Read Xitsonga Genesis 31 Bible Online

Genesis 31 - Xitsonga bible

Genesis 31

¹Yakobo a twa marito ya vana va Labani loko va ku: “Yakobo u tekile swilo swa tatana hinkwaswo, kutani rifuwo ra tatana, u tiendlele ha rona ku fuwa loku, hinkwako.”

²Kambe Yakobo a vona leswaku mombo wa Labani wu nga ha ri ka yena kukota tolo ni tolweni.

³Kavaloko Yehovha a ku eka Yakobo: “Tlhelela etikweni ra vatata wa wena ni le xivandleni xa matswalo ya wena, ndzi ta va na wena.”

⁴Yakobo a rhuma ku ya vitana Rahele na Leya emasin'wini, eka swifuwana swa yena, a va byela a ku:

⁵“Ndza swi vona leswaku mombo wa tata wa n'wina a wa ha kotisi swa tolo na tolweni, kambe Xikwembu xa tatana a xi ri na mina.

⁶Ma tivisisa na n'wina, leswaku ndzi tirhele tata wa n'wina hi matimba ya mina hinkwawo.

⁷Kambe tata wa n'wina u ndzi kanganyisile, u hundzurile hakelo ya mina ka khume; hambiswiritano, Xikwembu xi n'wi alele leswaku a ndzi endla swo biha.

⁸Enkarhini lowuyani, loko a te: ‘Leswa mavala swi ta va hakelo ya wena’, swifuwana hinkwaswo a swi tswala leswa mavala; kutani loko a ku: ‘Leswa mavalavala swi ta va hakelo ya wena’, swifuwana hinkwaswo a swi tswala leswa mavalavala.

⁹Xikwembu xi tekisile sweswo ntlhambi wa tata wa n'wina, xi ndzi nyike wona.

¹⁰“Hikuva, kuteloko ndzi tlakuse mahlo enkarhini lowu swifuwana swi navelanaka, ndzi vona eku lorheni swiphongo leswi khandziyaka tinyimpfu swi ri ni mavalavala, ni mavala, ni mindzhati.

¹¹Kutani ntsumi ya Xikwembu yi ku eka mina enorhweni: ‘Yakobo!’ Mina ndzi ku: ‘Hi mina loyi.’

¹²Kutani yi ku: ‘Tlakusa mahlo u languta: swiphongo hinkwaswo leswi khandziyaka tinyimpfu swi ni mavalavala ni mavala ni mindzhati; hikuva ndzi vonile hinkwaswo leswi Labani a ku endlelaka swona.

¹³Hi mina Xikwembu xa Betele laha u nga tota xitsundzuxo, laha u nga ndzi hlambanyela kona, kutani sweswi, yima u suka etikweni leri, u tlhelela etikweni ra matswalo ya wena.’ ”

¹⁴Rahele na Leya va hlamula va ku eka yena: “Xana ha ha ri ni ku averiwa ni ku dya ndzhaka endlwini ya tata wa hina xana?

¹⁵Xana a hi langutiwanga hi yena kukotisa loko ngi hi ri vamatiko, leswi a nga hi xavisa, kutani a dya, kunene a dya ntsengo wa hina?

¹⁶Hikuva rifuwo hinkwaro leri Xikwembu xi tekeleke tata wa hina, i ra hina ni vana va hina. Kutani sweswi, endla hinkwaswo leswi Xikwembu xi ku byeleke swona.”

¹⁷Kavaloko Yakobo a pfuka, a khandziyisa etikameleni vana va yena ni vasati va yena.

¹⁸Kutani a famba ni swifuwo hinkwaswo swa yena, ni rifuwo hinkwaro leri ngi a ri na rona (yi nga mitlhambi leyi a yi kumeke, leyi a nga yi fuwa ePadani-Aramu), a suka ku ya eka Isaka, tata wa yena, etikweni ra Kanana.

¹⁹Enkarhini lowo, Labani a a yile eku tsemeleni ka tinyimpfu; kutani Rahele a yiva titerafi ta tata wa yena (swifaniso swa swikwembu swa tata wa yena).

