Read Xasasti talacaxlan Hechos 14 Bible Online

Hechos 14 - Xasasti talacaxlan bible

Hechos 14

¹Nac Iconio Pablo y Bernabé tatánu̠lh nac xpu̠siculancán judíos y tzúculh ca̠ma̠kalhchuhui̠ni̠y cristianos. Cumu xlacán luu tancs la̠ta xtama̠lacapu̠tuncuhui̠y xtachuhuí̠n Jesús lhu̠hua cristianos hua̠nti̠ judíos xa̠hua hua̠nti̠ ni̠ judíos tali̠pá̠hualh.

²Pero makapitzí̠n judíos hua̠nti̠ ni̠ xtaca̠najlaputún hua̠ntu̠ xlacán xtali̠chuhui̠nán tzúculh tahuaniy a̠ma̠ko̠lh cristianos hua̠nti̠ ni̠ judíos xlacata pi̠ ni̠ cataca̠nájlalh hua̠ntu̠ Pablo xtali̠chuhui̠namá̠nalh.

³Pero ma̠squi ne̠cxnicú akatziyanca xca̠makxtekcán porque catu̠huá xca̠huanicán, xlacán juerza maka̠s tatamákxtekli nac Iconio y ni̠ xtape̠cuán xlacán xtali̠chuhui̠nán xtachuhuí̠n Dios antanícu luu ma̠rí xtzamacán porque xtacatzi̠y pi̠ Dios xca̠maktakalhma. Y Dios xca̠ma̠lulokniy hua̠ntu̠ xlacán xtali̠chuhui̠nán porque xca̠ma̠xqui̠y li̠tlihueke la̠qui̠ tla̠n natatlahuay laclanca li̠cá̠cni̠t tascújut.

⁴Nac a̠má ca̠chiquí̠n Iconio lakapu̠tiyú̠ xtahuilá̠nalh porque makapitzí̠n cristianos huá xtata̠ta̠yay judíos y makapitzí̠n xtata̠ta̠yay apóstoles.

⁵Maktum quilhtamacú a̠ma̠ko̠lh judíos chu xli̠hua̠k cristianos hua̠nti̠ ni̠ judíos luu lacxtum tali̠chuhuí̠nalh xlacata natata̠catzi̠y ma̠peksi̠naní̠n antá xalaní̠n xlacata pi̠ natapu̠tlakalé̠n y tla̠n nataliactalanchipay chíhuix.

⁶Pero acxni̠ Pablo y Bernabé tacátzi̠lh huata mejor tú tatláhualh tatzá̠lalh y táalh nac Listra xa̠hua nac Derbe xmunicipio Licaonia, xa̠hua nac lactzu̠ ca̠chiqui̠ní̠n hua̠ntu̠ antá lacatzuní̠n xtahuilá̠nalh.

⁷Antá xlacán lacaxtum taliakchuhuí̠nalh xtachuhuí̠n Jesús hua̠ntu̠ ma̠sta̠y laktáxtut. Akpaklhchipacán Pablo nac Listra

⁸Maktum quilhtamacú nac Listra Pablo xliakchuhui̠nama xtachuhuí̠n Jésús y antá culucs xuí cha̠tum chixcú hua̠nti̠ luu chunatuncán xlacachini̠t pi̠ ni̠lay xtla̠huán.

⁹Amá chixcú luu cuentaj xtlahuani̠t hua̠ntu̠ xli̠chuhui̠namá̠calh y Pablo úcxilhli pi̠ antá culucs xuí y na̠ úcxilhli pi̠ xkalhi̠y taca̠nájlat xlacata nama̠tla̠nti̠y.

¹⁰Pablo palha quilhánilh y chiné huánilh: —¡Huix cuanimá̠n, la̠li̠huán cata̠ya y catlá̠huanti! Amá chixcú tuncán suácaj tá̠yalh cumu la̠mpara ni̠tu̠ xlaniy y tzúculh tla̠huán.

¹¹Acxni̠ cristianos taúcxilhli hua̠ntu̠ xtlahuani̠t Pablo xlacán chiné palha tzúculh tahuán nac xatachuhuí̠n hua̠ntu̠ xtali̠chuhui̠nán: —¡La̠nchú tata̠ctani̠tanchi quidioscán hua̠nti̠ li̠pa̠huaná̠hu, pero huata xmacnicán na̠ luu xta̠chuná cumu la̠ quimacnicán!

