Read Xitsonga Genesis 9 Bible Online

Genesis 9 - Xitsonga bible

Genesis 9

¹Kutani Xikwembu xi katekisa Nowa ni vana va yena, xi ku eka vona: “Tswalanani, mi andza, mi tata misava.

²Swiharhi hinkwaswo swa misava, ni tinyanyana hinkwato ta tilo, swi ta tshuka swi mi chava, ni hinkwaswo leswi kokovaka emisaveni, ni tinhlampfi hinkwato ta lwandle, swi vekiwile emavokweni ya n'wina.

³Hinkwaswo leswi fambaka ni leswi hanyaka swi ta va swakudya swa n'wina, ndzi mi nyikile hinkwaswo kukotisa byanyi.

⁴Ntsena, mi nga ka mi nga dyi nyama yi ri ni vutomi bya yona, yi nga ngati ya yona.

⁵Kutani ndzi ta rihisela ngati ya n'wina, byi nga vutomi bya n'wina; ndzi ta yi rihisela eka swiharhi hinkwaswo, ni ka vanhu, ndzi ta rihisela vutomi bya munhu un'wana ni un'wana eka voko ra makwavo.

⁶Un'wana ni un'wana la nga ta halata ngati ya munhu, ngati ya yena yi ta halatiwa hi munhukulobye; hikuva Xikwembu xi endle munhu hi xifaniso xa xona.

⁷Kambe n'wina, tswalanani mi andza, mi tala ni ku engeteleka emisaveni.”

⁸Kutani Xikwembu xi vulavula na Nowa ni vana va yena, xi ku:

⁹“Na mina, ndzi ta tiyisa ntwanano wa mina na n'wina ni vatukulu va n'wina endzhaku ka n'wina,

¹⁰ni leswi hanyaka hinkwaswo leswi nga na n'wina, hambi ti ri tinyanyana hambi swi ri swifuwo, hambi swi ri swiharhi swa misava, leswi nga na n'wina, ku suka eka leswi nga huma engalaveni, ku fika eka swiharhi hinkwaswo swa misava.

¹¹Ndzi ta tiyisa na n'wina ntwanano wa mina wa leswaku nyama yin'wana ni yin'wana yi nga ka yi nga ha lovisiwi hi mati ya ndhambi, ni leswaku ku nga ka ku nga ha vi na ndhambi yin'wana leyi nga ta lovisa misava.”

¹²Kutani Xikwembu xi ku: “Hi wona mfungho wa ntwanano lowu ndzi wu tiyisaka exikarhi ka mina na n'wina, ni nyama yin'wana ni yin'wana leyi hanyaka leyi nga na n'wina, eka mikarhi leyi nga heriki,

¹³ndzi ri ndzi ta tlhoma nkwangulatilo wa mina emapapeni, kutani xi ta va xikombiso xa ntwanano lowu nga exikarhi ka mina ni misava.

¹⁴Ndzi ta ku loko ndzi hlengeleta mapapa ehenhla ka misava, nkwangulatilo wu ta humelela epapeni;

¹⁵kutani ndzi ta tsundzuka ntwanano wa mina lowu nga exikarhi ka mina na n'wina, ni leswi hanyaka hinkwaswo swa nyama yin'wana ni yin'wana, leswaku mati ma nga ha engeti ma hundzuka ndhambi leyi lovisaka swivumbiwa swa tinxaka hinkwato.

¹⁶Nkwangulatilo wu ta va kona epapeni, kutani ndzi ta wu vona, ndzi tsundzuka ntwanano lowu nga riki na ku hela, lowu nga kona exikarhi ka Xikwembu ni leswi hanyaka hinkwaswo swa nyama yin'wana ni yin'wana leyi nga emisaveni.”

¹⁷Kutani Xikwembu xi ku eka Nowa: “Hi wona lowu, mfungho wa ntwanano, lowu ndzi wu tiyisaka exikarhi ka mina ni nyama yin'wana ni yin'wana leyi nga kona emisaveni.”

¹⁸Vana va Nowa lava humeke engalaveni a a ri Xeme, na Hamu, na Yafeta; yena Hamu i tata wa Kanana.

¹⁹Hi volavo vana lavanharhu va Nowa, kutani hi vona lava misava hinkwayo yi nga tala vanhu ha vona.

²⁰Kavaloko Nowa a sungula ku rima misava, ni ku byala vhinya.

²¹Kutani a nwa vhinyo, a pyopya, a hluvula tinguvu entsongeni wa yena.

²²Kutani Hamu, tata wa Kanana, a vona tata wa yena a nga ri na tinguvu, a ya ambela vamakwavo va yena lavambirhi, va ri handle.

²³Kambe Xeme na Yafeta va teka nkumba, va kapeka emakatleni ya vona havambirhi, va famba hi xindzhakwandzahakwana, va ya funengeta tata wa vona; mombo wa vona wu n'wi fularhela, va nga vonanga vuhava bya tata wa vona.

²⁴Kuteloko Nowa a xalamukile vhinyo, a tiva leswi n'wana wa yena lontsongo a nga n'wi endlisa swona.

²⁵Kavaloko a ku: “A ku rhuketeriwe Kanana! Eka vamakwavo, u ta va nandza wa malandza ya vona!”

²⁶A engeta a ku: “A ku khensiwe Yehovha, Xikwembu xa Xeme, na Kanana a a ve nandza wa yena!

²⁷Xikwembu a xi kurise Yafeta, a tshama emitsongeni ya Xeme, na Kanana a a ve nandza wa yena!”

²⁸Kutani Nowa a hanya malembe ya madzana manharhu na ntlhanu wa makume endzhaku ka ndhambi.

²⁹Masiku hinkwawo ya Nowa a ma ri malembe ya 950, kutani a fa.