Read Xitsonga 2 Samuel 19 Bible Online

2 Samuel 19 - Xitsonga bible

2 Samuel 19

¹Kutani va ya vikela Yowabu, va ku: “Hosi yi le nkosini, yi rila Abixalomu.”

²Kutani ku pona ku hundzuka swirilo eka tiko hinkwaro siku leri, hikuva vanhu a va twa siku leri leswaku va ku: “Hosi yi le nhlomulweni hikwalaho ka n'wana wa yona.”

³Tiko ri tlhela ri nghena emutini hi siku leri, hi ku tifihla, kukotisa loko vanhu va tifihla hi ku khomiwa hi tingana loko va balekile enyimpini.

⁴Hosi a yi tifunengetile mombo wa yona, yi tlakusa rito, yi rila, yi ku: “N'wananga Abixalomu! Abixalomu, n'wananga, n'wananga!”

⁵Kutani Yowabu a nghena eka hosi endlwini a ku: “Namuntlha u khomisile tingana malandza hinkwawo ya wena lama poniseke vutomi bya wena namuntlha, ni vutomi bya vana va wena va vavanuna ni va vanhwanyana, ni vutomi bya vasati lavatsongo va wena.

⁶U rhandza lava ku vengaka, kambe u venga lava ku rhandzaka, hikuva u vurisile namuntlha leswaku tindhuna ni malandza a hi nchumu eka wena; hikuva ndza swi tiva namuntlha leswaku loko Abixalomu a a ha hanya, hina hi file hinkwerhu namuntlha, a swi ta saseka emahlweni ka wena.

⁷Sweswi, pfuka u huma, u ya vulavula eka timbilu ta malandza ya wena; hikuva ndza hlambanya hi vito ra Yehovha leswaku loko u nga humi, ku nga ka ku nga sali munhu na wena nivusiku lebyi, kutani khombo leri, ri ta tlula eka wena, makhombo hinkwawo lama ku humeleleke, ku suka evuntshweni bya wena ku fika sweswi.”

⁸Kavaloko hosi yi pfuka, yi ya tshamisa enyangweni; kutani va ya vikela etikweni hinkwaro, va ku: “Maswivo, hosi yi tshamisile enyangweni.” Kutani tiko hinkwaro ri ta emahlweni ka hosi.

⁹Kambe Vaisraele a va tsutsumile un'wana ni un'wana entsongeni wa yena. Kutani tiko hinkwaro a ri kanela etinyimbeni hinkwato ta Israele va ku: “Hosi yi hi ponisile emavokweni ya valala va hina; hi yena la hi tshunxeke emavokweni ya Vafilista, kambe sweswi, u sukile etikweni emahlweni ka Abixalomu;

¹⁰Abixalomu loyi ingi hi n'wi cherile ku n'wi veka ehenhla ka hina, u file enyimpini; sweswi, xana a mi vuli ha yini ku tlherisa hosi xana?”

¹¹Kavaloko hosi Davhida a rhuma eka Sadoki ni ka Abiyatara, vaprista, a ku eka vona: “Vulavulani ni vakulukumba va Yuda, mi ku: ‘Xana mi ta va va le ndzhaku ha yini ku vuyisa hosi endlwini ya yona xana, hikuva marito ya Vaisraele hinkwavo ma fikile eka hosi?

¹²Mi vamakwerhu, mi marhambu ya mina ni nyama ya mina, xana mi ta va va le ndzhaku ha yini ku vuyisa hosi xana?’

¹³Mi ta ku eka Amasa: ‘Xana a ku rhambu ra mina ni nyama ya mina xana? Xikwembu a xi ndzi endle hi matimba ni ku engetela, loko u nga vekiwi ndhuna ya nyimpi emahlweni ka mina hilaha ku nga heriki ematshan'weni ya Yowabu.’ ”

¹⁴Kutani a hundzuluxa timbilu ta vanhu hinkwavo va Yuda kukotisa mbilu ya munhu un'we, kutani va rhuma eka hosi, va ku eka yena: “Vuya, wena ni malandza hinkwawo ya wena.”

