Read Xitsonga Genesis 29 Bible Online

Genesis 29 - Xitsonga bible

Genesis 29

¹Kavaloko Yakobo a suka, a kongoma tiko ra vanhu va le vuxeni.

²Kutani a languta a vona xihlovo emasin'wini; a vona ni mitlhambi minharhu ya tinyimpfu yi vundzile ekusuhi ka xona, hikuva mitlhambi a yi nwisiwa exihlobyeni xexo; kambe ribye leri sivaka nomu wa xihlovo a ri kurile.

³Kuteloko mitlhambi hinkwayo yi hlengeletane kona, a va vumbuluxa ribye va ri susa enon'wini wa xihlovo, va nwisa mitlhambi, endzhaku va tlhela va veka ribye enon'wini wa xihlovo endhawini ya rona.

⁴Yakobo a ku eka varisi: “Vamakwerhu, mi huma kwihi?” Va hlamula, va ku: “Hi huma eHarana.”

⁵A ku eka vona: “Xana mi tiva Labani, n'wana Nahoro?” Va ku: “Ha n'wi tiva.”

⁶A ku eka vona: “Xana u tsakile xana?” Va hlamula va ku eka yena: “Wa ha tsakile, kambe Rahele, n'wana wa yena, hi loyi a taka ni tinyimpfu.”

⁷Kutani a ku: “Maswivo, wa ha ri nhlekanhi lowukulu! A wu si va nkarhi wa ku hlengeleta swifuwo; nwisani swifuwana, swi tlhela swi ya eku dyeni.”

⁸Kutani va ku: “A hi swi koti loko mitlhambi hinkwayo yi nga si hlengeletiwa; kavaloko ribye ri susiwa enon'wini wa xihlovo, hi tiva ku nwisa swifuwana.”

⁹Kakuloko a ha vulavula na vona, Rahele a ta ni swifuwana swa tata wa yena, hikuva a a ri yena la risaka.

¹⁰Kuteloko Yakobo a vona Rahele, n'wana Labani, makwavo wa mana wa yena, ni swifuwana swa Labani, makwavo wa mana wa yena, a tshinela a susa ribye enon'wini wa xihlovo, a nwisa swifuwana swa Labani, makwavo wa mana wa yena.

¹¹Kutani Yakobo a ntswontswa Rahele, a tlakusa rito, a rila.

¹²Yakobo a tivisa Rahele leswaku a a ri makwavo wa tata wa yena, ni n'wana Rhaveka; kavaloko yena a tsutsuma, a ya ambela tata wa yena.

¹³Kuteloko Labani a twa mahungu ya Yakobo, n'wana wa makwavo, a tsutsuma, a ya hlangana na yena a n'wi singarhela, a n'wi ntswontswa, a n'wi yisa endlwini ya yena. Kavaloko Yakobo a ambela Labani timhaka teto hinkwato.

¹⁴Kutani Labani a ku eka yena: “Kunene, u marhambu ya mina, ni nyama ya mina!” Kutani Yakobo a tshama na yena n'hweti hinkwayo.

¹⁵Kavaloko Labani a ku eka Yakobo: “Xana leswi u nga makwerhu, u ta ndzi tirhela ntsena xana? Wa nga ndzi byela leswaku xana hakelo ya wena yi ta va yini?”

¹⁶Kasi Labani a a ri ni vana vambirhi va vanhwana; vito ra lowa hosi a a ri Leya, ni vito ra lowa ndzisana a a ri Rahele.

¹⁷Leya a a ri ni mahlo ya tingana, kambe Rahele a a yimekile, a sasekile, a voniseka.

¹⁸Yakobo a a rhandza Rahele, a ku: “Ndzi ta ku tirhela hi malembe ya ntlhanu na mambirhi, u ta ndzi nyika Rahele, n'wana wa wena lowa ndzisana.”

¹⁹Labani a hlamula, a ku: “Hi swona loko ndzi ku nyika yena, ku tlurisa loko ngi ndzi n'wi nyike nuna un'wana. Tshama eka mina.”

²⁰Kutani Yakobo a tirhela Rahele hi malembe ya ntlhanu na mambirhi; ma va eka yena masiku ma nga ri mangani, hikuva a a n'wi rhandza.

²¹Kutani Yakobo a ku eka Labani: “Ndzi he nsati wa mina, hikuva nkarhi wa mina wu herile, ndzi tiva ku ya eka yena.”

²²Kutani Labani a rhamba vanhu hinkwavo va muti, a va endlela nkhuvo.

²³Kuteloko ma ri madyambu, a teka Leya, n'wana wa yena, a n'wi neha eka Yakobo, kutani Yakobo a ya eka yena.

²⁴Labani a nyika Leya, n'wanakwe, Zilipa, nandza wa yena, leswaku a n'wi tirhela.

²⁵Kuteloko byi xile, Yakobo a vona leswaku i Leya. A ku eka Labani: “U ndzi endlile yini? Xana a hi yena Rahele loyi ndzi nga n'wi tirhela eka wena xana? U ndzi kanganyisele yini?”

²⁶Labani a ku: “A va endlisi sweswo laha eka rikwerhu leswaku ndzisana yi rhangela lowa hosi yi tekiwa.

²⁷Heta vhiki leri ra yena, kutani hi ta ku nyika ni lowun'wana, u engeta u ndzi tirhela kambe malembe man'wana ya ntlhanu na mambirhi.”

²⁸Yakobo a endlisa sweswo, a heta vhiki ra Leya; kutani Labani a n'wi nyika Rahele, n'wanakwe, leswaku a va nsati wa yena.

²⁹Kambe Labani a nyika Rahele, n'wanakwe, Biliha, nandza wa yena, ku n'wi tirhela.

³⁰Kutani Yakobo a ya na kona ka Rahele, kambe a a rhandza Rahele ku tlula Leya; kutani a tirhela Labani hi malembe man'wana ya ntlhanu na mambirhi.

³¹Yehovha a vona leswaku Leya a a vengiwa, kutani a n'wi pfulela mbeleko; Rahele, yena, a a ri mhika.

³²Leya a tika nyimba, a veleka n'wana wa wanuna, a n'wi thya vito ra Rhuveni (vonani n'wana), hikuva a a ku: “Yehovha u vone ku soriwa ka mina, kambe sweswi nuna wa mina u ta ndzi rhandza.”

³³A engeta a xurha nyimba, a veleka n'wana wa wanuna, a ku: “Yehovha u swi yingisile leswaku ndza vengiwa, u engete a ndzi nyika na yena loyi.” A n'wi thya vito ra Simiyoni (ku yingisa).

³⁴A tlhela a xurha nyimba, a veleka n'wana wa wanuna, a ku: “Namuntlha nuna wa mina u ta namarhelana na mina, hikuva ndzi n'wi velekele vana vanharhu va vavanuna.” Hikwalaho-ke, va n'wi thya vito ra Levhi (ku namarhelana).

³⁵A tlhela a tika nyimba, a veleka n'wana wa wanuna, a ku: “Namuntlha ndzi ta vonga Yehovha”; hikwalaho a n'wi thya vito ra Yuda (ku vonga). Kutani a nga ha engetanga a kuma vana.