Read Xitsonga Genesis 17 Bible Online

Genesis 17 - Xitsonga bible

Genesis 17

¹Kuteloko Abrama a hanyile malembe ya 99, Yehovha a tikombisa eka Abrama, a ku eka yena: “Hi mina Xikwembu xa matimba hinkwawo.

²Famba emahlweni ka mina, u va munhu lowo lulama; kutani ndzi ta tiyisa ntwanano exikarhi ka mina na wena, ndzi va ndzi ku andzisa hi ku hundzisisa.”

³Kavaloko Abrama a wela emombyeni wa yena, kutani Xikwembu xi vulavula na yena, xi ku:

⁴“Loko ndzi ri mina, waswivo, ntwanano wa mina na wena, hi wolowo: U ta va tata wa matiko lamanyingi.

⁵A va nga ha ku vuli hi vito ra Abrama, kambe vito ra wena u ta va Abrahama, hikuva ndzi ku endle tata wa matiko lamanyingi.

⁶Kutani ndzi ta ku andzisela vana ngopfungopfu, ndzi endla matiko ha wena, ni tihosi ti ta huma eka wena.

⁷“Kutani ndzi ta tiyisa ntwanano wa mina exikarhi ka mina na wena, ni vatukulu va wena endzhaku ka wena, etinxakeni ta vona, wu va ntwanano lowu nga heriki, ndzi ta va Xikwembu xa wena ni xa vatukulu va wena endzhaku ka wena.

⁸Ndzi ta ku nyika, na vona vatukulu va wena endzhaku ka wena, tiko leri u nga ka rona u ri muluveri, ri nga tiko ra Kanana hinkwaro, va ri fuma hilaha ku nga heriki, kutani ndzi va Xikwembu xa vona.”

⁹Xikwembu xi engeta xi ku eka Abrahama: “Loko u ri wena, u ta hlayisa ntwanano wa mina, wena ni vatukulu va wena, etinxakeni ta vona.

¹⁰Ntwanano lowu mi nga ta wu hlayisa lowu nga xikarhi ka mina na wena ni vatukulu va wena, hi wolowo: Wanuna un'wana ni un'wana exikarhi ka n'wina u ta yimba.

¹¹Mi ta yimbisa nyama ya n'wina, wu va mfungho wa ntwanano exikarhi ka mina na n'wina.

¹²Wanuna un'wana ni un'wana wa masiku ya ntlhanu na manharhu u ta yimbisiwa exikarhi ka n'wina etinxakeni ta n'wina, hambi a ri loyi a tswariweke endlwini, hambi a ri la xaviweke hi mali eka valuveri lava nga riki va rixaka ra wena.

¹³A a yimbisiwe hambi a ri loyi a tswariweke endlwini, hambi a ri loyi a xaviweke hi mali ya wena, kutani ntwanano wa mina wu ta va enyameni ya n'wina wu ri ntwanano lowu nga heriki.

¹⁴Kutani rikhuna, wanuna la nga yimbisiwangiki enyameni ya yena, munhu loyi, u ta susiwa exikarhi ka tiko ra yena, hikuva a tlule ntwanano wa mina.”

¹⁵Kutani Xikwembu xi ku eka Abrahama: “Loko a ri Sarayi, nsati wa wena, a wu nga ha tshami u n'wi vula hi vito ra Sarayi, kambe vito ra yena u ta va Sara.

¹⁶Ndzi ta n'wi katekisa, ndzi va ndzi ku nyika ha yena n'wana wa wanuna. Ndzi ta n'wi katekisa, a va mana wa matiko; ni tihosi ta matiko ti ta huma eka yena.”

¹⁷Kutani Abrahama a wa hi mombo, a hleka, a ku embilwini ya yena: “Xana munhu wa dzana ra malembe a nga velekeriwa n'wana-ke? Na yena Sara a nga tiva ku veleka a ri wansati wa makume ya ntlhanu na mune wa malembe?”

¹⁸Kambe Abrahama a ku eka Xikwembu: “I ngi loko Iximaele a hanya emahlweni ka wena!”

¹⁹Kutani Xikwembu xi ku: “E-e, kambe Sara, nsati wa wena, u ta ku velekela n'wana wa wanuna, u ta n'wi thya vito ra Isaka; ndzi ta tiyisa ntwanano wa mina na yena, wu va ntwanano lowu nga ka wu nga heleli vatukulu va yena.

²⁰Loko a ri Iximaele, ndzi ku yingisile: Waswivo, ndzi ta n'wi katekisa, ndzi n'wi nyika vana, ndzi n'wi andzisa ngopfungopfu; u ta veleka tihosi ta khume na timbirhi, ndzi ta endla ha yena tiko lerikulukumba.

²¹Kambe ndzi ta tiyisa ntwanano wa mina na Isaka, loyi Sara a nga ta ku velekela enkarhini lowu, haxawu.”

²²Kuteloko Xikwembu xi hetile ku vulavula na Abrahama, xi n'wi sukela, xi tlhandlukela ehenhla.

²³Kavaloko Abrahama a teka Iximaele, n'wana wa yena, ni vavanuna hinkwavo lava tswariweke endlwini ya yena, ni hinkwavo lava a nga va xava hi mali, vanhu hinkwavo va xinuna va yindlu ya Abrahama, a yimbisa nyama ya vona hi siku rolero, hilaha Xikwembu xi n'wi leriseke hakona.

²⁴Abrahama a a ri ni malembe ya 99, siku a yimbisiwaka enyameni ya yena;

²⁵na Iximaele, n'wana wa yena, a a ri ni malembe ya khume na manharhu, siku a yimbisiwaka enyameni ya yena.

²⁶Hi siku rolero, Abrahama a yimbisiwa, na yena Iximaele, n'wana wa yena;

²⁷ni vavanuna hinkwavo va yindlu ya yena, hambi va ri va tswariwa endlwini, hambi va ri lava xaviweke hi mali eka valuveri, va yimbisiwa swin'we na yena.