Read Xitsonga 2 Samuel 14 Bible Online

2 Samuel 14 - Xitsonga bible

2 Samuel 14

¹Yowabu, n'wana Seruya, a vona leswaku mbilu ya hosi yi navela Abixalomu;

²kutani a rhuma vanhu eTekowa, a vitana kona wansati la tlhariheke, a ku eka yena: “Endla swange u rila munhu, u ambala tinguvu leto khwaxa, u nga toli mafurha, u endla kukotisa wansati la rileke mufi masiku layo tala.

³U ta nghena ehosini, kutani u ta vulavula sweswo na yena.” Kavaloko Yowabu a n'wi vekela marito enon'wini.

⁴Wansati lowa Tekowa a ya vulavula ni hosi, a wela ehansi emombyeni, a khinsama, a ku: “Ndzi ponise, wee hosi!”

⁵Kutani hosi yi ku eka yena: “U na yini xana? Mhaka ya wena i yihi xana?” Yena a ku: “Kunene ndzi nsati wa noni, nuna wa mina u file.

⁶Nandza wa wena a a ri ni vana va xinuna vambirhi lava lweke emasin'wini, kutani leswi ku nga vangi na mulamuri exikarhi ka vona, un'wana a bile makwavo, a n'wi dlaya.

⁷Kutani maxaka ya mina hinkwawo ma pfukele nandza wa wena, ma ku: ‘Hi nyikete la beke makwavo, hi ta n'wi dlayela vutomi bya makwavo loyi a n'wi dlayeke,’ hi ta dlaya ni mudyandzhaka! Va ta tima sweswo kala leri vavamelaka leri ndzi saleleke va nga siyeli nuna wa mina vito ni ndzhaka la emisaveni!”

⁸Hosi yi hlamula yi ku eka wansati: “Famba ekaya ka wena, ndzi ta lerisa vanhu emhakeni ya wena.”

⁹Nsati lowa Tekowa a ku eka hosi: “Nandzu wu ta va ehenhla ka mina, wee hosi, n'wini wanga, ni le henhla ka yindlu ya tatana, kambe hosi ni xiluvelo xa yona swi ta pfumala nandzu.”

¹⁰Hosi yi ku eka yena: “Ndzi tisele loyi a nga ta vulavula na wena, kutani a nga ka a nga ha engeteli a ku xanisa.”

¹¹Wansati a ku: “Hosi a yi anakanye Yehovha, Xikwembu xa wena, leswaku mukutsuri wa ngati a nga tshuki a engetela khombo leri, va nga dlayi n'wana wa mina.” Hosi yi hlamula yi ku: “Yehovha wa hanya! Ku nga ka ku nga wi hansi ni nsisi wun'we wa n'wana wa wena!”

¹²Wansati a ku: “Nandza wa wena a a vule rito rin'we eka hosi, n'wini wanga.”

¹³Yi ku: “Vulavula.” Wansati a ku: “Xana u anakanyela yini timhaka teto ehenhla ka tiko ra Xikwembu xana? Hilaha hosi yi vuleke hakona, ingi hosi yi ni nandzu hi leswi yi nga vuyisiki mubaleki wa yona loyi a n'wi hlongoleke.

¹⁴Hikuva hi ta fa kunene, hi fana ni mati lama halatiweke hansi, lama nga hlayisiwiki; Xikwembu a xi teki vutomi bya munhu, kambe xi ehleketa leswaku la hlongoriweke a nga ha tshuki a tshama ekule na xona.

¹⁵Sweswi, leswi ndzi teke ku ta byela hosi, n'wini wanga, rito leri, hileswaku tiko ri ndzi chavisile; kutani nandza wa wena a ku: ‘Ndzi rhandza ku vulavula ni hosi; kumbe hosi yi ta endla lexi nandza wa yona a nga ta yi byela xona;

¹⁶hikuva hosi yi ta yingisa nandza wa yona ku n'wi kutsula evokweni ra munhu loyi a nga ta ndzi heta, swin'we ni n'wananga endzhakeni ya Xikwembu.’

¹⁷Kambe nandza wa wena u te: ‘Rito ra hosi, n'wini wanga, a ri hi nyike ku wisa,’ hikuva hosi, n'wini wa mina, yi fana ni ntsumi ya Xikwembu ku yingisa leswo lulama ni lexo biha; kambe Yehovha Xikwembu xa wena, a a ve na wena!”