²⁰Yakobo a kanganyisa Labani wa Muaramu, a nga n'wi tivisanga ku baleka ka yena.

²¹A balekisa sweswo ni hinkwaswo leswi ngi swi ri swa yena, a famba, a pela nambu, a kongoma entshaveni ya Giliyadi.

²²Hi siku ra vunharhu va tivisa Labani va ku: “Yakobo u balekile.”

²³Kavaloko a teka na yena vamakwavo, a tsutsumela Yakobo hi mimpfhuka ya masiku ya ntlhanu na mambirhi, a n'wi kuma entshaveni ya Giliyadi.

²⁴Kutani Xikwembu xi ta eka Labani, wa Muaramu, enorhweni wa vusiku, xi ku eka yena: “U nga tshuki u vulavula na Yakobo leswinene, hambi leswo biha.”

²⁵Kutani Labani a ya kuma Yakobo. Yakobo a a dzimile ntsonga wa yena entshaveni; na yena Labani, ni vamakwavo, va dzima ya vona entshaveni ya Giliyadi.

²⁶Kutani Labani a ku eka Yakobo: “U endle yini, leswi u nga baleka, u tsutsuma ni vana va mina swa nge i vakhomiwa hi matlhari?

²⁷U balekele yini-ke u nga vuli nchumu, u ndzi sukela, u nga ndzi tivisanga nchumu? A ndzi ta ku fambisa hi ku tsaka, ni tinsimu, ni mirumba, ni timbila.

²⁸Kambe a ku ndzi nyikanga nkarhi wa ku ntswontswa vana va mina va vavanuna ni va vavasati. Kunene sweswi, u endlile hi ku hunguka.

²⁹Ndzi ni matimba evokweni ra mina ya ku mi endla swo biha; kambe Xikwembu xa tata wa n'wina xi vulavule na mina matolo, xi ku eka mina: ‘U nga tshuki u vulavula na Yakobo leswinene, hambi swi ri leswo biha.’

³⁰Kambe sweswi leswi u nga boha ndlela ya wena, hikuva u naverile ngopfu yindlu ya tata wa wena, xana u ndzi yivele yini swikwembu swa mina?”

³¹Kutani Yakobo a hlamula, a ku eka Labani: “Hikuva a ndzi chava, ndzi ku: u nga ti ndzi tekela vana va wena.

³²Kambe loko a ri loyi u nga ta kuma swikwembu swa wena eka yena, a nga ka a nga hanyi: Lavisisa swilo swa wena leswi nga na mina, vamakwerhu va ri kona, u teka.” Kasi Yakobo a nga tivanga leswaku Rahele u swi yivile.

³³Labani a nghena entsongeni wa Yakobo, ni le ntsongeni wa Leya, ni le ntsongeni wa malandza lamambirhi, kambe a nga kumangi nchumu. Kutani a huma entsongeni wa Leya, a nghena entsongeni wa Rahele.

³⁴Kasi Rahele a a tekile titerafi (swifaniso swa swikwembu), a ti tumbeta exihlalweni xa kamela, kutani a tshamisa ehenhla ka rona. Labani a handzakaxa entsongeni hinkwawo, a nga kumi nchumu.

³⁵Kutani Rahele a ku eka tata wa yena: “Hosi yanga, yi nga tshuki yi kariha loko ndzi tsandzeka ku yima emahlweni ka wena, hikuva ndzi ni leswi vavasati va tshamaka va ri na swona.” Kutani a lava, kambe a nga kumanga titerafi (swifaniso swa swikwembu).

³⁶Kavaloko Yakobo a kariha, a holovela Labani; kutani Yakobo a angula, a ku eka Labani: “Ndzi dyohe yini? Ndzi onhile yini, leswi u ndzi tsutsumerisaka sweswo hi matimba?

³⁷Loko u handzakaxile mirhwalo hinkwayo ya mina, xana u kumile xilo xihi xa yindlu ya wena? Swi fumbe kokwala emahlweni ka vamakwenu ni vamakwerhu, va avanyisa exikarhi ka hina vambirhi.

³⁸Hi malembe walawo ya makume mambirhi ndzi nga tshama na wena, tinyimpfu ta ku ni timbuti ta ku a ti holotanga, a ndzi dyanga swiphongo swa swifuwana swa wena.

