lanca tapa̠xuhuá̠n.

⁴⁹Porque Dios hua̠nti̠ lanca xlacatzúcut laclanca li̠cá̠cni̠t tascújut tlahuani̠t nac quilatáma̠t.¡Luu xli̠ca̠na pi̠ xma̠n huá tla̠n catzi̠y xtapuhuá̠n!

⁵⁰Ankalhi̠ná naca̠lakalhamán hua̠nti̠ luu xli̠ca̠na aksti̠tum tale̠mputún xlatama̠tcán nac xlacatí̠n.

⁵¹Uú nac ca̠quilhtamacú laclanca tascújut xlá ca̠tlahuani̠t,y hua̠nti̠ luu laclanca y lactali̠pa̠hu xtali̠taxtuy xlá ca̠makatlajako̠lh y ca̠ma̠actzuhui̠ko̠lh.

⁵²Y na̠chuná hua̠nti̠ luu lactali̠pa̠hu ma̠peksi̠naní̠n na̠ ca̠ma̠actzuhui̠ko̠lh,y huata hua̠nti̠ ni̠tu̠ xkasatcán xtahuani̠t lactali̠pa̠hu ca̠tláhualh.

⁵³Hua̠nti̠ lakli̠ma̠xkení̠n xtatzincsni̠má̠nalh xlá ca̠má̠xqui̠lh hua̠ntu̠ xlacán xtamaclacasquimá̠nalh,y hua̠nti̠ lacrrico ca̠maklhti̠ko̠lh hua̠ntu̠ xtakalhi̠y y caj chunatá ca̠máca̠lh.

⁵⁴Ca̠maktá̠yalh xcamaná̠n xalac Israel porque xca̠lacsacni̠t natascujniy,y ne̠cxni chunatá ca̠mákxtekli huata juerza ca̠lakalhámalh.

⁵⁵Porque chuná xca̠li̠ta̠yanini̠t Abraham chu xa̠makapitzí̠n lakmaká̠n quili̠talakapasnicán,tica̠ma̠lacnú̠nilh xlacata naca̠ucxilhlacachá̠n hua̠nti̠ xli̠talakapasnicán Abraham cane̠cxni cahuá quilhtamacú.

⁵⁶Ma̠x cumu aktutu papá ta̠tamakxtekchá xta̠puxnímit Isabel y acali̠stá̠n María taspitpá nac xchic. Juan Bautista lacachín

⁵⁷Ni̠ li̠maka̠s quilhtamacú takátzi̠lh acxni̠ Isabel nata̠tatlay y ma̠lakatuncúhuilh actzu̠ skata.

⁵⁸Xli̠hua̠k hua̠nti̠ xli̠talakapasni chu hua̠nti̠ xta̠lacatzuní̠n acxni̠ tacátzi̠lh lácua Quimpu̠chinacán xlakalhamani̠t y xma̠xqui̠ni̠t cha̠tum cskata xlacán taqui̠lakapaxiá̠lhnalh y acxtum tata̠pa̠xúhualh.

⁵⁹Li̠tzi̠má áncalh circuncidartlahuacán ámá skata chuná cumu lá xtali̠smani̠ni̠t judíos xtatlahuay xlakahuasán, y na̠chuná xtali̠ma̠pa̠cuhui̠putún cumu la̠ huanicán Zacarías porque cumu mat huá xtla̠t.

⁶⁰Pero xtzí chiné huá: —Tamá kahuasa nahuanicán Juan.

⁶¹Pero makapitzí̠n cristianos tahuánilh: —¿Túcu xlacata chuná nali̠ma̠pa̠cuhui̠ya minkahuasa, pus ni̠para cha̠tum mili̠talakapasni chuná huanicán?

⁶²Pero cumu Zacarías akata̠pa y ko̠ko xuani̠t caj tzúculh tamacahuaniy acxni̠ xtakalhasquimá̠nalh túcu xlá xli̠ma̠pa̠cuhui̠putún actzu̠ kahuasa.

⁶³Zacarías squilh pi̠tzu̠ páklha̠t la̠qui̠ antá natzoknún, y antá chiné tzóknulh: “Tamá kahuasa nalitapa̠cuhui̠y Juan.” Y xli̠pu̠tum cristianos hua̠nti̠ antá xtalayá̠nalh luu cacs talacáhua acxni̠ tacátzi̠lh pu̠tum hua̠ntu̠ xkantaxtuma.

⁶⁴Acxnitiyá a̠má quilhtamacú cá̠xlalh csi̠máka̠t Zacarías y tla̠n chuhui̠nampá y tzúculh lakachixcuhui̠y Dios.

⁶⁵Xli̠hua̠k cristianos hua̠nti̠ antá lacatzú xtahuilá̠nalh cacs xtali̠lacahuán porque ni̠ xtaakata̠ksa a̠má hua̠ntu̠ xqui̠taxtuma, y xli̠ca̠lanca nac a̠má xpu̠latama̠n Judea hua̠k xli̠chuhui̠nancán la̠ta lácu xlacachini̠t a̠má skata.

