Read Xasasti talacaxlan 2 Timoteo 2 Bible Online

2 Timoteo 2 - Xasasti talacaxlan bible

2 Timoteo 2

¹Pero huix quinkahuasa Timoteo, huá cata̠ta̠yani tamá xli̠tlihueke Cristo la̠qui̠ chuná tancs nama̠kantaxti̠ya mintascújut.

²Hua̠ntu̠ huix kaxpatni̠ta pi̠ cca̠li̠ma̠kalhchuhui̠ni̠ni̠t lhu̠hua cristianos la̠ta lácu li̠huana̠ natali̠pa̠huán Cristo, pus na̠chuná huix caca̠li̠ma̠kalhchuhui̠ni a̠ma̠ko̠lh hua̠nti̠ luu laktlihuekén tali̠tasiyuy xtaca̠najlatcán, la̠qui̠ chuná xlacán na̠ natali̠ma̠kalhchuhui̠ni̠y xa̠makapitzí̠n cristianos.

³Huix hua̠k tla̠n catlahua y pa̠xuhua̠na̠ capa̠ti hua̠ntu̠ akspulayá̠n cumu la̠ cha̠tum sculujua xtropa Jesucristo.

⁴Acxni̠ cha̠tum tropa ma̠kantaxti̠ma xli̠tascújut hua̠ntu̠ lakaya̠huacani̠t, ni̠tu̠ tili̠scujparake̠y a̠túnuj tascújut huata caj xma̠nhuá li̠scuja hua̠ntu̠ li̠ma̠peksi̠cani̠t la̠qui̠ chuná namakapa̠xuhuay xpuxcu.

⁵Na̠chunali̠túm acxni̠ cha̠tum kama̠ná hua̠nti̠ la̠tlajama para xatícu a̠tzinú tlak tla̠n kama̠nán, xli̠ca̠na pi̠ ni̠ catima̠xquí̠calh xtrofeo para ni̠chuná nama̠kantaxti̠y la̠ta lácu xli̠kamá̠nat xuani̠t.

⁶Pus na̠chuná cama̠kantaxti mintascújut cumu la̠ a̠má cristiano hua̠nti̠ scujma y chana̠nama nac xca̠tuhuá̠n, tancs tlahuay xtascújut porque catzi̠y pí pu̠lh huá lakchá̠n nali̠hua̠yán hua̠ntu̠ antá namakalay.

⁷Xli̠hua̠k u̠má hua̠ntu̠ aquit cuanimá̠n, huix li̠huana̠ calacapá̠stacti lácu a̠tzinú nali̠macuaniyá̠n nac milatáma̠t, xa̠huachí Dios namakta̠yayá̠n la̠quí naakata̠ksa xli̠hua̠k hua̠ntu̠ huix catzi̠putuna.

⁸Xa̠huachí ne̠cxnicú tipa̠tzanka̠ya nali̠chuhui̠nana Jesucristo, pus huá u̠má tachuhuí̠n hua̠ntu̠ aquit cca̠li̠ma̠kalhchuhui̠ni̠y cristianos pi̠ Cristo huá xli̠talakapasni xuani̠t xamaká̠n kolutzí̠n rey David, pero cumu Xkahuasa Dios huá li̠lacastacuánalh nac ca̠li̠ní̠n, y para xlacán na̠ natali̠pa̠huán pus na̠ naca̠lakma̠xtuniy xli̠stacnicán.

⁹Xli̠ca̠na pi̠ caj xpa̠lacata u̠má xasa̠sti xtama̠catzi̠ní̠n lhu̠hua tapa̠tí̠n hua̠ntu̠ aquit cli̠pa̠ti̠ma y hasta caj huá xpa̠lacata ma̠squi quili̠macachi̠cani̠t cadena cumu la̠ cha̠tum makni̠ná; pero ma̠squi aquit quinchi̠cani̠t a̠má li̠pa̠xúhu xtama̠catzi̠ní̠n Dios ni̠tu̠ chi̠má̠calh.

