Read Xitsonga Genesis 49 Bible Online

Genesis 49 - Xitsonga bible

Genesis 49

¹Kavaloko Yakobo a vitana vana va yena, a ku: “Hlengeletanani, ndzi ta mi tivisa leswi nga ta mi humelela emikarhini leyi taka.

²“Hlengeletanani, vana va Yakobo, mi yingisa, Yingiselani tata wa n'wina, va Israele.

³“Rhuveni, hi wena mativula ya nga, Matimba ya mina ni xirhangana xa xifungha xa mina. U tlula van'wana hi vukulukumba, wa va tlula hi matimba.

⁴Wa khindlimuteka ku kotisa mati! U nga ka u nga vi wo rhanga, Hikuva u khandziyile evulawini bya tata waku; U nyamisile sangu ra mina siku neneni u khandziyeleke exilawini xa mina.

⁵“Simiyoni na Levhi va ringana; Timpanga ta vona, ma ta va matlhari ya ku phanga.

⁶Moya wanga wu nga tshuki wu nghena exihundleni xa vona! Ku twala ka mina ku nga tshuki ku hlangana ni makungu ya vona! Hikuva eku kariheni ka vona, va dlaye vanhu; Eku titsakeleni ka vona, va tsemile misiha ya tinkunzi.

⁷A ku rhukaniwe ku kariha ka vona, hikuva ka pfurha, Ni ku leva ka vona, hikuva a ku nga tsetseleri. Ndzi ta va hambanyisa exikarhi ka Yakobo, Ndzi va hangalasa exikarhi ka Israele.

⁸“Wena, Yuda, vamakwenu va ta ku dzunisa; Voko raku ri ta va ehenhla ka tinhamu ta valala va wena; Vana va tata waku va ta khinsama emahlweni ka wena.

⁹Yuda i nghala leyitsongo. U tlhele eku hlaseleni, n'wananga! U ya korhama, u ya kasela kukotisa nghala, Kukotisa ntswele ya nghala; i mani la nga n'wi pfuxaka?

¹⁰Ku fuma ku nga ka ku nga suki eka Yuda, Ni loko yi ri nhonga ya vuhosi, exikarhi ka milenge ya yena, Ku kondza ku fika eXilo, Kutani va matiko va ta yingisela yena.

¹¹A kuleka mbhongolo yakwe eximudyaneni xa vhinya, Ni ximbhongolwana, emurhini wa vhinya lowu hlawuriweke; A hlantswa nguvu ya yena evhinyeni. Ni nkumba wa yena engatini ya vhinya.

¹²Mahlo ya yena ma hatima hi vhinyo; Ni meno ya yena yi basile hi ntswamba.

¹³“Zebuloni u ta ya aka eribuwini ra lwandle; U ta va eribuwini ra mabyatso; Ni maava ya yena ma va ekusuhi na Sidoni.

¹⁴“Isakara i mbhongolo leya matimba, Yi etlele exikarhi ka matshanga.

¹⁵A twa ku nandziha ka ku wisa, Ni leswaku misava ya tsakisa; A korhamele ndzhwalo hi khatla, U tiendle nandza la luvaka.

¹⁶“Dani u ta avanyisa timhaka ta tiko rakwe, Kukotisa un'wana wa rixaka ra Israele.

¹⁷Dani u ta va nyoka endleleni, Mhiri emitileni, Leyi lumaka swirhendze swa hanci, Leswaku mukhandziyi wa yona a wa hi xikosi.

¹⁸“Yehovha, ndzi langutele ku kutsuriwa hi wena!

¹⁹“Gadi, yena, u ta lwa ni mavandla, Kambe u ta va pfukela a va hlongorisa.

²⁰“Asere u ta humesa swakudya leswo nona; Hi yena la humesaka swakudya leswo xawula swa tihosi.

²¹“Neftali, i mbavala leyi dlalatsaka; Ku vulavula ka yena ku sasekile.

²²“Yosefa i rhavi ra murhi lowu vekaka, I rhavi ra murhi lowu vekaka, lowu nga ekusuhi ni xihlovo, Marhavi ya wona ma tlula ehenhla ka rihlampfu.

²³Va n'wi pfukile, va n'wi hoxetela hi miseve, Vatlhonyi va n'wi karhata hi rivengo ra vona;

²⁴Kambe vurha bya yena byi tshame byi tiyile; Mavoko ni mandla ya yena ma tiyisiwile Hi mandla ya Nhenha ya Yakobo, Hi loyi a nge Murisi ni Ribye ra Israele.

²⁵Hi wona ntirho wa Xikwembu xa tata wa wena, lexi nga ta ku pfuna; Ni wa Lowa matimba hinkwawo la nga ta ku katekisa Hi mikateko ya matilo ya le henhla, Ni mikateko ya xidziva xa le hansi, Ni mikateko ya mavele ni ya xifuva xa mutswari.

²⁶Ku katekisa ka tata wa wena ku katekisa ka vatata wa mina, Ni ku saseka ka mitsunga leyi nga heriki. A ku tshame ehenhla ka nhloko ya Yosefa, Ni le mombyeni wa la nga hosi exikarhi ka vamakwavo!

²⁷“Benjamini, i hlolwa leri kuvutlulaka; Nimixo ri dya nyama ya swiharhi, Nimadyambu ri avanyisela leswi a swi khomeke.”

²⁸Lava khume na vambirhi valavo, hi tona tinyimba hinkwato ta Israele, na wona marito lawa, hi wona lawa tata wa vona a nga ma vula siku a va katekisaka. A va katekisa un'wana ni un'wana hi ku katekisiwa ka yena.

²⁹Kutani a va lela, a ku eka vona: “Sweswi, ndzi ta amukeriwa eka varikwerhu; mi ta ndzi lahla eka vatatana, ebakweni ra le nsin'wini ya Efroni, wa Muhiti,

³⁰ebakweni leri nga ensin'wini ya Makapela, leri vandzakanaka na Mamre, etikweni ra Kanana; hi yona nsimu leyi Abrahama a yi xaveke eka Efroni, wa Muhiti, ku endla xilahlo xa masirha.

³¹Hi laha Abrahama na Sara, nsati wa yena, va lahliweke kona; hilaha Isaka na Rhaveka, nsati wa yena, va lahliweke kona; hilaha ndzi nga lahla Leya kona.

³²Nsimu ni bako leri nga eka yona, a swi xaviwile eka Vahiti.”

³³Kuteloko Yakobo a hetile ku lelela vana va yena, a tlherisela milenge ya yena exilawini, a nyiketa moya, a rhurheliwa eka varikwavo.