⁶⁶Pu̠tum hua̠nti̠ xtacatzi̠y lácu qui̠taxtuni̠t xtzucuy talacapa̠staca y chiné xtali̠chuhui̠nán: —¿Túcu cahuá nali̠taxtuy eé actzu̠ kahuasa? Huá chuná xtali̠huán porque xli̠ca̠na xtasiyuy lácu Quimpu̠chinacán csiculana̠tlahuama a̠má skata. Zacarías pa̠xcatcatzi̠niy hua̠ntu̠ tlahuani̠t Dios

⁶⁷Espíritu Santo akchipaniko̠lh xtalacapa̠stacni Zacarías hua̠nti̠ xtla̠t a̠má skata y chuná xlá tzúculh chuhui̠nán cumu lá Espíritu Santo xma̠lacpuhua̠ni̠ma, y chiné huá:

⁶⁸Cane̠cxnicahuá calakachixcuhuí̠calh Quimpu̠chinacán Dios hua̠nti̠ xma̠nhuá li̠pa̠huaná̠hu aquinín xalac Israel,porque chú xlá quinca̠ucxilhlacachini̠tán aquinín xcamaná̠n la̠qui̠ naquinca̠lakma̠xtuyá̠n.

⁶⁹Xlá niaj maka̠s aya amajá macamín cha̠tum luu tali̠pa̠hu chixcú hua̠nti̠ tla̠n naquinca̠ma̠kapu̠taxti̠yá̠n,a̠má chixcú hua̠nti̠ namín xli̠talakapasni nahuán rey David hua̠nti̠ na̠chuná scujnini̠t nac xlatáma̠t.

⁷⁰Pus hasta la̠ta maka̠sá quilhtamacú chuná tali̠chuhui̠nani̠ta̠ma̠ko̠lh profetas hua̠nti̠ xlá tica̠lácsacli la̠qui̠ naquinca̠huaniyá̠n,

⁷¹pi̠ xli̠ca̠na naquinca̠lakma̠xtuyá̠n nac xlaksti̠pa̠ncán hua̠nti̠ quinca̠si̠tzi̠niyá̠n,y xli̠pacs hua̠nti̠ ni̠ quinca̠ucxilhputuná̠n.

⁷²Pus la̠nchú Dios ma̠kantaxti̠ni̠t hua̠ntu̠ tíhuapi̠ juerza naca̠lakalhamán xalakmaká̠n quili̠talakapasnicán,y ni̠para maktum catipa̠tzánka̠lh pi̠ ca̠ta̠tlahuani̠t aktum talaca̠xlán.

⁷³Porque Dios tima̠lacnú̠nilh xamaká̠n quili̠talakapasnicán Abrahamhua̠ntu̠ la̠nchú juerza ma̠kantaxti̠ma.

⁷⁴Xlá tihuánilh Abraham pi̠ naquinca̠lakma̠xtuyá̠n aquinín judíos nac xlaksti̠pa̠ncán hua̠nti̠ quinca̠si̠tzi̠niyá̠n,la̠qui̠ chuná tla̠n xma̠n huá nacli̠macuaniyá̠hu y ni̠ti̠ catilacapuhuaníhu,

⁷⁵y na̠chuná la̠qui̠ cane̠cxnicahuá aksti̠tum nali̠latama̠yá̠hu xli̠ma̠peksí̠n,y chuná tla̠n nali̠macuaniyá̠hu xma̠nhuá Quimpu̠chinacán.

⁷⁶Chi̠nchú huix koxutá actzu̠ quinkahuasa, pímpa̠t li̠taxtuya lanca xprofeta Quintla̠ticán Dios,porque huix pu̠laniti̠lhaya nahuán a̠má Quimpu̠chinacán hua̠nti̠ namín la̠qui̠ huix naca̠xtlahuaniya xtiji.

⁷⁷Porque huix naca̠ma̠catzi̠ni̠ya hua̠nti̠ luu ca̠lacsacni̠t Diospi̠ lakcha̠ni̠ttá quilhtamacú acxni̠ naca̠ma̠tzanke̠nanicán xtala̠kalhi̠ncány la̠qui̠ chuná tla̠n natama̠akapu̠taxti̠y xli̠stacnicán.

⁷⁸Porque xli̠ca̠na Dios quinca̠pa̠xqui̠yá̠n y quinca̠lakalhamaná̠n,pus namacamina̠chá nac akapú̠n cha̠tum hua̠nti̠ li̠taxtuy cumu la̠ xtaxkáket chichiní hua̠nti̠ nama̠tzuqui̠y aktum xasa̠sti quilhtamacú nac quilatama̠tcán.

⁷⁹La̠qui̠ xli̠hua̠k hua̠nti̠ xtalaktzanka̠ta̠yani̠ttá,y hua̠nti̠ talamá̠nalh nac xaca̠pucsua,xlá naca̠ma̠lacatzuhui̠y antanícu huí taxkáket,y chuná xlá naquinca̠ma̠siyuniyá̠n a̠má tiji hua̠ntu̠ luu xli̠ca̠na xaaksti̠tum.

⁸⁰Kampá̠a quilhtamacú y a̠má kahuasa Juan la̠li̠huán xlacacatzi̠ma, cstacma xtiyatli̠hua y na̠chuná xtalacapa̠stacni. Acali̠stá̠n acxni̠ cstacni̠ttá xlá alh latama̠y nac aktum pu̠latama̠n huanicán desierto antanícu ni̠tu̠ staca y na̠ ni̠ti̠cu lama cristianos, y acxni̠ lákcha̠lh quilhtamacú xlá tzúculh ca̠ma̠kalhchuhui̠ni̠y cristianos xalac Israel.