¹⁵Kavaloko hosi yi tlhela, yi ya fika eYordani kutani va Yuda va ta eGiligala ku ya hlangana ni hosi, ni ku ya perisa hosi eYordani.

¹⁶Ximeyi, n'wana Gera, wa Benjamini, wa Bahurimi, a hatlisa a rhelela ni vanhu va Yuda, ku ya hlangana na hosi Davhida;

¹⁷vanhu va khume ra madzana va Benjamini a va ri na yena, na Siba, nandza wa yindlu ya Sawulo, a a ri ni vana va yena va vavanuna va khume na ntlhanu, ni malandza ya yena ya makume mambirhi va pela Yordani emahlweni ka hosi.

¹⁸Kutani byatso byi pela byi ya tluta yindlu ya hosi, ni ku endla leswi nga ta saseka emahlweni ka yona. Kutani Ximeyi, n'wana Gera a tiwisa ehansi emahlweni ka hosi loko a ha pela Yordani, a ku eka hosi:

¹⁹“N'wini wanga a nga ndzi vekeli nandzu, a nga anakanyi lunya ra nandza wa wena siku hosi, n'wini wanga, a humeke eYerusalema, swi va leswaku hosi yi nga swi veki embilwini ya yona!

²⁰Hikuva nandza wa wena a tiva leswaku u dyohile, kutani waswivo, ndzi tile namuntlha, ndzi rhangele yindlu hinkwayo ya Yosefa ndzi ngirimele ku ta hlangana ni hosi n'wini wanga.”

²¹Kavaloko Abixayi, n'wana Seruya, a hlamula, a ku: “Xana a ku fanelanga leswaku Ximeyi a dlawa hikuva u rhuketerile muhlawuriwa wa Yehovha xana?”

²²Davhida a ku: “Ndzi ni mhaka yihi na n'wina, vana va Seruya, hikuva namuntlha, mi rhandza ku ndzi kaneta. Ku nga ka ku nga dlayiwi munhu namuntlha eIsraeleni! Xana a ndzi tivi leswaku namuntlha ndzi vekiwa hosi ya Israele xana?”

²³Kavaloko hosi yi ku eka Ximeyi: “U nga ka u nga fi!” Kutani hosi yi n'wi hlambanyela swona.

²⁴Mefiboxete, n'wana Sawulo, a ta ku hlangana ni hosi; a nga bohelanga milenge ya yena, a nga lunghisanga malebvu ya yena, ni ku hlantswa tinguvu ta yena ku sungula siku hosi yi sukeke ku fika siku yi vuyeke hi ku rhula.

²⁵Kuteloko a tile eYerusalema ku hlangana ni hosi, hosi yi ku eka yena: “A ku tanga ha yini na mina, Mefiboxete xana?”

²⁶Yena a ku: “Hosi, n'wini wanga, nandza wa mina u ndzi kanganyisile. Hikuva nandza wa wena a a ku: ‘Ndzi ta va byela va ndzi panela mbhongolo, ndzi ta yi khandziya ndzi famba ni hosi.’ Hikuva nandza wa wena u lamele.

²⁷Kambe u lumbetile nandza wa wena eka hosi, n'wini wanga. Sweswi hosi, n'wini wanga, yi kotisa ntsumi ya Xikwembu:

²⁸hambiswiritano endla hilaha u rhandzaka hakona, hikuva yindlu hinkwayo ya tatana, i vanhu lava fanelaka hi ku fa ntsena emahlweni ka hosi, n'wini wanga, kambe u nghenisile nandza wa wena exikarhi ka lava dyaka etafuleni ra wena! Ku lulama kun'wana ku kwihi eka mina xana? Ndzi ta huwelela yini kambe eka hosi xana?”

