Read Xitsonga Genesis 14 Bible Online

Genesis 14 - Xitsonga bible

Genesis 14

¹Enkarhini wa Amirafele, hosi ya Xinara, na Ariyoko, hosi ya Elasara, na Kedoro-Lawomere, hosi ya Elamu, na Tidala, hosi ya va Goyimi,

²va pfukela ku lwa na Bera, hosi ya Sodoma, na Birixa, hosi ya Gomora, na Xinabu, hosi ya Adama, na Xemebere, hosi ya Seboyimi, ni hosi ya Bela (wu nga Sowara).

³Hinkwavo lavo va hlangana erivaleni ra Sidimi (ri nga Lwandle-ra-ku-fa).

⁴A va fumiwile hi Kedoro-Lawomere hi malembe ya khume na mambirhi, kutani hi lembe ra khume na manharhu va sungula ku tiarisa.

⁵Kutani hi lembe ra khume na mune, ku ta Kedoro-Lawomere, ni tihosi leti ngi ti ri na yena, va hlula Varefayimi eAxiteroti-Karnayimi, ni va Zuzimi eHamu, ni va Emimi eXave-Kiriyatayimi,

⁶ni Vahori entshaveni ya vona ya Seyira, ku ya fika eEliparani, emaaveni ya mananga.

⁷Kutani va tlhela va ta exihlobyeni xa Eni-Mixipati, a nga Kadexe, va hlula tiko hinkwaro ra Vaamaleke, na vona Vaamori lava akeke eHasasoni-Tamara.

⁸Kutani hosi ya Sodoma, ni hosi ya Gomora, ni hosi ya Adama, ni hosi ya Seboyimi, ni hosi ya Bela (a nga Sowara), ti huma ti ya hlangana ku lwa na vona erivaleni ra Sidimi,

⁹vona va nga Kedoro-Lawomere, hosi ya Elamu, na Tidala, hosi ya va Goyimi, na Amirafele hosi ya Xinara, na Ariyoko, hosi ya Elasara: ti ri tihosi ta mune leti lwaka ni tihosi ta ntlhanu.

¹⁰Kasi rivala ra Sidimi a ri tele swihlovo swa nhlaka; kutani tihosi ta Sodoma na Gomora ti tsutsuma, ti wela kona, kambe leti poneke ti tsutsumela entshaveni.

¹¹Kutani va teka vukosi hinkwabyo bya Sodoma, ni bya Gomora, ni swakudya hinkwaswo swa kona, va famba naswo.

¹²Va teka na yena Lota, n'wana wa makwa Abrama, ni swa yena hinkwaswo, hikuva a akile Sodoma.

¹³Kutani un'wanyana wa vatsutsumi a ta ambela Abrama wa Muheveru, loyi i ngi a tshame mikuhlwini ya Mamre, wa Muamori, makwa Exikolo ni wa Anere, hikuva a va ri vanakulobye va Abrama.

¹⁴Kuteloko Abrama a twa leswaku n'wana wa yena u khomiwile, a hlengeleta vanhu va yena va tinhenha, va nga va tswariwa endlwini, va ri 318, kutani a landzelela tihosi ku fika eDani.

¹⁵Kutani a pambula malandza ya yena ku ya lwa na tona nivusiku, a ti hlula, a ti tsutsumisa ku fikela eHoba, eximatsini xa Damaska.

¹⁶Kutani a vuyisa swifuwo hinkwaswo; a vuyisa na Lota makwavo, ni swa yena, ni vavasati ni tiko.

¹⁷Kambe hosi ya Sodoma yi suka ku ya hlangana na Abrama loko a vuya eku hluleni ka Kedoro-Lawomere, ni tihosi leti ngi ti ri na yena erivaleni ra Xave, ri nga rivala ra Hosi.

¹⁸Kutani Melkisedeke, hosi ya Salema, a ta ni vuswa ni vhinyo; a a ri muprista wa Xikwembu xa le henhlahenhla.

¹⁹Kutani a katekisa Abrama, a ku: “A ku katekisiwe Abrama hi Xikwembu xa le henhlahenhla, n'wini wa tilo ni misava;

²⁰a ku katekisiwe Xikwembu xa le henhlahenhla lexi nyiketeke valala va wena evokweni ra wena.” Kutani Abrama a n'wi pambulela ku avanyisa ka khume ka hinkwaswo.

²¹Kutani hosi ya Sodoma yi byela Abrama, yi ku: “Ndzi nyike tinhloko, wena u teka vukosi.”

²²Kambe Abrama a hlamula hosi ya Sodoma, a ku: “Ndzi tlakuse voko eka Yehovha, Xikwembu xa le henhlahenhla, n'wini wa tilo ni misava, ndzi ri:

²³Hambi ma ri marinya ku fika eka ringole ra ntanghu, ndzi nga ka ndzi nga teki nchumu xa leswi nga swa wena! U nga tivula, u ku: ‘Mina, ndzi fuwisile Abrama!’

²⁴A ndzi tilaveli nchumu, loko ti nga ri timbuva ta majaha, ni swo pambulela lava nga famba na mina, va nga Anere, na Exikolo, na Mamre; vona va ta teka ku pambuleriwa ka vona.”