Read Xitsonga Genesis 44 Bible Online

Genesis 44 - Xitsonga bible

Genesis 44

¹Kutani Yosefa a lerisa mulanguteri wa yindlu ya yena, a ku: “Chela swakudya emikwameni ya vanhu valavo, u encenyeta hilaha va nga rhwalaka hakona, u tlherisa mali ya un'wana ni un'wana emilon'wini ya mikwama ya vona,

²u nghenisa ni xidzuvulo xa mina xa silivhere enon'wini wa nkwama wa lontsongo wa vona, swin'we ni mali ya koro ya yena”; kutani a endla hilaha Yosefa a n'wi leriseke hakona.

³Kuteloko byi xile, vavanuna valavo va tlherisiwa ni timbhongolo ta vona.

⁴Kuteloko va huma emutini, va nga si va kule, Yosefa a ku eka mulanguteri wa yindlu ya yena: “Suka, u tsutsumela vanhu valavo; kutakuloko u fikile eka vona, u ta ku eka vona: ‘Mi rihisela yini swo saseka hi leswo biha?

⁵Xana a mi na xidzuvulo xa hosi yanga, lexi a nwaka eka xona, ni lexi a bvumbhaka ha xona? Mi onhile loko mi endlise sweswo.’ ”

⁶Kuteloko a ya va kuma, a va byerisa sweswo.

⁷Va ku eka yena: “Hosi ya hina yi vulela yini marito lawa xana? A swi ve kule ni malandza ya wena ku endla mhaka leyo tano!

⁸Vona, mali leyi hi nga yi kuma emilon'wini ya mikwama ya hina, hi tlherile hi yi neha eka wena loko hi vuya hi le Kanana; kutani hi nga yivisa ku yini silivhere kumbe nsuku endlwini ya hosi ya wena?

⁹Yeloyi wa malandza ya wena loyi xi kumiwaka eka yena a a dlawe; swi tsandza na hina, hi ta va makhumbi ya hosi ya wena.”

¹⁰A ku: “Hi swona, a ku endliwe hi ku vula ka n'wina: munhu yeloyi xi nga ta kumiwa eka yena, u ta va khumbi ra mina, kambe n'wina a mi nga vi na nandzu.”

¹¹Kavaloko un'wana ni un'wana a hatlisa a veka ehansi nkwama wa yena, a wu tshunxa;

¹²mulanguteri a hangulusa hinkwako, a sungula hi lowa nkulukumba ku ya fikela eka lowa ndzisana, kutani xidzuvulo xi kumiwa enkwameni wa Benjamini.

¹³Kavaloko va handzula tinguvu ta vona, kutani un'wana ni un'wana a tlhela a rhwexa mbhongolo ya yena, va tlhelela emutini.

¹⁴Yuda ni vamakwavo va fika endlwini ya Yosefa, hikuva yena a a ha ri kona, kutani va tiwisa ehansi emahlweni ka yena.

¹⁵Yosefa a ku eka vona: “Mi endlele yini loko mi endle leswi? Xana a mi swi tivi leswaku munhu la kotisaka mina kunene u tiva ku bvumbha?”

¹⁶Kutani Yuda a ku: “Hi to yini ka hosi yanga? Hi ta vula tihi kumbe hi ta tihlantswa hi tihi? Xikwembu xi vonile ku homboloka ka malandza ya wena; maswivo, hi makhumbi ya wena, hosi ya hina, hina ni munhu yeloyi xidzuvulo xi nga kumiwa enkwameni wa yena.”

¹⁷Kambe Yosefa a ku eka vona: “A ndzi na mhaka ya ku endlisa sweswo! Munhu loyi xidzuvulo xi kumiweke evokweni ra yena, hi yena la nga ta va khumbi ra mina; kambe n'wina, tifambeleni hi ku tsaka eka tata wa n'wina.”

¹⁸Kavaloko Yuda a tshinelela Yosefa, a ku: “Oho! Hosi yanga, nandza wa wena a nga vulavula rito ri ri rin'we etindleveni ta hosi yanga, kambe ku kariha ka wena ku nga tshuki ku holovela nandza wa wena, hikuva u ringana na Faro.

¹⁹Hosi yanga yi tshama yi vutisa malandza ya yena, yi ku: ‘Xana mi ni tata wa n'wina kumbe makwenu?’

²⁰Kutani hi ku eka hosi ya hina: ‘Hi na tatana, i munhu la dyuhaleke, ni n'wana loyi a nga n'wi veleka eku dyuhaleni ka yena, lowa ndzisana; hosi ya yena a yi kona, kutani hi yena a ri swakwe la seleke wa mana wa yena; kambe tatana a n'wi rhandza.’

²¹Kutani u te eka malandza ya wena: ‘N'wi neheni ka mina, ndzi ta n'wi vona hi mahlo.’

²²Kutani hi ku eka hosi yanga: ‘Wandzisanyana yeloyi a nga ka a nga siyi tata wakwe, hikuva loko a suka eka tata wa yena, tatana a nga fa.’

²³Kambe u te eka malandza ya wena: ‘Loko makwenu lowa ndzisana a nga vuyi na n'wina, mi nga ka mi nga ha voni mombo wa mina’;

²⁴kuteloko hi tlherile eka nandza wa wena, tata wa hina, hi n'wi byerile marito ya hosi yanga.

²⁵Kutani tata wa hina a ku eka hina: ‘Tlhelani, mi ya hi singilela swakudyanyana.’

²⁶Kambe hi ku eka yena: ‘Ha tsandzeka ku vuyela; loko makwerhu lowa ndzisanyana hi ri na yena, hi ta ngirimela hi ya, hikuva loko hi nga ri na yena, hi nga ka hi nga voni mombo wa munhu yeloyi.’

²⁷Kutani nandza wa wena, tata wa hina, a ku eka hina: ‘Ma swi tiva leswaku nsati wa mina a a ndzi velekele vana vambirhi;

²⁸un'wana, loko a ndzi siyile, ndzi anakanya leswaku kunene u handzuriwile; kutani ku sukela kwalaho a ndzi si va ndzi n'wi vona.

²⁹Kungakuloko mi ndzi tekela na loyi, kutani a kumiwa hi khombo, mi ta xikisela misisi ya mina leyi ya timpfu exivandleni xa vafi hi xiviti.’

³⁰“Sweswi, kutakuloko ndzi tlhela eka nandza wa wena, eka tata wa hina, hi nga ri na n'wana loyi, yeloyi vutomi bya tata wa hina byi namarhelaneke ni vutomi bya yena,

³¹ni loko a vona leswaku lowa jaha a nga kona, u ta fa, kutani hina malandza ya wena hi ta ngirimeta misisi leyi ya timpfu ya nandza wa wena, tata wa hina, exivandleni xa vafi hi xiviti.

³²Hikuva mina ndzi tibohile eka tatana ematshan'weni ya n'wana loyi, ndzi ku: ‘Kungakuloko ndzi nga vuyi na yena eka wena, ndzi ta va ni nandzu eka tatana hi masiku.’

³³Sweswi, wa nga pfumelela nandza wa wena a sala ematshan'weni ya n'wana loyi, ndzi va khumbi ra wena, hosi yanga, kutani n'wana a muka ni vamakwavo.

³⁴Hikuva ndzi nga mukisa ku yini eka tatana ndzi nga ri na n'wana loyi? Oho! Ndzi nga tshuki ndzi vona khombo leri nga ta humelela tatana.”