Read Xitsonga Genesis 33 Bible Online

Genesis 33 - Xitsonga bible

Genesis 33

¹Yakobo a tlakusa mahlo, a languta, a vona Esawu a ri karhi a ta, a ri ni vanhu va mune wa madzana; kutani a pambula vana exikarhi ka Leya na Rahele ni malandza lamambirhi.

²Kutani a rhangisa malandza ni vana va vona va ya emahlweni, va landzela hi Leya ni vana vakwe; endzhaku a ku ta Rahele na Yosefa.

³Kambe yena a va hundzela emahlweni, a ya khinsamela ehansi, kantlhanu na kambirhi, a ko a fika ekusuhi ni hosi ya yena.

⁴Kutani Esawu a tsutsuma a hlangana na yena; a n'wi singarhela, a wela enhan'wini ya yena, a n'wi ntswontswa, kutani va rila.

⁵Kutani a tlakusa mahlo, a vona vavasati ni vana, a ku: “I va mani volavo u nga na vona la?” Yakobo a ku: “I vana lava Xikwembu xi pfuneke nandza wa wena ha vona.”

⁶Kutani malandza ma tshinelela kusuhi, ma ri ni vana va yena, va khinsama.

⁷Na yena Leya ni vana vakwe va tshinelela, va khinsama; endzhaku ka vona, ku ta Yosefa na Rahele va khinsama.

⁸Esawu a ku: “U endla yini hi ntlhambi hinkwawo lowu ndzi nga hlangana na wona xana?” Yakobo a ku: “Hi leswaku ndzi tiva ku kuma tintswalo emahlweni ka hosi yanga.”

⁹Kambe Esawu a ku: “Ndzi ni leswo tala, makwerhu, swa wena a swi ve swa wena.”

¹⁰Kambe Yakobo a ku: “Ndza ku khongela, loko kumbe ndzi kume tintswalo emahlweni ka wena, amukela evokweni ra mina nhlengo wa mina, hikuva hikwalaho ka swona ndzi langutile mombo wa wena, hilaha i ngi munhu a languta mombo wa Xikwembu, kutani u ndzi amukerile hi tintswalo.

¹¹Wa nga amukela nhlengo wa mina lowu byisiweke eka wena, hikuva Xikwembu xi ndzi tatele tintswalo; a ndzi pfumari nchumu.” A n'wi sindzisa a kondza a amukela.

¹²Kutani Esawu a ku: “A hi sukeni hi muka, ndzi ta famba na wena.”

¹³Kambe Yakobo a ku: “Hosi yanga, wa swi tiva leswaku swihlangi swi tsanile, ni leswaku ndzi talelwe hi tinyimpfu ni tihomu leti an'wisaka; kutakuloko swi angwetlisiwa hi siku rin'we, swifuwana hinkwaswo swi nga fa.

¹⁴Hosi yanga, rhanga emahlweni ka nandza wa wena, mina ndzi ta sundzasundza khwatsinyana, hi ku pima mikondzo ya swifuwo leswi ndzi rhangelaka emahlweni, ni mikondzo ya swihlangi, ndzi kondza ndzi fika eSeyira, eka hosi yanga.”

¹⁵Esawu a ku: “Loko swi ri tano, ndzi ta ku siyela vanhu van'wana eka valavo ndzi nga na vona.” Kambe a ku: “Hikwalaho ka yini xana? I ngi ndzi kume tintswalo emahlweni ka hosi yanga.”

¹⁶Kutani hi siku lero, Esawu a tlhela a famba hi ndlela ya yena ku ya eSeyira.

¹⁷Kutani Yakobo a ya eSukoti, a tiakela kona yindlu, a endlela ni swifuwo swa yena matshanganyana ya marhavi, hikwalaho-ke a nga thya vito ra xivandla xexo eSukoti (matshanganyana).

¹⁸Kutani Yakobo, nkarhi lowo a vuyaka Padani-Aramu, a fika hi ku tsaka emutini wa Xikeme, wu nga etikweni ra Kanana, a dzima mitsonga yakwe yi vandzamane ni muti.

¹⁹Kutani a xava xivandla lexi a dzimeke ntsonga wakwe eka xona, a humesa dzana ra makesita emavokweni ya vana va Hamoro, tata wa Xikeme.

²⁰Kutani a aka gandzelo kona, a ri thya vito ra Eli-Elohe-Israele (Xikwembu, i Xikwembu xa Israele).