¹⁰Huá xpa̠lacata aquit cli̠ta̠yanima ma̠squi lhu̠hua hua̠ntu̠ cpa̠ti̠ma nac quilatáma̠t la̠qui̠ chuná nacca̠li̠makta̠yay a̠ma̠ko̠lh hua̠nti̠ Dios ca̠lacsacni̠t y xlacán na̠ natakalhi̠y laktáxtut chu a̠má li̠pa̠xúhu latáma̠t hua̠ntu̠ ne̠cxnicú laksputa para natali̠pa̠huán Quimpu̠chinacán Cristo Jesús.

¹¹Luu xtalulóktat a̠má takalhchuhuí̠n hua̠ntu̠ chiné huan:Para aquinín tancs catzi̠yá̠hu pi̠ aya ta̠ni̠ni̠táhu Cristo,pus na̠ quili̠ca̠najlatcán pi̠ acxtum nata̠latama̠ya̠chá̠hu nac akapú̠n.

¹²Para la̠nchú lhu̠hua hua̠ntu̠ pa̠ti̠ma̠náhu caj xpa̠lacata,na̠ tancs cacatzí̠hu pi̠ lacxtum nata̠ma̠peksi̠naná̠hu.Pero para aquinín ni̠ li̠ta̠yayá̠hu nac xlacati̠ncán cristianos pi̠ lakapasá̠hu,pus na̠ ni̠para huá catili̠tá̠yalh para quinca̠lakapasá̠n.

¹³Ma̠squi acatunu aquinín ni̠ luu xli̠ca̠na aksti̠tum li̠pa̠huaná̠hu, pero xlá chunatiyá quinca̠lakalhamaná̠n.Porque ni̠lay caj naaksani̠nán y ni̠ nama̠kantaxti̠putún hua̠ntu̠ aya quinca̠li̠ta̠yanini̠tán. Pablo huaniy Timoteo pi̠ tancs cama̠kantáxti̠lh a̠má tascújut hua̠ntu̠ Dios li̠lacsacni̠t

¹⁴Huix li̠huana̠ caca̠ma̠lacapa̠stacni cristianos y caca̠li̠ma̠peksi nac xlacatí̠n Dios pi̠ niaj cataliaklhu̠huá̠tnalh a̠má tachuhuí̠n hua̠ntu̠ ni̠tu̠ li̠macuán, porque xli̠ca̠na pi̠ taaklhú̠hui̠t ni̠tu̠ li̠macuán, huata caj tali̠laclata̠yay xli̠hua̠k hua̠nti̠ ca̠kalhakaxmata.

¹⁵Huix juerza catlahuani li̠huana̠ nama̠kantaxti̠ya mintascújut hua̠ntu̠ Dios li̠lacsacni̠tán la̠qui̠ chuná nali̠taxtuya cha̠tum tla̠n xtasa̠cua hua̠nti̠ aksti̠tum lama y ni̠tu̠ catili̠ma̠ma̠xaní̠canti porque tancs ma̠siyúpa̠t a̠má xatalulóktat xtachuhuí̠n Dios hua̠ntu̠ ma̠sta̠y laktáxtut.

¹⁶Ne̠cxnicú tili̠chuhui̠nana tamá talacapa̠stacni hua̠ntu̠ uú xala ca̠quilhtamacú porque ni̠tu̠ li̠macuán xa̠huachí caj hua̠k xtalacapa̠stacnicán cristianos, y xli̠hua̠k hua̠nti̠ chuná tali̠kalhchuhui̠nán li̠huaca tali̠laktzanka̠ta̠yay nac tala̠kalhí̠n.

¹⁷Y a̠má li̠xcájnit tachuhuí̠n hua̠ntu̠ tama̠siyuy la̠li̠huán talakapuntumi̠y xta̠chuná cumu la̠ surumpiyu tajátat, huatiyá u̠má hua̠ntu̠ tali̠laktzanka̠ta̠yani̠t Himeneo xa̠hua Fileto.

¹⁸Cumu niaj chuná taca̠najlay xtalulóktat Dios xlacán tahuán pi̠ acxni̠ nani̠yá̠hu niaj catilacastacuanáhu nac ca̠li̠ní̠n porque la̠ quili̠lacastacuanatcán xuani̠t aya kantaxtuni̠t nac quilatama̠tcán, chuná taliakchuhui̠nampu̠lay y lhu̠hua cristianos akatiyuj ca̠tlahuanima xtaca̠najlatcán.

