Read Xitsonga Genesis 40 Bible Online

Genesis 40 - Xitsonga bible

Genesis 40

¹Endzhaku ka timhaka teto, mucheleri wa hosi ya Egipta ni muphameri wa xinkwa, va dyohela n'wini wa vona, hosi ya Egipta.

²Kutani Faro a karihela tindhuna letimbirhi ta yena, ndhuna ya vacheleri ni ndhuna ya vaphameri;

³kutani a va nyiketa leswaku va hlayisiwa endlwini ya hosi ya valanguteri, ekhotsweni laha Yosefa a a bohiwile kona.

⁴Kutani ndhuna ya valanguteri a byela Yosefa loyi a va tirhelaka leswaku a va hlayisa, kutani va tshama masiku ekhotsweni.

⁵Kutani mucheleri ni muphameri wa hosi ya Egipta, lava bohiweke ekhotsweni, va lorha milorho havambirhi, un'wana ni un'wana norho wa yena hi vusiku byi ri byin'we; wun'wana ni wun'wana wu ri ni ku hlamuseriwa ka wona.

⁶Yosefa a ta eka vona wa ha ri mixo, a va vona, kutani maswivo, a va tsuvile.

⁷A vutisa tindhuna ta Faro leti khotsiweke na yena endlwini ya n'wini wa yena, a ku: “Hikwalaho ka yini mimombo ya n'wina yi nga tsakanga namuntlha xana?”

⁸Kutani va ku eka yena: “Hi lorhile milorho, kambe a ku na loyi a hi hlamuselaka.” Yosefa a ku eka vona: “Ku hlamusela a ku humi eka Xikwembu xana? Mi nga ndzi byela yona.”

⁹Ndhuna ya vacheleri yi byela Yosefa norho wa yona, yi ku eka yena: “Ndzi lorhile ndzi vona murhi wa vhinya emahlweni ka mina;

¹⁰murhi lowu, a wu ri ni marhavi manharhu; kuteloko ma hlukile, ma baleka swiluva, kutani swidzumba swa wona swi humesa vana lava vupfeke.

¹¹Xidzuvulo xa Faro a xi ri evokweni ra mina; kutani ndzi teka vana va wona, ndzi kamela xidzuvulweni xa Faro, ndzi nyiketa Faro xidzuvulo emandleni.”

¹²Yosefa a ku eka yena: “Ku hlamusela ka wona, hi loku: Marhavi lamanharhu, i masiku manharhu.

¹³Ka ha ta hundza masiku manharhu, Faro u ta yimisa nhloko ya wena, a ku tlherisela entirhweni wa wena, u ta ya nyiketa Faro xidzuvulo evokweni ra yena, kukotisa leswi u nga tama u endla swona khale, loko wa ha ri mucheleri wa yena.

¹⁴Kutakuloko u tshamile swinene, u ndzi tsundzuka na wena; ndzi endlele hi tintswalo, u ndzi vika eka Faro a ta ndzi humesa endlwini leyi.

¹⁵Hikuva ndzi susiwe etikweni ra Vaheveru hi ku yiviwa, kambe ni kwala a ndzi onhangi nchumu lexi va nga ndzi khotselaka xona.”

¹⁶Ndhuna ya vaphameri, loko yi vona leswaku ku hlamusela ku ri lokunene, yi ku eka Yosefa: “Na mina ndzi lorhile norho wa mina; a ndzi ri ni swirhundzu swinharhu swa swinkwa leswo basa swi ri enhlokweni ya mina;

¹⁷kutani exirhundzwini lexi ngi xi ri ehenhla, a ku ri ni swakudya swa tinxakaxaka, leswi swekeriwaka Faro; kambe tinyanyana ti dya exirhundzwini lexi ndzi xi rhweleke enhlokweni ya mina.”

¹⁸Yosefa a n'wi hlamula, a ku: “Ku hlamusela ka kona hi loku: Swirhundzu leswinharhu, i masiku manharhu;

¹⁹ku ta hundza masiku manharhu, Faro u ta yimisa nhloko ya wena, a ku hayeka emurhini, kutani tinyanyana ti ta dya nyama ya wena ehenhla ka wena.”

²⁰Kutani hi siku ra vunharhu, siku ra ku tswariwa ka Faro, a endlela malandza ya yena hinkwawo nkhuvo; a tlakusa nhloko ya ndhuna ya vacheleri, ni nhloko ya ndhuna ya vaphameri exikarhi ka malandza ya yena;

²¹a tlherisela ndhuna ya vacheleri eku cheleleni ka yena, leswaku a tama a nyiketa Faro xidzuvulo emandleni,

²²kambe a hayeka ndhuna ya vaphameri, hilaha Yosefa a nga n'wi hlamusela hakona.

²³Kambe ndhuna ya vacheleri a nga tsundzukanga Yosefa, kambe a n'wi rivala.