Read Xasasti talacaxlan Apocalipsis 7 Bible Online

Apocalipsis 7 - Xasasti talacaxlan bible

Apocalipsis 7

¹Acali̠stá̠n cucxilhpá pi̠ lacta̠tij xtayá̠nalh kalhata̠ti ángeles nac xca̠tanke̠nu̠ní̠n ca̠quilhtamacú, xlacán huá xtama̠chokomá̠nalh u̠n la̠qui̠ ni̠ nau̠nún nac xokspú̠n ca̠tiyatni, ni̠para nac xokspú̠n pupunú, y ni̠para akatum quihui natasaka̠li̠y.

²Acali̠stá̠n cucxilhpá cha̠tum ángel xmima̠chá antanícu pulha̠chá chichiní, xchipani̠t csello lanca tali̠pa̠hu Dios hua̠nti̠ lama xastacná. Xli̠hua̠k xliakapixtlihueke chiné ca̠quilhánilh a̠ma̠ko̠lh kalhata̠ti ángeles hua̠nti̠ xca̠ma̠xqui̠cani̠t li̠ma̠peksí̠n xa̠hua li̠tlihueke la̠qui̠ natama̠sputu̠nún nac ca̠quilhtamacú xa̠hua nac pupunú:

³—¡Cakalhí̠tit tzinú, ni̠najtu̠ caca̠tlahuanítit xli̠hua̠k hua̠ntu̠ huí nac ca̠tiyatni, ni̠para nac pupunú, ni̠para quihuí̠n hua̠ntu̠ tayá̠nalh nac ca̠tiyatni, porque hasta pu̠lh nactica̠mu̠lhca̠huili̠yá̠hu csello Dios xli̠hua̠k a̠ma̠ko̠lh hua̠nti̠ xli̠ca̠na tali̠pa̠huán y tamacama̠xqui̠ni̠t xlatama̠tcán!

⁴Caj li̠puntzú ckáxmatli acxni̠ huáncalh nícu kalhali̠t hua̠nti̠ ca̠mu̠xti̠sellartlahuácalh: aktum cientu a̠ti̠puxamata̠ti mi̠lh cristianos la̠ta nac xli̠ca̠lanca cxapu̠latama̠n Israel.

⁵Ca̠pu̠tlekécalh akcu̠tiy mi̠lh cristianos xli̠talakapasni Judá, akcu̠tiy mi̠lh xli̠talakapasni Rubén, akcu̠tiy mi̠lh xli̠talakapasni Gad,

⁶akcu̠tiy mi̠lh xli̠talakapasni Aser, akcu̠tiy mi̠lh xli̠talakapasni Neftalí, akcu̠tiy mi̠lh xli̠talakapasni Manasés,

⁷akcu̠tiy mi̠lh xli̠talakapasni Simeón, akcu̠tiy mi̠lh xli̠talakapasni Leví, akcu̠tiy mi̠lh xli̠talakapasni Isacar,

⁸akcu̠tiy mi̠lh xli̠talakapasni Zabulón, akcu̠tiy mi̠lh xli̠talakapasni José, y akcu̠tiy mi̠lh xli̠talakapasni Benjamín. Lhu̠hua cristianos hua̠nti̠ tali̠lhaka̠nani̠t snapapa lháka̠t

⁹Acxni̠ ckaxmatko̠lh nícu kalhali̠t hua̠nti̠ ca̠mu̠xti̠sellartlahuácalh, caj li̠puntzú cúcxilhli pi̠ pu̠tum xtayá̠nalh lhu̠hua cristianos hasta ni̠lay xca̠pu̠tlekeko̠cán la̠ta xli̠lhu̠hua xuani̠t, xli̠ca̠lanca ca̠quilhtamacú xtamini̠tanchá, y ti̠pa̠katzi xtachuhui̠ncán la̠ta anán nac ca̠quilhtamacú, xlacán antá pu̠tum xtayá̠nalh nac xlacatí̠n a̠má lanca xlactáhui̠lh ma̠peksi̠ná antanícu xuí Dios y nac xlacatí̠n xBorrego, pu̠tum u̠ma̠ko̠lh cristianos hua̠k xtali̠lhaka̠nani̠t xalaksnapapa clhaka̠tcán y xtachipani̠t nac xmacancán xapalhma mó̠ko̠t.

