Read Xitsonga Genesis 1 Bible Online

Genesis 1 - Xitsonga bible

Genesis 1

¹Eku sunguleni Xikwembu xi tumbuluxile tilo ni misava.

²Misava a yi nga ri na xivumbeko, a yi nga ri na nchumu, kambe munyama a wu funengeta xibakabaka; Moya wa Xikwembu a wu hungela ehenhla ka mati.

³Kutani Xikwembu xi ku: “Ku vonakala a ku ve kona!” Ku vonakala ku va kona!

⁴Kutani Xikwembu xi vona leswaku ku vonakala ku sasekile. Xikwembu xi hambanyisa ku vonakala ni munyama.

⁵Xikwembu xi thya ku vonakala nhlekanhi, ni munyama xi ku, i vusiku. Kutani ku va madyambu, ku va nimixo, ri va siku ro rhanga.

⁶Kutani Xikwembu xi ku: “Mpfhuka a wu ve kona exikarhi ka mati, wu hambanyisa mati ni mati.”

⁷Xikwembu xi endla mpfhuka, xi hambanyisa mati ya le hansi ka mpfhuka, ni mati ya le henhla ka mpfhuka. Kutani swi va tano.

⁸Xikwembu xi thya mpfhuka tilo. Kutani ku va madyambu, ku va nimixo, ri va siku ra vumbirhi.

⁹Kutani Xikwembu xi ku: “Mati lama nga ehansi ka tilo a ma hlengeletane exivandleni xi ri xin'we, ku va ku humelela laha ku omeke.” Kutani swi va tano.

¹⁰Xikwembu xi thya laha ku omeke misava, ni ku hlengeletiwa ka mati, xi ku i malwandle. Xikwembu xi vona leswaku swi sasekile.

¹¹Xikwembu xi ku: “Misava a yi mirise byanyi, ni matsavu lama vekaka mbewu, ni mirhi leyi nga ni mihandzu, leyi tswalaka vana lava nga ni timbewu ta vona, hi tinxaka ta yona ehenhla ka misava.” Kutani swi va tano.

¹²Misava yi mirisa mabyanyi, ni matsavu lama vekaka timbewu hi tinxaka ta wona, ni mirhi leyi tswalaka mihandzu leyi nga ni timbewu ta yona eka yona hi tinxaka ta yona. Xikwembu xi vona leswaku swi sasekile.

¹³Kutani ku va madyambu, ku va nimixo, ri va siku ra vunharhu.

¹⁴Kutani Xikwembu xi ku: “Swo voninga a swi ve kona empfhukeni wa matilo, swi hambanyisa nhlekanhi ni vusiku, swi va swikombiso swa tinguva, ni masiku ni malembe,

¹⁵swi tirha ku voninga empfhukeni wa matilo, swi voningela emisaveni.” Kutani swi va tano.

¹⁶Xikwembu xi endla swo voninga swimbirhi leswikulu; xo voninga lexikulu ku fuma nhlekanhi, ni xo voninga lexitsongo ku fuma vusiku, xi endla na tona tinyeleti.

¹⁷Xikwembu xi swi veka empfhukeni wa matilo, swi ta voninga emisaveni,

¹⁸ni ku fuma nhlekanhi ni vusiku, ni ku hambanyisa ku vonakala ni munyama; Xikwembu xi vona leswaku swi sasekile.

¹⁹Kutani ku va madyambu, ku va nimixo, ri va siku ra vumune.

²⁰Kutani Xikwembu xi ku: “Mati a ma tale hi vunyingi bya leswi hanyaka, ni tinyanyana a ti hahe ehenhla ka misava, emahlweni ka mpfhuka wa matilo.”

²¹Xikwembu xi endla swiharhi leswikulu swa mati, ni leswi hanyaka hinkwaswo leswi fambaka leswi talaka ematini, hi tinxaka ta swona, ni leswi hahaka hinkwaswo hi tinxaka ta swona; Xikwembu xi vona leswaku swi sasekile.

²²Xikwembu xi swi katekisa, xi ku: “Tswalanani, mi andza, mi tata mati ya malwandle; ni tinyanyana a ti andze ehenhla ka misava.”

²³Kutani ku va madyambu, ku va nimixo; ri va siku ra vuntlhanu.

²⁴Kutani Xikwembu xi ku: “Misava a yi humese leswo hanya hi tinxaka ta swona, swifuwo, ni swikokovi, ni swiharhi swa misava hi tinxaka ta swona.” Kutani swi va tano.

²⁵Xikwembu xi endla swiharhi swa misava hi tinxaka ta swona ni swifuwo hi tinxaka ta swona, ni leswi kokovaka emisaveni hi tinxaka ta swona. Xikwembu xi vona leswaku swi sasekile.

²⁶Kutani Xikwembu xi ku: “A hi endleni munhu hi xifaniso xa hina a ta fana na hina; a ta fuma tinhlampfi ta lwandle, ni tinyanyana ta tilo, ni swifuwo, ni misava hinkwayo, ni swikokovi hinkwaswo leswi kokovaka emisaveni.”

²⁷Xikwembu xi endla munhu hi xifaniso xa xona. Xi n'wi endla a fana ni Xikwembu; xi endla wanuna ni wansati.

²⁸Xikwembu xi va katekisa. Xi ku eka vona: “Tswalanani, mi andza, mi tata misava mi yi fuma, mi fuma ni tinhlampfi ta lwandle, ni tinyanyana ta tilo, ni swin'wana hinkwaswo leswi hanyaka emisaveni.”

²⁹Xikwembu xi ku: “Maswivo, ndza mi nyika matsavu hinkwawo lama vekaka mbewu, lama nga ehenhla ka misava hinkwayo, ni murhi wun'wana ni wun'wana lowu nga ni mihandzu leyi vekaka mbewu swi va swakudya swa n'wina.

³⁰Loko swi ri swiharhi hinkwaswo swa misava, ni tinyanyana hinkwato ta tilo, ni swilo swin'wana hinkwaswo leswi fambaka emisaveni, leswi nga ni ku hefemula loku hanyaka ka swona, ndzi swi nyikile byanyi byin'wana ni byin'wana bya rihlaza, swi va swakudya swa swona.” Kutani swi va tano.

³¹Xikwembu xi languta hinkwaswo leswi xi swi endleke, kutani maswivo, a swi ri swinene ngopfu. Kutani ku va madyambu, ku va nimixo, ri va siku ra ntlhanu na rin'we.