¹⁹Pero aquinín stalanca catzi̠yá̠hu pi̠ Dios li̠huana̠ ca̠xuili̠ni̠t xtalacapa̠stacni hua̠ntu̠ ni̠para cha̠tum tícu catilacxtláhualh y antá chiné tatzoktahuilani̠t: “Mimpu̠chinacán hua̠k ca̠lakapasa hua̠nti̠ tatapeksi̠niy”, y lacatum chiné huamparay: “Y xli̠hua̠k hua̠nti̠ tali̠pa̠huán Quimpu̠chinacán Cristo catalakmákalh xli̠hua̠k hua̠ntu̠ li̠xcájnit tala̠kalhí̠n.”

²⁰Cumu la̠ huixinín catzi̠yá̠tit pi̠ antanícu tla̠na huilácalh nac aktum lanca chiqui lhu̠hua jalá̠n kalhi̠cán, makapitzí̠n pula̠tu xla oro, vasos xla plata, y na̠ kalhi̠cán makapitzí̠n xla páklha̠t chu xla li̠lhtámat tíyat; a̠máko̠lh hua̠ntu̠ xla oro o plata caj xma̠n ca̠pu̠hua̠yancán acxni̠ tlahuacán lanca pa̠xcua o caj li̠cá̠cni̠t li̠kalhi̠cán, y makapitzí̠n jalá̠n hua̠ntu̠ xla quihui chu xla li̠lhtámat caj chunatá li̠maclacasquincán.

²¹Pus xli̠hua̠k a̠ma̠ko̠lh cristianos hua̠nti̠ talakmakán hua̠ntu̠ li̠xcájnit tala̠kalhí̠n nac xlatama̠tcán tali̠taxtuy cumu la̠ vaso chu pula̠tu xla plata y xla oro hua̠ntu̠ ca̠li̠lakachixcuhui̠cán Dios. Para tícu luu aksti̠tum nalatama̠y Dios nama̠cuentajli̠y xtascújut.

²²Huix catza̠lamákanti xli̠hua̠k hua̠ntu̠ ni̠ ca̠mini̠niy tatlahuay lakkahuasán y ni̠chuná caca̠macasta̠la, huata caj xma̠nhuá aksti̠tum cali̠latapa mintaca̠nájlat la̠ta li̠pa̠huana Dios, la̠ta ca̠pa̠xqui̠ya minta̠cristianos, y aksti̠tum calatapa nac xlaksti̠pa̠ncán hua̠nti̠ xli̠hua̠k xli̠tlihueke xnacujcán taquilhcha̠niy Quimpu̠chinacán.

²³Huix calakmákanti xli̠hua̠k hua̠ntu̠ caj xtalacapa̠stacnicán cristianos hua̠nti̠ caj tali̠ma̠aklhu̠hui̠namputún ma̠squi tahuán pi̠ huá xaxli̠ca̠na tla̠n talacapa̠stacni, porque huix aya catzi̠ya pi̠ ni̠tu̠ li̠macuán huata caj antá tali̠ma̠tzuqui̠y tasi̠tzi.

²⁴Porque cha̠tum cristiano hua̠nti̠ aya macama̠xqui̠ni̠t xlatáma̠t Quimpu̠chinacán ni̠para tzinú mini̠niy caj xma̠n natatlanca̠ni̠ta̠kchokoy, huata xlá mini̠niy pi̠ la̠tachá tícuya̠ cristianos tla̠n caca̠catzí̠nilh, cakálhi̠lh li̠skalala la̠qui̠ naca̠ma̠kalhchuhui̠ni̠y cristianos, y ma̠squi túcu ni̠tlá̠n natlahuanicán xlá ni̠ pála xli̠sí̠tzi̠t o xli̠aklhu̠huá̠tnat.

²⁵Y para tícu catzi̠y pi̠ tlahuama hua̠ntu̠ ni̠tlá̠n tala̠kalhí̠n, xlá mini̠niy pi̠ lacati̠tum cama̠kalhchuhuí̠ni̠lh, chicá para xamaktum Dios nalakalhamán y chuná natalakapasa hua̠ntu̠ xlá kalhi̠y xtalulóktat,

²⁶y chuná natatza̠laniy akskahuiní hua̠nti̠ xtachí̠n ca̠li̠lama y ca̠ma̠tlahui̠ma hua̠ntu̠ xlá lacasquín natatlahuay.