Read Xitsonga Genesis 24 Bible Online

Genesis 24 - Xitsonga bible

Genesis 24

¹Abrahama a a dyuhele, a talele hi masiku; kambe Yehovha a a katekisile Abrahama eswilweni hinkwaswo.

²Kavaloko Abrahama a byela nandza wa yena lonkulu wa yindlu ya yena, loyi a nga mulanguteri wa swilo hinkwaswo swa yena, a ku eka yena: “Wa nga vekela xandla xa wena ehansi ka ndzhumbi wa mina,

³ndzi ku hlambanyisa ha Yehovha Xikwembu xa tilo, ni Xikwembu xa misava, leswaku u nga ka u nga tekeli n'wana wa mina nsati exikarhi ka vanhwana va Vakanana, volavo ndzi akeke exikarhi ka vona;

⁴kambe u ta ya etikweni ra mina, ni laha ndzi tswariweke kona, u ya tekela n'wananga Isaka, nsati kona.”

⁵Nandza a ku eka yena: “Kumbe xana wansati a nga ka a nga pfumeri ku ndzi landzela etikweni leri; xana ndzi ta tlherisela n'wana wa wena etikweni leri u humeke eka rona xana?”

⁶Abrahama a ku eka yena: “U nga tshuki u tlherisela kona n'wananga.

⁷Yehovha Xikwembu xa tilo, la ndzi humeseke endlwini ya tatana, ni le tikweni ra matswalo ya mina, a va a ndzi byela hi ku hlambanya, a ku: ‘Ndzi ta nyika vatukulu va wena tiko leri’, yeloyi u ta rhumela ntsumi ya yena emahlweni ka wena, u ta tekela n'wananga nsati kona.

⁸Kungakuloko wansati a nga swi rhandzi ku ku landzela, hi kona u nga ta tshunxiwa eku hlambanyeni ka wena emahlweni ka mina; ntsena, u nga ka u nga tlheriseli kona n'wananga.”

⁹Kutani nandza a vekela xandla xa yena ehansi ka ndzhumbi wa Abrahama, n'wini wa yena, a n'wi hlambanyela mhaka leyi.

¹⁰Kutani nandza a teka tikamela ta khume, exikarhi ka tikamela ta n'wini wa yena, a tifambela; hikuva swa hosi ya yena hinkwaswo a swi ri emandleni ya yena. Kutani a suka a ya eMesopotamiya, emutini wa Nahoro.

¹¹Kutani a khinsamisa tikamela ehandle ka muti, ekusuhi ni xihlovo xa mati, hi nkarhi wa madyambu, enkarhini lowu ku humaka vavasati lava yaka eku keni ka mati.

¹²Kutani a ku: “Yehovha Xikwembu xa n'wini wanga, Abrahama, ndzi hlanganise namuntlha ni loyi ndzi n'wi lavaka, u endla hi tintswalo eka n'wini wa mina, Abrahama.

¹³Waswivo, ndzi ta yima ekusuhi ni xihlovo xa mati enkarhini lowu vanhwana va vanhu va muti va humaka ha wona ku ya eku keni ka mati;

¹⁴u nge nhwanyana loyi ndzi nga ta ku eka yena: ‘Wa nga korhamisa khuwana ra wena ndzi nwa’, yena a ku eka mina: ‘Nwana, ndzi ta nwisa ni tikamela ta wena’, a a ve yena yeloyi u nga hlawulela nandza wa wena, Isaka; hi kona ndzi nga ta vonisisa leswaku u endla hi tintswalo eka n'wini wa mina.”

¹⁵Kakuloko a nga si heta ku vulavula, ku huma Rhaveka a rhwele khuwana ekhatleni ra yena. A a tswariwile hi Betuwele, n'wana Milika, nkata Nahoro, makwa Abrahama.

¹⁶Nhwanyana loyi, a a ri lowo saseka ngopfu loko a voniwa, a a ri wanhwana la nga siki tiviwa hi wanuna. A rhelela exihlobyeni, a tata khuwana ra yena, a vuya a tlhandluka.

¹⁷Kambe nandza a tsutsuma, a hlangana na yena, a ku eka yena: “Wa nga ndzi pfumelela ndzi nwa matinyana ya khuwana ra wena.”

¹⁸Yena a ku: “Nwana, hosi yanga.” A hatlisa, a korhamisa khuwana evokweni ra yena, a n'wi nwisa.

¹⁹Kuteloko a hetile ku n'wi nwisa, a ku: “Ndzi ta kelela ni tikamela ta wena, ti nwa ti ko ti kolwa.”

²⁰Kutani a hatlisa a chulula khuwana ra yena exitsengeleni, a tlhela a tsutsumela exihlobyeni ku ka mati, a kela tikamela ta yena hinkwato.

²¹Kutani wanuna yeloyi a n'wi langutisa hi ku hlamala, a nga vuli nchumu, a tivutisa xana Yehovha u katekisile ndlela ya yena, kumbe a swi nga ri swona.