¹⁸Hosi yi hlamula, yi ku eka wansati: “U nga ndzi fihleli mhaka leyi ndzi nga ta yi kombela ka wena.” Wansati a ku: “Hosi, n'wini wanga, a yi vulavule.”

¹⁹Kutani hosi yi ku: “Xana voko ra Yowabu ri na wena etimhakeni hinkwato leti xana?” Wansati a hlamula, a ku: “Moya wa wena wa hanya, wee hosi, n'wini wanga, a ku na nchumu exineneni, hambi eximatsini eka hinkwaswo leswi nga vuriwa hi hosi, n'wini wanga, hikuva i nandza wa wena Yowabu la ndzi leriseke, ni la vekeke marito hinkwawo lawa enon'wini wa nandza wa wena.

²⁰Nandza wa wena Yowabu u endlise sweswo ku hundzuluxa mhaka; kambe hosi yanga yi ni vutlhari kukotisa vutlhari bya ntsumi ya Xikwembu ku tiva hinkwaswo swa la emisaveni.”

²¹Kutani hosi yi ku eka Yowabu: “Waswivo, ndzi ta endla sweswo; famba-ke u vuyisa jaha, Abixalomu.”

²²Yowabu a wela ehansi emombyeni a khinsama, a katekisa hosi, kutani Yowabu a ku: “Namuntlha nandza wa wena a tiva leswaku ndzi kumile tintswalo emahlweni ka wena hosi, n'wini wanga, hikuva hosi yi endla hi rito ra nandza wa yona.”

²³Kutani Yowabu a pfuka a ya eGexuri, a vuyisa Abixalomu eYerusalema.

²⁴Kutani hosi yi ku: “A a tshame endlwini ya yena, kambe a nga ka a nga voni mombo wa mina.” Kutani Abixalomu a tshama endlwini ya yena, a nga voni mombo wa hosi.

²⁵Exikarhi ka Vaisraele hinkwavo, a ku vanga na munhu la sasekeke kukotisa Abixalomu; a va n'wi dzunisa ngopfu; ku suka emikondzweni ku yisa enhlokweni, a ku nga ri na xivati emirini wa yena.

²⁶Kakuloko a byewula misisi (kambe a a byewula lembe rin'wana ni rin'wana, hikuva misisi ya yena a yi n'wi tikela, kutani a a yi tsema), misisi ya nhloko ya yena a yi ringana ku tika ka tixikele ta madzana mambirhi exikalweni xa hosi.

²⁷Vana vanharhu va varisanyana va tswaleriwe Abixalomu, ni wanhwanyana; vito ra yena a a ri Tamari; a a ri wansati wa mburhi.

²⁸Abixalomu a tshama malembe mambirhi eYerusalema, a nga voni mombo wa hosi.

²⁹Kutani a rhuma vanhu ku ya vitana Yowabu a ta n'wi rhuma ehosini, kambe Yowabu a ala ku ya eka yena. A n'wi vitana ra vumbirhi, kambe a ala ku ya.

³⁰Kavaloko Abixalomu a ku eka malandza ya yena: “Yanani, nsimu ya Yowabu yi le kusuhi ni leya mina; ku ni barley ka yona: Yanani, mi yi hisa hi ndzilo.” Sweswo malandza ya Abixalomu ma ya hisa nsimu.

³¹Kavaloko Yowabu a pfuka a ya eka Abixalomu endlwini, a ku eka yena: “Malandza ya wena ma hisele yini nsimu ya mina xana?”

³²Abixalomu a ku eka Yowabu: “Waswivo, ndzi rhumile eka wena, ndzi te: ‘Tana halenu, ndzi ta ku rhumela ehosini, u ku eka yena: “Ndzi vuyele yini hi le Gexuri xana? A swi sasekile loko ngi ndzi ri kona.” Sweswi, ndzi rhandza ku vona mombo wa hosi, kutani loko nandzu wu ri kona eka mina, a a ndzi dlaye.’ ”

³³Kavaloko Yowabu a nghena eka hosi, a n'wi byela timhaka teto. Kutani a vitana Abixalomu; yena a ta ehosini, kutani a khinsama ehansi hi mombo wa yena emahlweni ka hosi; kutani hosi yi ntswontswa Abixalomu.