¹²Uma̠kó̠lh cristianos xtalakachixcuhui̠y lhu̠hua tzincun hua̠nti̠ xtali̠macá̠n xdioscán, entonces tali̠má̠xtulh Bernabé cumu la̠ xdioscán Júpiter, y Pablo xtali̠ma̠xtuy cumu la̠ xdioscán Mercurio porque huá luu xakchuhui̠nán.

¹³Uma̠kó̠lh cristianos hua̠nti̠ chuná xtali̠pa̠huán u̠ma̠ko̠lh xtzincuncán, antá nac xquilhapá̠n ca̠chiquí̠n xyá chiqui antanícu xtalakachixcuhui̠nán, y a̠má xapuxcu xlakachixcuhui̠nacán pála ca̠lí̠milh li̠ca̠xtlahuá̠n xa̠hua hua̠cax, porque xli̠pu̠tum cristianos xtamakni̠putún a̠ma̠ko̠lh huá̠cax la̠qui̠ natali̠lakachixcuhui̠y Pablo y Bernabé.

¹⁴Pero acxni̠ a̠ma̠ko̠lh apóstoles tacátzi̠lh pi̠ huá xamá̠calh ca̠lakachixcuhui̠cán maktum la̠ta xti̠t tatláhualh clhaka̠tcán caj la̠ta tali̠sí̠tzi̠lh, la̠li̠huán talaksti̠pa̠tánu̠lh xli̠lhu̠hua cristianos y chiné tzúculh tahuaniy:

¹⁵—¡Xli̠hua̠k huixinín li̠huana̠ cakaxpáttit! ¿Túcu xpa̠lacata huixinín quila̠li̠pu̠lhca̠yá̠hu cumu la̠ Dios? Aquinín na̠ caj lacchixcuhuí̠n chuná cumu la̠ huixinín, y aquinín caj cmini̠tán ca̠huaniyá̠n xlacata pi̠ calakmakántit xli̠hua̠k mintasmani̠ncán hua̠ntu̠ tlahuayá̠tit porque ni̠tu̠ li̠macuán, y caj xma̠nhuá cali̠pa̠huántit a̠má cha̠stum Dios hua̠nti̠ ca̠ma̠lacatzuqui̠ni̠t akapú̠n, ca̠tiyatni xa̠hua pupunú y xli̠hua̠k hua̠ntu̠ anán uú nac ca̠quilhtamacú.

¹⁶La̠ta maka̠sá quilhtamacú a̠má hua̠nti̠ cha̠stum Dios lama ca̠má̠xqui̠lh quilhtamacú xlacata pi̠ xli̠hua̠k cristianos hua̠nti̠ ni̠ luu xtalakapasa catalatáma̠lh y catalakachixcúhui̠lh la̠ta túcu xlacán chuná xtalacpuhuaniy.

¹⁷Pero huata xlá ankalhí̠n ca̠li̠ma̠catzi̠ni̠pútulh pi̠ xlá Dios hua̠nti̠ luu tla̠n catzi̠y, porque huá quinca̠macaminiyá̠n si̠n y luu tla̠n quinca̠siculana̠tlahuaniyá̠n hua̠ntu̠ chaná̠hu y makalana̠naná̠hu la̠qui̠ nakalhi̠yá̠hu hua̠ntu̠ nali̠hua̠yaná̠hu y li̠pa̠xúhu nalatama̠yá̠hu.

¹⁸Pero ma̠squi Pablo y Bernabé chuná tali̠ma̠kalhchuhuí̠ni̠lh a̠ma̠ko̠lh cristianos takalá tama̠lactláhui̠lh xlacata pi̠ ni̠ catamákni̠lh a̠má toro la̠qui̠ naca̠li̠lakachixcuhui̠cán.

¹⁹Ni̠ li̠maka̠s quilhtamacú tachilh nac Listra makapitzí̠n judíos hua̠nti̠ xtamini̠tanchá nac Antioquía y nac Iconio y tzúculh tali̠ma̠kalhchuhui̠ni̠y cristianos xlacata pi̠ catatalakaspittá̠yalh y niaj catali̠pá̠hualh hua̠ntu̠ xli̠chuhui̠nán Pablo y catamákni̠lh. Ama̠ko̠lh cristianos tasi̠tzí̠nilh Pablo y taliactalanchípalh chíhuix; acxni̠ aya cacs táma̠lh Pablo xlacán talacpúhua pi̠ ma̠x aya xtamakni̠ni̠t tasakále̠lh hasta nac xquilhapá̠n ca̠chiquí̠n.