²²Kuteloko tikamela ti hetile ku nwa, wanuna loyi, a teka xingwavila xa nsuku xa hafu ya xikele, ni masindza mambirhi ya khume ra tixikele ta nsuku, a n'wi vehela wona emavokweni.

²³Kutani a ku eka yena: “U n'wana mani? Wa nga ndzi byela. Xana ndhawu yi kona endlwini ya tata wa wena laha ndzi nga etlelaka kona?”

²⁴Yena a ku: “Ndzi n'wana Betuwele, n'wana Milika, loyi a nga n'wi velekela Nahoro.”

²⁵A engeta a ku: “Ekaya ku ni byanyi byo oma ni swakudya swo tala swa swifuwo na yona ndhawu laha u nga etlelaka kona.”

²⁶Kutani wanuna loyi a korhama a khinsama emahlweni ka Yehovha a ku:

²⁷“A ku khensiwe Yehovha Xikwembu xa n'wini wa mina Abrahama, loyi a nga rhutelangiki ku hlayisela n'wini wa mina tintswalo ta yena, ni ku tshembeka ka yena. Na mina, Yehovha u ndzi fambisile endleleni ya mina, ekaya ka vamakwavo va n'wini wa mina.”

²⁸Kutani lo wanhwana a tsutsuma, a ya amba endlwini ya mana wakwe timhaka teto.

²⁹Rhaveka a a ri ni makwavo, lo va nge i Labani; kutani Labani a tsutsuma a ya eka wanuna loyi, ehandle, kusuhi ni xihlovo.

³⁰Kuteloko a vonile xingwavila ni masindza emavokweni ya makwavo, ni loko a twa marito ya Rhaveka makwavo la nga te: “Wanuna loyi, u ndzi byele sweswo,” a suka, a ya eka nuna yeloyi; kutani a n'wi vona a yime ekusuhi ni tikamela exihlobyeni.

³¹A ku eka yena: “Tana, wena la nga katekisiwa hi Yehovha! U yimela yini la handle kasi ndzi lunghisile yindlu ni ndhawu ya tikamela?”

³²Kutani nuna loyi a fika endlwini, va tshunxa tikamela, va ti nyika byanyi byo oma ni swakudya swa swifuwo; ku nehiwa ni mati ku hlamba milenge ya yena, ni milenge ya vanhu lava i ngi a ri na vona.

³³Kutani swakudya swi vekiwa emahlweni ka yena, kambe yena a ku: “Ndzi nga ka ndzi nga dyi ndzi nga si vula mhaka ya mina.” Labani a ku: “Vulavula.”

³⁴Kutani a ku: “Mina ndzi nandza wa Abrahama.

³⁵Yehovha u katekisile ngopfu n'wini wa mina, la nga hundzuka munhu wa matimba; u n'wi nyikile swifuwo leswitsongo ni leswikulu ni mali yo basa ni nsuku, ni makhumbi ya xinuna ni ya xisati, ni tikamela ni timbhongolo.

³⁶Na yena Sara, nsati wa n'wini wa mina, kuteloko a dyuhele, u velekele n'wini wanga n'wana wa wanuna, loyi a nga n'wi nyika hinkwaswo leswi nga swa yena.

³⁷Kavaloko n'wini wa mina a ndzi hlambanyisa, a ku: ‘U nga tshuki u tekela n'wana wa mina nsati exikarhi ka vanhwana va Vakanana, volavo ndzi akeke etikweni ra vona;

³⁸kambe u ta ya endlwini ya tatana, ni le rixakeni ra mina, u tekela n'wananga nsati kona.’

³⁹Kutani ndzi ku eka n'wini wanga: ‘Kumbe xana wansati a nga ka a nga pfumeri ku ta na mina.’

⁴⁰Kutani a ku eka mina: ‘Yehovha, yeloyi ndzi fambaka emahlweni ka yena, u ta rhumela eka wena ntsumi ya yena, u ta katekisa ndlela ya wena, u ta tekela n'wananga nsati wa ka rikwerhu, ni wa yindlu ya tatana.

⁴¹Kutakuloko u va u yile eka rixaka ra mina, u ta tshunxiwa emahlweni ka mina eku hlambanyeni kuloko; kutani kungakuloko va nga ku nyiki yena, u ta va u tshunxiwa emahlweni ka mina eku hlambanyeni kuloko.’

⁴²“Hi kona ndzi fikeke namuntlha exihlobyeni ndzi ku: ‘Yehovha, Xikwembu xa n'wini wanga Abrahama, kungakuloko u katekisa ndlela leyi ndzi nga na yona,

⁴³vona, ndzi ta yima ekusuhi ni xihlovo xa mati; a ku endleke leswaku nhwanyana loyi a nga ta huma ku ta ka mati, loyi ndzi nga ta ku eka yena: “Wa nga ndzi ha ndzi nwa matinyana ya khuwana ra wena,”

⁴⁴kutani a nga ta ku eka mina: “Nwana-ke, ndzi ta nwisa ni tikamela ta wena,” a a ve yena yeloyi Yehovha a hlawuleleke n'wana wa n'wini wanga.’

