Read Xitsonga Genesis 5 Bible Online

Genesis 5 - Xitsonga bible

Genesis 5

¹Buku ya vatukulu va Adamu hi yoleyi: Siku Xikwembu xi vumbaka munhu, xi n'wi endla la fanaka ni Xikwembu.

²Xi va vumba wanuna ni wansati, kutani xi va katekisa, xi va thya vito ra vanhu, hi siku va vumbiweke ha rona.

³Adamu a hanya malembe ya 130, kutani a kuma n'wana la fanaka na yena, a ri ni nghohe ya yena, a n'wi thya vito va Seta.

⁴Kuteloko Adamu a kumile Seta, a hanya malembe ya 800, kutani a tswala vana va vavanuna ni va vavasati.

⁵Masiku hinkwawo lawa Adamu a hanyeke ha wona a ma ri malembe ya 930, kutani a fa.

⁶Seta, kuteloko a ri munhu wa malembe ya 105, a kuma Enosi;

⁷kuteloko a kumile Enosi, a hanya malembe ya 807; kutani a tswala vana va vavanuna ni va vavasati.

⁸Masiku hinkwawo ya Seta a ma ri malembe ya 912; kutani a fa.

⁹Enosi a hanya malembe ya 90 kutani a kuma Kenani;

¹⁰kuteloko a kume Kenani, a hanya malembe ya 815, kutani a tswala vana va vavanuna ni va vavasati.

¹¹Masiku hinkwawo ya Enosi a ma ri malembe ya 905; kutani a fa.

¹²Kenani a hanya malembe ya 70, kutani a kuma Mahalalele;

¹³kuteloko a kume Mahalalele, a hanya malembe ya 840, kutani a tswala vana va vavanuna ni va vavasati.

¹⁴Masiku hinkwawo ya Kenani a ma ri malembe ya 910; kutani a fa.

¹⁵Mahalalele a hanya malembe ya 65, kutani a kuma Yarede;

¹⁶kuteloko a kume Yarede, a hanya malembe ya 830, kutani a tswala vana va vavanuna ni va vavasati.

¹⁷Masiku hinkwawo ya Mahalalele a ma ri malembe ya 895, kutani a fa.

¹⁸Yarede, loko a ri munhu wa malembe ya 162, a kuma Enoko:

¹⁹kuteloko a kume Enoko, a hanya malembe ya 800, kutani a tswala vana va vavanuna ni va vavasati.

²⁰Masiku hinkwawo ya Yarede a ma ri malembe ya 962, kutani a fa.

²¹Enoko, loko a ri munhu wa malembe ya 65, a kuma Metuxela:

²²kuteloko a kume Metuxela, a famba na Xikwembu hi malembe ya madzana manharhu, a tswala vana va vavanuna ni va vavasati.

²³Masiku hinkwawo ya Enoko a ma ri malembe ya 365.

²⁴Enoko a tshama a famba ni Xikwembu, kutani a nga ha vanga kona, hikuva Xikwembu xi n'wi tekile.

²⁵Metuxela, loko a ri munhu wa malembe ya 187, a kuma Lameke;

²⁶kuteloko a kume Lameke, a hanya malembe ya 782, kutani a tswala vana va vavanuna ni va vavasati.

²⁷Masiku hinkwawo ya Metuxela a ma ri malembe ya 969; kutani a fa.

²⁸Lameke, loko a ri munhu wa malembe ya 182, a kuma n'wana wa wanuna,

²⁹kutani a n'wi thya vito ra Nowa (ku wisa), a ku: “Yeloyi u ta hi wisisa emikarhalweni ya hina, ni le ntirhweni lowo tika wa mavoko ya hina, lowu pfuxiweke hikwalaho ka ku rhuketeriwa ka misava hi Yehovha.”

³⁰Kuteloko Lameke a kume Nowa, a hanya malembe ya 595, kutani a tswala vana va vavanuna ni va vavasati.

³¹Masiku hinkwawo ya Lameke a ma ri malembe ya 777; kutani a fa.

³²Nowa, loko a ri munhu wa malembe ya ntlhanu wa madzana, a kuma Xeme na Hamu na Yafeta.