Read Xitsonga Genesis 38 Bible Online

Genesis 38 - Xitsonga bible

Genesis 38

¹Enkarhini wolowo, Yuda a suka eka vamakwavo, a hambukela eka wanuna wa Adulama la vuriwaka Hira.

²Kutani Yuda a vona kona n'wana wa wanhwana wa munhu wa Mukanana la vuriwaka Xuwa, a n'wi teka, a ya eka yena.

³Yena a kuma khwiri, a veleka n'wana wa wanuna, a n'wi thya vito ra Ere.

⁴A tlhela a kuma yin'wana nyimba, a veleka n'wana, a n'wi thya vito ra Onani.

⁵A engeta a veleka n'wana, a n'wi thya vito ra Xela; kambe Yuda a a ri eKezibi loko a n'wi veleka.

⁶Kutani Yuda a lovota Ere, n'wana wa yena wa mativula nsati, vito ra yena a a ri Tamara.

⁷Kambe Ere, n'wana wa mativula wa Yuda, a a ri munhu wo hunguka emahlweni ka Yehovha, kutani Yehovha a n'wi dlaya.

⁸Kutani Yuda a ku eka Onani: “Yana eka nsati wa hosi ya wena, u ya n'wi hlambela, u pfuxela hosi ya wena rixaka.”

⁹Kambe Onani, hi ku tiva leswaku vana va nga ka va nga vi va yena, kakuloko a ya eka nsati wa hosi ya yena, a halatela ehansi, a nga tshuki a nyika hosi ya yena vana.

¹⁰Kambe lexi a nga xi endla a xi bihile emahlweni ka Yehovha, kutani Yehovha a n'wi dlaya na yena.

¹¹Kavaloko Yuda a ku eka Tamara, n'wingi wa yena: “Tlhelela ekaya ka tata wa wena u ri noni, Xela, n'wananga, a kondza a kula.” Hikuva a a ku: “Kumbe xana na yena a nga ta fa ku kotisa vamakwavo.” Tamara a famba a tlhelela eka rikwavo.

¹²Masiku layo tala ma hundza, kutani n'wana wa xisati wa Xuwa, nkata Yuda, a lova; kuteloko Yuda a chaveleriwile, a tlhandlukela ku ya eTimina, ni nakulobye wa yena Hira wa Adulama, va ya eka vatsemeri va swifuwana.

¹³Kutani Tamara, va n'wi byela, va ku: “Waswivo, n'wingi wa wena u tlhandlukele eTimina ku ya tsemela swifuwana swa yena.”

¹⁴Kavaloko a hluvula tinguvu ta yena ta vunoni, a ambala nguvu yo vevuka, a funengela yona, a ya tshamisa laha ku ngheniwaka eEnayini, leyi nga endleleni ya Timina; hikuva a a vone leswaku Xela a kurile, kambe a nga nyikiwi leswaku a va nsati wa yena.

¹⁵Kutani Yuda a n'wi vona, a ku: “Onge i mbhisa, hikuva u tifihlile mombo.”

¹⁶Kutani a hambukela eka yena endleleni, a ku: “U nga ndzi pfumelela leswaku ndzi ta eka wena.” Kasi a a nga swi tivi leswaku i n'wingi wa yena. Kutani a ku: “U ta ndzi nyika yini loko u ta eka mina?”

¹⁷Yena a ku: “Ndzi ta ku rhumela xiphongo xa ntlhambi wa mina.” Wansati a ku: “Xana u nga ndzi nyika mfungho u kondza u xi neha?”

¹⁸Kutani a ku: “Ndzi ku nyika mfungho wihi?” A ku: “Xingwavila xa ku tiyisa ka wena, ni nghole ya wena, ni nhonga ya voko ra wena.” A n'wi nyika sweswo, a ya eka yena, kutani wansati a xurhisa hi yena.

¹⁹Kutani a suka a famba, a funungula nguvu yeleyo, a funengela tinguvu ta yena ta vunoni.

²⁰Kutani Yuda a n'wi rhumela ximbutana hi voko ra nakulobye wa Adulama ku ta teka mfungho emandleni ya lo wansati, kambe a nga n'wi vonanga.

²¹Kavaloko a vutisa vanhu va muti, a ku: “U kwihi lo wa mbhisa loyi i ngi a ri eEnayini, ekusuhi ni ndlela?” Vona va ku: “A ku vanga na mbhisa la.”

²²A tlhelele eka Yuda, a ku: “A ndzi n'wi kumanga; vavanuna va muti va ndzi byerile va ku: ‘A ku na mbhisa la.’ ”

²³Yuda a ku: “A a swi hlayise leswi a nga na swona, leswaku kumbe xana a nga hi terisa tingana; kasi ximbutana xolexo ndzi xi rhumerile, kambe a ku n'wi kumanga.”

²⁴Kuteloko ku hundzile tin'hweti tinharhu, Yuda a tivisiwa va ku: “Tamara, n'wingi wa wena, u oswile, u vuya a ri ni nyimba ya vuoswi byebyo.” Kutani Yuda a ku: “N'wi humeseni a ya hisiwa.”

²⁵Kuteloko va ku va n'wi humesa, a rhumela eka n'wingi, a ku: “Ndzi xurhise hi wanuna loyi swilo leswi swi nga swa yena.” A ku: “Wa nga tiva leswaku leswi, i swa mani, xingwavila xa mfungho, ni tinghole leti, ni nhonga leyi.”

²⁶Kavaloko Yuda a swi tiva, a ku: “U sasekile ku tlurisa mina, hikuva a ndzi n'wi lovotanga Xela, n'wananga.” Kambe a nga ha engetanga a ya eka yena.

²⁷Kutani, kuteloko nkarhi wa yena wa ku veleka wu fikile, a ku ri ni mahahla enyimbeni ya yena.

²⁸Kutani loko a ri karhi a veleka, n'wana un'wana a humesa xandla; kutani sungakati ri xi teka ri xi tsimbelela hi rinya ra xivunguvungu, a ku: “Yeloyi, u rhange a velekiwa.”

²⁹Kuteloko n'wana a tlherisa voko ra yena, makwavo a humelela. Sungakati ri ku: “U boxise ku yini, ku boxa a ku ve ka wena!” Kutani a n'wi thya vito ra Perese (ku boxa).

³⁰Endzhaku ku huma makwavo loyi ngi a ri ni rinya ro tshwuka evokweni ra yena; a n'wi thya vito ra Zera (ku phatima).