³⁹A ndzi ku nehelanga swifuwo leswi nga handzuriwa, ndzi titekele nandzu ndzi ri mina; u ndzi rihisile leswi nga yiviwa ninhlekanhi, ni loko swi ri leswi nga yiviwa nivusiku.

⁴⁰Ninhlekanhi, a ndzi tshwa hi mumu, nivusiku ndzi nga kumi vurhongo hi xirhami.

⁴¹Hi malembe ya makume mambirhi, ndzi ku tirhele endlwini ya wena; hi malembe ya khume na mune ndzi tirhele vana va wena lavambirhi, ni malembe ya ntlhanu na rin'we ndzi tirhele swifuwana swa wena, kasi eka khume u hundzurile hakelo ya mina.

⁴²Xikwembu xa tatana, Xikwembu xa Abrahama, lexi Isaka a xi chavaka, loko ngi xi nga ndzi lwelanga, i ngi u ndzi tlherisele hakunene ndzi nga ri na nchumu. Kambe Xikwembu xi vonile ku soriwa ka mina, ni ku xaniseka ka mavoko ya mina, kutani matolo xi avanyisile.”

⁴³Kambe Labani a hlamula, a ku eka Yakobo: “Vana volavo va vavasati i vana va mina, ni vana volavo va vavanuna i vana va mina, ni swifuwo leswo i swifuwo swa mina, ni leswi u swi vonaka hinkwaswo, i swa mina! Ndzi nga endla yini namuntlha eka vana va mina, hambi eka vana lava va nga va veleka?

⁴⁴Sweswi-ke, tana hi endla xinakulobye, wena na mina, yi va mbhoni exikarhi ka mina na wena.”

⁴⁵Kavaloko Yakobo a teka ribye a ri yimisa, xi va xitsundzuxo.

⁴⁶Kutani Yakobo a ku eka vamakwavo: “Hlengeletani maribye, mi endla nhulu, va dyela kona ehenhla ka nhulu.”

⁴⁷Kutani Labani a yi thya vito ra Yegara-Sahaduta (nhulu ya vumbhoni), Yakobo, yena a yi thya vito ra Galede (nhulu ya mbhoni).

⁴⁸Labani a engeta a ku: “Xitsundzuxo lexi, i mbhoni exikarhi ka mina na wena hi siku ra namuntlha”; hi laho-ke va nga thya vito ra xona Galede, na Mispa (xihondzo xo kambela),

⁴⁹hikuva a a ku: “Yehovha a a hi kambele wena na mina loko hi ta fularhelana.

⁵⁰Kutakuloko u xanisa vana va mina, kumbe loko u teka vasati van'wana ehandle ka vana va mina, a hi munhu la nga ta va na hina, kambe waswivo, hi xona Xikwembu lexi nga ta va mbhoni exikarhi ka mina na wena.”

⁵¹Labani a engeta a ku eka Yakobo: “Nhulu hi leyi, ni xitsundzuxo hi lexi, ndzi nga xi yimisa exikarhi ka mina na wena.

⁵²Nhulu leyi i mbhoni, ni xitsundzuxo lexi i mbhoni ya leswaku ndzi nga ka ndzi nga hundzi nhulu leyi, ndzi ya eka wena, ni leswaku wena u nga ka u nga hundzi nhulu leyi, ni xitsundzuxo lexi, u ta eka mina ku ta ndzi endla swo biha.

⁵³Xikwembu xa Abrahama, ni Xikwembu xa Nahoro, Xikwembu xa tata wa vona, a xi avanyise exikarhi ka hina.” Kutani Yakobo a hlambanya ha Loyi a nga chaviwa hi Isaka.

⁵⁴Yakobo a tlhava xitlhavelo entshaveni, kutani a rhamba vamakwavo va ta dya vuswa, sweswo va dya, va xwa vusiku lebyi entshaveni.

⁵⁵Kutani Labani a pfuka nimixo, a ntswontswa vana va yena va vavanuna ni va vavasati, a va katekisa; a suka, a tlhelela ekaya ka yena.