Read Xitsonga Genesis 22 Bible Online

Genesis 22 - Xitsonga bible

Genesis 22

¹Endzhaku ka timhaka teto, Xikwembu xi ringa Abrahama, xi ku eka yena: “Abrahama!” A hlamula a ku: “Hi mina loyi!”

²Kutani xi ku: “Teka n'wanaku, loyi a nga swakwe eka wena, loyi u n'wi rhandzaka, a nga Isaka, u ya etikweni ra Moriya, u n'wi tlhavela kona egandzelweni, entshaveni yin'wana leyi ndzi nga ta ku kombisa yona.”

³Kutani Abrahama a vindzuka, a boha mbhongolo ya yena, a teka malandza mambirhi, na Isaka n'wanakwe; a pandzela ni tihunyi ta gandzelo, kutani a suka a ya exivandleni lexi Xikwembu xi n'wi kombiseke xona.

⁴Hi siku ra vunharhu, Abrahama a tlakusa mahlo, a vona xivandla xexo a ha ri kule.

⁵Kutani Abrahama a ku eka malandza ya yena: “Tshamani la, n'wina ni mbhongolo; mina ni jaha, hi ta ya kwale hi gandzela kona, kutani hi ta tlhela hi mi kuma.”

⁶Kutani Abrahama a teka tihunyi ta gandzelo, a rhwexa Isaka, n'wana wa yena, a teka evokweni ra yena ndzilo ni mukwana, kutani va famba havambirhi swin'we.

⁷Kavaloko Isaka a vutisa Abrahama, tata wa yena, a ku: “Tatana!” Yena a ku: “Hi mina loyi, n'wananga.” Isaka a ku: “Ndzilo hi lowu ni tihunyi hi leti, kambe nyimpfu yi kwihi leyo tlhavela?”

⁸Abrahama a ku: “N'wananga, Xikwembu xi ta vona ku tilavela nyimpfu ya mhamba.” Kutani a va ri karhi va famba havambirhi swin'we.

⁹Va fika exivandleni lexi Xikwembu xi n'wi byeleke xona. Abrahama a aka gandzelo, a lunghisa tihunyi, a boha Isaka, n'wana wa yena, a n'wi tlhandleka egandzelweni, ehenhla ka tihunyi.

¹⁰Kutani Abrahama a tshambuluta voko, a teka mukwana a ku a tlhava n'wanakwe.

¹¹Kavaloko ntsumi ya Yehovha yi n'wi vitana yi ri etilweni, yi ku: “Abrahama, Abrahama!” Yena a ku: “Hi mina loyi!”

¹²Kutani yi ku: “U nga yisi voko ra wena eka n'wana, u nga n'wi endli nchumu; hikuva sweswi, ndza swi tiva leswaku u chava Xikwembu, ni leswaku a u ndzi alelanga n'wanaku, loyi a nga swakwe.”

¹³Abrahama a tlakusa mahlo, a languta, a vona khuna ri ri ndzhaku ka yena, ri phasiwile exihlahlaneni hi timhondzo; Abrahama a ya teka khuna, a ri tlhavela magandzelo ematshan'weni ya n'wanakwe.

¹⁴Kutani Abrahama a thya ndhawu leyi vito ra Yehova-yire (hileswaku Yehovha u ta swi vona); hilaha va nga te ni namuntlha: Swi ta vonaka entshaveni ya Yehovha.

¹⁵Ntsumi ya Yehovha yi tlhela yi vitana Abrahama yi ri etilweni,

¹⁶yi ku: “Ndzi hlambanyile ha mina, ku vula Yehovha, ndzi ri: ‘Leswi u endliseke sweswo, u nga ndzi alelanga n'wana wa wena, loyi a nga swakwe,

¹⁷ndzi ta ku katekisa kunene, ndzi andzisa vatukulu va wena ngopfungopfu, va ta kotisa tinyeleti ta le tilweni, ni sava ra le ribuwini ra lwandle, kambe rixaka ra wena ri ta fuma nyangwa ya valala va rona.

¹⁸Kutani matiko hinkwawo ya misava ma ta tikhensa hi rixaka ra wena, hikuva u yingisile rito ra mina.’ ”

¹⁹Abrahama a tlhelela eka malandza ya yena; kutani va pfuka va famba swin'we eBerexeba. Kutani Abrahama a tshama kona eBerexeba.

²⁰Endzhaku ka timhaka teto, va ta ambela Abrahama, va ku: “Waswivo, Milika na yena, u velekele Nahoro, makwenu, vana;

²¹a ri Usi, lowa hosi, na Buzi, ndzisana, na Kemuwele, tata wa Aramu,

²²na Kesede, na Hazo, na Pilidaxi, na Yidilafu, na Betuwele.

²³Betuwele u veleke Rhaveka. Milika u velekele Nahoro, makwa wa Abrahama, vana lava ntlhanu na vanharhu.

²⁴Nkatikulobye wa yena, loyi va nge i Rhewuma, na yena u veleke Tebaka, na Gahamu, na Tahaxi, na Maaka.”