²⁹Hosi yi ku eka yena: “U vulavulela yini swonghasi-ke?

³⁰Ndzi vurisile: Wena na Siba mi ta pandza nsimu hi le xikarhi.” Mefiboxete a ku eka hosi: “A a teke hinkwayo leswi hosi, n'wini wanga, yi tlheleke hi ku rhula endlwini ya yona.”

³¹Kutani Barizilayi wa Giliyadi a a xikile eRogelimi, a perile eYordani ni hosi ku ya yi heleketa hase ka Yordani.

³²Barizilayi a dyuhele ngopfu, a a ri munhu wa malembe ya ntlhanu wa makume na makume manharhu; a a phamerile hosi loko yi tshamile eMahanayimi, hikuva a a ri mufuwi lonkulu.

³³Hosi yi ku eka Barizilayi: “Wena famba na mina ndzi ta ku phamela na mina eYerusalema.”

³⁴Barizilayi a ku eka hosi: “Masiku ya malembe ya vutomi bya mina ma ri mangani xana, leswi u nge, ndzi tlhandlukela eYerusalema, ni hosi xana?

³⁵Namuntlha ndzi ni malembe ya ntlhanu wa makume, na makume manharhu; ndza ha ta swi kota ku tiva leswo nandziha ni leswo biha xana? Xana nandza wa wena u ta swi kota ku twa ku nandziha ka leswi a nga ta swi dya ni ka leswi a nga ta swi nwa? Kumbe ndzi ta twa marito ya vayimbeleri va vavanuna ni va vavasati xana? Nandza wa wena a nga ta tikela yini kambe hosi, n'wini wanga xana?

³⁶Nandza wa wena u ta pela Yordani ni hosi, a famba na yona mpfhukanyana, kutani hosi yi ta ndzi tsakisela yini hi leswo nghasi xana?

³⁷Wa nga pfumelela nandza wa wena a tlhela a muka, ndzi ya fela emutini wa mina, emasirheni ya tatana na manana. Kambe Kimihama, nandza wa wena hi loyi, u ta pela ni hosi n'wini wanga; u ta n'wi endlela leswi nga ta va swona embilwini ya wena.”

³⁸Kutani hosi yi ku: “Kimihama a a fambe na mina, ndzi ta n'wi endlela leswi nga ta va swona emahlweni ka wena, ni hinkwaswo leswi u nga ta swi vula eka mina, ndzi ta ku endlela swona.”

³⁹Kuteloko tiko hinkwaro ri perile Yordani, na yona hosi yi pela; kutani hosi yi ntswontswa Barizilayi yi n'wi katekisa, kutani a tlhelela ekaya ka yena.

⁴⁰Hosi yi hundzela eGiligala; Kimihama a famba na yona. Kutani tiko hinkwaro ra Yuda, ni hafu ya tiko ra Israele va perisa hosi.

⁴¹Kutani vanhu hinkwavo va Israele va ta eka hosi, va ku eka yona: “Vamakwerhu va ka Yuda va ku tekele yini eka hina, va tluta hosi, ni yindlu ya yona eYordani, ni vanhu hinkwavo va Davhida xana?”

⁴²Hinkwavo vanhu va Yuda va hlamula eka vanhu va Israele, va ku: “Hikuva hosi i xaka ra hina; Kambe u holovela yini emhakeni leyi xana? Xana hi dyile swa hosi, kumbe hi amukerile tinyiko xana?”

⁴³Kutani vanhu hinkwavo va Israele va hlamula eka vanhu va Yuda, va ku: “Ndzi ni ku averiwa ka khume ka hosi, hambi ka yena Davhida ndza ku tlula; u ndzi ringanisele yini xilo lexitsongo xana? Rito ra mina a ri vanga ro sungula ku vuyisa hosi yanga xana?” Kambe rito ra vanhu va Yuda ri tlurisa rito ra vanhu va Israele hi ku nonon'hwa.