⁴⁵Kasi kavaloko ndzi nga si heta ku vulavula embilwini ya mina, maswivo, ku huma Rhaveka, a ri ni khuwana ekhatleni ra yena, a rhelela exihlobyeni, a ka mati. Kutani ndzi ku eka yena: ‘Wa nga ndzi ha ndzi nwa.’

⁴⁶Kavaloko a hatlisa a voyeka khuwana ra yena leri ngi a ri rhwele, a ku eka mina: ‘Nwana, kambe ndzi ta nwisa ni tikamela ta wena.’ Ndzi nwile, yena a nwisa ni tikamela.

⁴⁷Ndzi n'wi vutisisa, ndzi ku: ‘U n'wana mani?’ Kutani a ku: ‘Ndzi n'wana Betuwele, n'wana Nahoro, loyi Milika a nga n'wi velekela.’ Kavaloko ndzi nghenisa xingwavila enhompfini ya yena, ni masindza emavokweni ya yena.

⁴⁸Kutani ndzi korhama, ndzi khinsama emahlweni ka Yehovha, ndzi khensa Yehovha, Xikwembu xa n'wini wa mina Abrahama, leswi a nga ndzi fambisa endleleni leyo tshembeka, ndzi ta tekela n'wana wa n'wini wanga n'wana wa makwavo.

⁴⁹Sweswi, kungakuloko mi rhandza ku endlela n'wini wanga hi tintswalo ni ku dzuneka, ndzi byeleni; kambe loko mi nga swi rhandzi, ndzi byeleni, ndzi tiva ku kongoma ra xinene kumbe ra ximatsi.”

⁵⁰Labani na Betuwele va hlamula, va ku: “Mhaka leyi, yi huma eka Yehovha; hi nga tsandzeka ku ku hlamula swo biha kumbe swo saseka.

⁵¹Rhaveka hi loyi, emahlweni ka wena, n'wi teke u famba na yena, a va nsati wa n'wana wa n'wini wa wena, hilaha Yehovha a nga vula hakona.”

⁵²Kuteloko nandza wa Abrahama a twe marito walawo, a khinsamela ehansi emahlweni ka Yehovha.

⁵³Kutani nandza a humesa xuma xa silivhere ni xa nsuku, ni tinguvu, a nyika Rhaveka; ni makwavo wa yena, ni mana wa yena, a va nyika xuma xa risima.

⁵⁴Kavaloko va dya va nwa, yena ni vanhu lava i ngi a ri na vona, kutani va ya etlela. Loko ri xa, va pfuka, kutani nandza a ku: “Ndzi tlheriseleni eka n'wini wa mina.”

⁵⁵Kambe makwavo ni mana wa yena va ku: “I ngi nhwanyana a ha xwa na hina masikwanyana, hambi ma ri khume; endzhaku u ta famba.”

⁵⁶Yena a ku eka vona: “Mi nga ndzi hlweriseni, leswi Yehovha a katekiseke pfhumba ra mina ndzi tlheriseni, ndzi muka eka n'wini wa mina.”

⁵⁷Kutani va ku: “A hi vitaneni wanhwana, hi vutisa ku hlamula ka yena.”

⁵⁸Va vitana Rhaveka, va ku eka yena: “Xana u ta famba ni munhu loyi?” Yena a ku: “Ndzi ta ya.”

⁵⁹Va tshika Rhaveka, makwavo wa vona, a famba ni muan'wisi wa yena, ni nandza wa Abrahama, ni vanhu vakwe.

⁶⁰Kutani va katekisa Rhaveka va ku eka yena: “Wena, makwerhu, u ve mana wa madzana ya ntsanda vahlayi, ni vatukulu va wena a va fuwe nyangwa ya lava nga ta va venga.”

⁶¹Kavaloko Rhaveka a pfuka ni malandza ya yena ya vavanhwana, va khandziya tikamela, va landzela nuna loyi; sweswo, lo wa nandza a teka Rhaveka, a famba.

⁶²Kambe Isaka a a vuyile ekaya, a suke exihlobyeni xa Berilahayi-Royi, kasi a a akile etikweni ra le dzongeni.

⁶³Kutani Isaka a a humile emasin'wini, hi nkarhi wa madyambu, a ya tiyingisela; kakuloko a tlakusa mahlo, a languta, a tshuka a vona tikamela ti ri karhi ti ta.

⁶⁴Kutani Rhaveka a tlakusa mahlo a vona Isaka, kutani a jitama ekameleni.

⁶⁵Kutani a ku eka lowa nandza: “I mani nuna loyi a fambaka emasin'wini a ta hlangana na hina?” Nandza a ku: “I n'wini wanga.” Kavaloko a teka xisirhelelo xa yena a tifunengeta hi xona.

⁶⁶Kutani nandza a ambela Isaka timhaka hinkwato leti a nga ti endla.

⁶⁷Isaka a nghenisa Rhaveka entsongeni wa Sara, mana wa yena; kutani a n'wi teka, a va nsati wa yena, a n'wi rhandza. Isaka a chaveleriwa sweswo hi leswi ngi a ferile hi mana wakwe.