Read Xitsonga Genesis 6 Bible Online

Genesis 6 - Xitsonga bible

Genesis 6

¹Kuteloko vanhu va sungule ku tala ehenhla ka misava, ni loko vanhwanyana va velekeriwe vona,

²vana va Xikwembu va vona leswaku vanhwanyana va vanhu va sasekile, kutani va titekela eka vona vasati exikarhi ka hinkwavo lava va nga va hlawula.

³Kambe Yehovha a ku: “Moya wanga a wu nga ha tshami hi masiku emunhwini, hikuva munhu i nyama, kutani masiku ya yena ma ta va dzana ra malembe ni makume mambirhi.”

⁴Emikarhini yeleyo a ku ri kona emisaveni vanhu va swihontlovila. Loko vana va Xikwembu va yile eka vanhwana va vanhu, va kuma vana ha vona. Hi tona tinhenha leti nga twakala ngopfu khale.

⁵Kutani Yehovha a vona leswaku ku biha ka vanhu ku kurile emisaveni, ni miehleketo hinkwayo ya timbilu ta vona yi kongoma ku biha ntsena hi masiku hinkwawo,

⁶kutani Yehovha a vilela hi leswi a nga vumba vanhu emisaveni, a vaviseka ngopfu embilwini ya yena.

⁷Kutani Yehovha a ku: “Ndzi ta lovisa ehenhla ka misava vanhu lava ndzi nga va tumbuluxa ku suka eka munhu, ku fika eka swifuwo ni swikokovi, ni tinyanyana ta tilo, hikuva ndza vaviseka hi leswi ndzi nga swi endla.”

⁸Kambe Nowa a kuma tintswalo emahlweni ka Yehovha.

⁹Hi vona lavo vana va Nowa: Nowa a a ri munhu la lulameke ni la sasekeke enkarhini wa yena. Nowa a tshama a famba ni Xikwembu.

¹⁰Nowa u kume vana va xinuna vanharhu, a va ri Xeme, na Hamu, na Yafeta.

¹¹Misava a yi onhakile emahlweni ka Xikwembu. A yi tele mona.

¹²Xikwembu xi languta misava, kutani maswivo, a yi onhakile, hikuva nyama yin'wana ni yin'wana a yi onhile ndlela ya yona emisaveni.

¹³Kavaloko Xikwembu xi byela Nowa, xi ku: “Makumu ya nyama yin'wana ni yin'wana ya fikile emahlweni ka mina, hikuva va tate misava hi mona; kutani sweswi, ndzi ta va lovisa swin'we ni misava.

¹⁴Tiendlele ngalava hi murhi wa gofere; u ta avanyisa ngalava exikarhi ka yona hi makamara, u yi tota hi nhlaka endzeni ni le handle.

¹⁵U ta yi endlisa sweswo: Ngalava yi ta leha hi swisungunhu swa madzana manharhu, ni ku anama ka yona, swisungunhu swa ntlhanu wa makume, ni ku tlakuka ka yona, swisungunhu swa makume manharhu.

¹⁶U ta endla fasitere engalaveni, ehenhla yi va ya xisungunhu xin'we; u endla rivanti etlhelweni ra yona, u endla yindlu yin'we ehansi, ni yin'wana ya vumbirhi ehenhla, ni yin'wana ya vunharhu.

¹⁷Kutani mina, ndzi ta tisa ndhambi ya mati emisaveni, yi herisa ehansi ka tilo nyama yin'wana ni yin'wana leyi nga ni ku hefemula ka vutomi, kutani hinkwaswo leswi nga emisaveni swi ta lova.

¹⁸Kambe ndzi tiyisa ku twanana ka mina na wena; u ta nghena engalaveni, wena ni vana va wena, ni nsati wa wena, ni vasati va vana va wena swin'we na wena.

¹⁹Kutani exikarhi ka hinkwaswo leswi hanyaka eka nyama yin'wana ni yin'wana, u nghenisa engalaveni swimbirhi swa rixaka rin'wana ni rin'wana, u swi hlayisa na wena swi hanya; swa matsune ni nkati;

²⁰tinyanyana hi tinxaka ta tona, ni swifuwo hi tinxaka ta swona, ni swikokovi swa misava hi tinxaka ta swona, swimbirhi swa rixaka rin'wana ni rin'wana, swi ta ta eka wena leswaku u swi hlayisa swi hanya.

²¹Kutani wena, u teka swakudya swin'wana ni swin'wana leswi dyekaka, u swi hlengeleta eka wena, swi va swakudya swa wena ni swa swona.”

²²Kutani Nowa a endlisa sweswo; a endla hinkwaswo hilaha Xikwembu xi n'wi leriseke hakona.