Read Xitsonga Genesis 18 Bible Online

Genesis 18 - Xitsonga bible

Genesis 18

¹Yehovha a tikombisa eka Abrahama emikuhlwini ya Mamre, a tshamile enyangweni ya ntsonga wa yena ninhlekanhi lowukulu.

²A tlakusa mahlo, a languta, kutani a vona vavanuna vanharhu va yimile ekusuhi na yena; kuteloko a va vonile, a suka enyangweni ya ntsonga, a tsutsuma ku ya hlangana na vona, kutani a khinsama ehansi,

³a ku: “Hosi, kungakuloko ndzi kume tintswalo emahlweni ka wena, ndza ku khongela leswaku u nga hundzeli nandza wa wena.

⁴Ha nga lava matinyana, mi hlamba milenge, mi wisa ehansi ka murhi.

⁵Ndzi ta ya lava xipandzwa xa xinkwa, mi tiyisa matimba; hi kona mi nga ta khaluta, hikuva mi hambukele swona eka nandza wa n'wina.” Kutani va ku: “Hi swona, endla hilaha u nga vula.”

⁶Abrahama a hatlisa a nghena entsongeni eka Sara, a ku eka yena: “Hatlisa u teka mimpimo minharhu ya mapa, u kanyanga, u endla swinkwa.”

⁷Kutani Abrahama a tsutsumela etihon'wini, a hlawula rhole ra nyama ya ku olova ni ya ku nandziha, a nyika nandza leswaku a hatlisa a ri lunghisa.

⁸Kutani a teka mafurha, ni ntswamba, ni rhole leri lunghisiweke, a swi veka emahlweni ka vona; kambe yena a yimile ekusuhi na vona ehansi ka murhi, kutani va dya.

⁹Kutani va ku eka yena: “U kwihi Sara, nsati wa wena?” A ku: “Hi loyi, entsongeni.”

¹⁰Kutani un'wana a ku: “Ndzi ta tlhela ndzi vuya eka wena haxawu hakunene, kutani vona, Sara, nsati wa wena, u ta va ni n'wana.” Kasi Sara a a ri karhi a yingisisa enyangweni ya ntsonga, endzhaku ka yena.

¹¹Kambe Abrahama na Sara a va dyuhele, a va hanyile ngopfu, yena Sara a a hundzile nkarhi wa ku veleka.

¹²Kutani Sara a hleka embilwini ya yena, a ku: “Ndzi nga ha kuma ku tsaka ndzi ri xikoxa, kasi n'wini wa mina u dyuhele na yena!”

¹³Kutani Yehovha a ku eka Abrahama: “Xana Sara u hlekela yini loko a ku: ‘Xana ndzi nga kumisa ku yini n'wana ndzi ri xikoxa?’

¹⁴Xana yi kona mhaka leyi nga hlulaka Yehovha? Enguveni leyi, ndzi ta vuya eka wena haxawu, kutani Sara u ta va a kume n'wana.”

¹⁵Kambe Sara a kaneta, a ku: “A ndzi hlekanga,” hikuva a a chava. Kutani yena a ku: “Wa hemba, hikuva u hlekile.”

¹⁶Kavaloko vavanuna lavo va suka va famba, va kongoma etlhelo ra Sodoma, Abrahama a famba na vona ku va heleketa.

¹⁷Kutani Yehovha a ku: “Xana ndzi nga fihlela Abrahama leswi ndzi nga ta swi endla?

¹⁸Hikuva kunene Abrahama u ta va tiko lerikulu, lera matimba; ha yena ku ta katekisiwa matiko hinkwawo ya misava.

¹⁹Hikuva ndzi n'wi hlawurile leswaku a lerisa vana va yena ni yindlu ya yena endzhaku ka yena, ku hlayisa ndlela ya Yehovha, ni ku endla leswo lulama leswinene, Yehovha a kondza a humesela Abrahama leswi a n'wi tshembiseke swona.”

²⁰Kutani Yehovha a ku: “Leswi huwa leyi humaka eSodoma na Gomora yi kuleke, ni ku homboloka ka vona ku kuleke ngopfu,

²¹ndzi ta rhelela ndzi ya vona xana va endlile kunene hilaha huwa yi ndzi fikeleke hakona: loko swi nga ri tano, ndzi ta swi tiva.”

²²Kutani vavanuna lavo va famba va kongoma eSodoma, kambe Abrahama a yima emahlweni ka Yehovha.

²³Kambe Abrahama a tshinela, a ku: “Xana kunene u ta lovisa la lulameke swin'we ni la hombolokeke?

²⁴Kumbe xana va kona lava lulameke va ntlhanu wa makume emutini? Xana u nga wu lovisa kunene, u nga ka u nga wu rivaleri hikwalaho ka lava ntlhanu wa makume lava nga kumeka eka wona xana?

²⁵A swi ve kule na wena ku lovisa la lulameke swin'we ni la hombolokeke, swi va leswaku la lulameke a endliwa leswo nge u hombolokile! A swi ve kule na wena! Loyi a avanyisaka misava hinkwayo, a nga ka a nga avanyisi hi ku lulama xana?”

²⁶Yehovha a ku: “Kungakuloko ndzi kuma eSodoma vanhu va ntlhanu wa makume lava lulameke exikarhi ka muti, ndzi ta rivalela muti hinkwawo hikwalaho ka vona.”

²⁷Abrahama a tlhela a ku: “Waswivo, ndzi tiyisile mbilu, ndzi vulavula ni Hosi, mina ndzi nga ntshuri ni nkuma!

²⁸Kumbe eka lava ntlhanu wa makume lava lulameke, ku ta pfumaleka va ntlhanu; xana u nga herisa muti hinkwawo hikwalaho ka vanhu lava ntlhanu?” Kutani a ku: “A ndzi nga wu herisi loko ndzi va kuma va ri mune wa makume na ntlhanu lava lulameke.”

²⁹Abrahama a engeta a vulavula, a ku: “Kumbe va ta kumeka va ri mune wa makume ntsena.” Kutani a ku: “Ndzi nga ka ndzi nga swi endli hikwalaho ka lava mune wa makume.”

³⁰Kutani a ku: “Hosi yi nga tshuki yi holova loko ndzi vulavula: Kumbe va ta kumeka va ri makume manharhu ntsena?” Kutani a ku: “Ndzi nga ka ndzi nga swi endli loko ndzi va kuma va ri makume manharhu kona.”

³¹Kutani a ku: “Waswivo, ndzi tiyisile mbilu ku vulavula ni Hosi: kumbe va nga kumeka va ri makume mambirhi ntsena?” Kutani a ku: “Hikwalaho ka lava makume mambirhi ndzi nga ka ndzi nga wu herisi.”

³²A engeta a ku: “Hosi yi nga karihi loko ndza ha vulavula kambe: Kumbe va nga kumiwa va ri khume ntsena?” Kutani a ku: “Ndzi nga ka ndzi nga wu herisi hikwalaho ka lava khume.”

³³Kavaloko Yehovha a suka loko a hetile ku vulavula na Abrahama, Abrahama a tlhelela ekaya.