¹⁰Xli̠hua̠k xliakapixtlihuekecán chiné xtaquilhuamá̠nalh:¡Xli̠ca̠na pi̠ caj xma̠n huá tamá lanca tali̠pa̠hu quiDioscán quinca̠lakma̠xtuni̠tánhua̠nti̠ huí nac lanca xama̠peksi̠ná lactáhui̠lh,xa̠hua xborrego hua̠nti̠ xokó̠nulh xpa̠lacata quintala̠kalhi̠ncán!

¹¹Xli̠hua̠k a̠ma̠ko̠lh ángeles hua̠nti̠ xtastilini̠t a̠má lanca lactáhui̠lh, xa̠hua pu̠xamata̠ti lakko̠lún, chu a̠ma̠ko̠lh kalhata̠ti ángeles hua̠nti̠ xtatasiyuy cumu la̠ takalhí̠n, pu̠tum taláca̠lh antanícu xuí a̠má lanca xlactáhui̠lh ma̠peksi̠ná, tatatzokóstalh, talakataquilhpú̠talh, y hasta taqui̠talacátalh nac tíyat la̠ta talakachixcúhui̠lh Dios.

¹²Y pu̠tum chiné xtahuán:¡Xma̠n me̠cstu mini̠niyá̠n nacma̠lanqui̠yá̠hu mintacuhuiní y nacca̠ca̠cni̠naniyá̠ncaj xpa̠lacata lanca mili̠skalala, mili̠ma̠peksí̠n y mili̠tlihueke;na̠chuná xma̠n huix mini̠niyá̠n nacca̠pa̠xcatcatzi̠niyá̠n y naclakachixcuhui̠yá̠n cane̠cxnicahuá quilhtamacú!¡Chuná calalh, amén!

¹³Cha̠tum ko̠lutzí̠n quilaktalacatzúhui̠lh y chiné quinkalhásquilh: —¿Pi̠ catzi̠ya huix tícu tama̠ko̠lh cristianos hua̠nti̠ tali̠lhaka̠nani̠t hua̠k xalaksnapapán clhaka̠tcán, y nícu tamini̠tanchá?

¹⁴Aquit chiné ckálhti̠lh: —Aquit ni̠ ccatzi̠y, xma̠n huix catzi̠ya. Xlá chiné quihuanipá: —Huatuní̠n u̠ma̠ko̠lh hua̠nti̠ la̠n tatipa̠tí̠nalh caj xpa̠lacata xtachuhuí̠n Dios, pero tata̠yánilh porque huatuní̠n u̠ma̠ko̠lh hua̠nti̠ tali̠chéke̠lh clhaka̠tcán y tali̠ma̠snapapuáni̠lh a̠má xkalhni hua̠ntu̠ stajmákalh xBorrego Dios.

¹⁵Huá xpa̠lacata tali̠yá̠nalh nac xlacatí̠n lanca xlactáhui̠lh Dios,xliankalhi̠na quilhtamacú ca̠tzi̠sní xa̠hua ca̠cuhuiní tali̠scujmá̠nalh nac lanca xpu̠siculan y talakachixcuhui̠má̠nalh.Y Quimpu̠chinacán hua̠nti̠ huí nac a̠má lanca xlactáhui̠lhxliankalhi̠ná ca̠maktakalhmaj nahuán.

¹⁶Xli̠hua̠k u̠ma̠ko̠lh cristianos niaj catitapá̠ti̠lh tatzincsni y takalhpu̠ti,y niajpara chichiní catica̠ma̠akchíchi̠lh,niajpara catitapá̠ti̠lh lhca̠cná.

¹⁷Porque tamá xBorrego hua̠nti̠ yá nac xpa̠xtú̠n a̠má lanca xlactáhui̠lh Dios,xlá naca̠maktakalha xta̠chuná cumu la̠ tlahuay cha̠tum xmaktakalhná borregos,naca̠pu̠lalé̠n nac musni antanícu taxtuma̠chi chúchut hua̠ntu̠ ma̠sta̠y xaxli̠ca̠na latáma̠t la̠qui̠ la̠n natakotnún,y ma̠squi lhu̠hua hua̠ntu̠ xtali̠li̠puhuamá̠nalh, Dios naca̠ma̠koxumixiy y naca̠lacaxacay la̠ta xtalakaxtajmá̠nalh xpa̠lacata hua̠ntu̠ xtali̠tasamá̠nalh.