²⁰Pero acali̠stá̠n acxni̠ xlacán tzúculh tatamacxtumi̠y a̠ma̠ko̠lh cristianos hua̠nti̠ aya xtali̠pa̠huani̠t Jesús, Pablo lakasiyu tzúculh ta̠yay cumu la̠mpara ni̠tu̠ xlanini̠t y tanu̠pá nac ca̠chiquí̠n. Pero li̠cha̠lí ta̠táca̠xli Bernabé y táalh nac xaca̠chiquí̠n Derbe.

²¹Antá nac Derbe taliakchuhuí̠nalh xatlá̠n xtama̠catzi̠ní̠n Jesús hua̠ntu̠ ma̠sta̠y laktáxtut y luu lhu̠hua cristianos tali̠pá̠hualh Quimpu̠chinacán. Acali̠stá̠n chú acxni̠ antá tatlahuako̠lh xtascújut tataca̠xpá pi̠ antá tapu̠spitpá xtijicán antanícu xtamini̠tanchá nac Listra, Iconio y tacha̠mpá nac xaca̠chiquí̠n Antioquía.

²²Y nac a̠ma̠ko̠lh ca̠chiquí̠n hua̠nti̠ xtali̠pa̠huán Jesús xlacán xtama̠uxca̠ni̠y y xca̠ma̠xqui̠y li̠camama, xca̠huaniy xlacata pi̠ hua̠ntu̠ aksti̠tum catali̠pá̠hualh Quimpu̠chinacán Jesús ma̠squi lhu̠hua hua̠ntu̠ cataakspúlalh y hua̠ntu̠ xca̠li̠ma̠pa̠ti̠ní̠calh, porque xli̠hua̠k hua̠nti̠ aktum catzi̠y nalakma̠xtuy xli̠stacni nac xlacatí̠n Dios pus lhu̠hua hua̠ntu̠ ámaj li̠pa̠ti̠y uú nac ca̠quilhtamacú.

²³Nac akatunu u̠ma̠ko̠lh ca̠chiqui̠ní̠n xlacán talácsacli makapitzí̠n lakko̠lún hua̠nti̠ tlak xtamakaacchá̠n talacapa̠stacni la̠qui̠ huá naca̠puxcuniy cristianos hua̠nti̠ aya xtali̠pa̠huani̠t Jesús, y acxni̠ pu̠tum takalhxtekninko̠lh takalhtahuakánilh Dios xlacata pi̠ huá caca̠maktá̠yalh nac xtascujutcán hua̠ntu̠ xca̠ma̠cuentajli̠cani̠t u̠ma̠ko̠lh cristianos. Pablo y Bernabé tataspitparay nac Antioquía xmunicipio Siria

²⁴Acali̠stá̠n tati̠táxtulh nac xapu̠latama̠n Pisidia y tácha̠lh nac xapu̠latama̠n Panfilia.

²⁵Nac Perge tali̠chuhui̠nampá xtachuhuí̠n Dios y hasta acali̠stá̠n tácha̠lh nac Atalia.

²⁶Pero antá chú nac Atalia tatáju̠lh nac aktum barco y chuná tacha̠mpá nac Antioquía, antá nac eé ca̠chiquí̠n xca̠lacsacni̠t Dios xpa̠lacata pi̠ natataxtuy nataán nac xli̠hua̠k lactzu̠ ca̠chiqui̠ní̠n la̠qui̠ natali̠chuhui̠nán xli̠ma̠peksí̠n, pero chú aya xtataspitmá̠nalh porque aya xtama̠kantaxti̠ni̠t xli̠tascujutcán.

²⁷Acxni̠ chú tácha̠lh nac Antioquía tuncán tata̠tamacxtúmi̠lh a̠ma̠ko̠lh cristianos hua̠nti̠ antá xtali̠pa̠huán Quimpu̠chinacán Jesús y tali̠ta̠chuhui̠nanko̠lh la̠ta lácu Dios xca̠ma̠lakpali̠ni̠t xtalacapa̠stacnicán a̠ma̠ko̠lh cristianos hua̠nti̠ ni̠ judíos la̠qui̠ na̠chuná xlacán natali̠pa̠huán Jesús, y na̠ táhua la̠ta xlá xca̠makta̠yani̠t xli̠hua̠k antanícu taquí̠cha̠lh.

²⁸Juerza maka̠s quilhtamacú antá tatamákxtekli Pablo y Bernabé la̠qui̠ naca̠makta̠yay a̠ma̠ko̠lh ca̠najlaní̠n xalac Antioquía.