Read Xitsonga 2 Samuel 23 Bible Online

2 Samuel 23 - Xitsonga bible

2 Samuel 23

¹Hi wona marito ya Davhida ya ku hetelela: Rito ra Davhida n'wana Yese, Rito ra munhu la tlakusiweke, Ra muhlawuriwa wa Xikwembu xa Yakobo, Ra muyimbeleri la rhandzekaka wa Israele.

²Moya wa Yehovha wu vulavula ha mina, Rito ra wona ri le ririmini ra mina.

³Xikwembu xa Israele xi vurisile, Ribye ra xichavelo xa Israele ri te eka mina: “Un'wana la lulameke u ta fuma vanhu, Mufumi la chavaka Xikwembu,

⁴La fanaka ni vurhonga loko dyambu ri huma, Ninhlekanhi, loko mapapa ma nga ri kona, Ku vonakala ka yena ku mirisa byanyi bya misava endzhaku ka mpfula.”

⁵Xana a hi swona eka yindlu ya mina emahlweni ka Xikwembu, Leswi a nga endla na mina ntwanano lowu nga heriki, Lowu lunghisiweke swinene ni ku tiyisiwa? Xana a nga mirisi ku hlayiseka ka mina hinkwako ni ku navela hinkwako ka mina?

⁶Kambe vana va Beliyali va fana ni mahlwehlwe lama cukumetiwaka, Lama nga khomiwiki hi voko;

⁷La rhandzaka ku ma khoma a teka nsimbhi kumbe mbhingo wa tlhari, Kutani ma hisiwa hi ndzilo kwalaho.

⁸Hi wona mavito ya tinhenha ta Davhida: Yoxebe-Baxebete wa Hakimoni, a a ri ndhuna ya tinhenha ta matimba. U tlhavile hi tlhari vanhu va 800, va fa hi siku rin'we.

⁹Endzhaku ka yena, Eliyazara, n'wana Dodo, n'wana wa munhu wa Ahohi. A yi ri yin'wana ya tinhenha leti ngi ti ri na Davhida loko va pfukela Vafilista lava hlengeletaneke eku lweni, kutani Vaisraele va tlhandluka.

¹⁰A pfuka a tlhava Vafilista, voko ra yena ri ko ri karhala, ri namarhela etlharini; sweswo Yehovha a tirha ku hlayiseka lokukulu siku lero. Kutani tiko ri vuya endzhaku ka Eliyazara, ri ta phanga xuma ntsena.

¹¹Endzhaku ka yena, a ku ri na Xama, n'wana Agi, wa Harari. Vafilista a va hlengeletanile eLehi, laha nsimu ya tinyawa ingi yi ri kona; kutani vanhu a va balekile emahlweni ka Vafilista,

¹²kambe yena a yima exikarhi ka nsimu a yi ponisa, a ri karhi a lwa ni Vafilista. Kutani Yehovha a tirha ku hlayiseka lokukulu.

¹³Tindhuna tinharhu leti humaka eka leti ta makume manharhu, ti xikela eka Davhida hi nkarhi wa ku tshovela ebakweni ra Adulama, loko nyimpi ya Vafilista a yi gova enkoveni wa Varefayimi.

¹⁴Enkarhini lowu Davhida a a ri ekhokholweni, a ku ri ni xirindzo xa Vafilista eBetlehema.

¹⁵Davhida a sungula ku navela, a ku: “I mani la nga ta ndzi nwisa mati ya xihlovo lexi nga enyangweni ya Betlehema xana?”

¹⁶Kavaloko tinhenha tinharhu ti ya hundza exikarhi ka magovela ya Vafilista, ti ka mati exihlobyeni xa Betlehema, lexi nga enyangweni ya muti, ti ma tisa eka Davhida,

¹⁷kambe a ala ku ma nwa, kutani a ma halatela emahlweni ka Yehovha, a ku: “Oho Yehovha, a swi ve kule na mina ku endlisa sweswo! A hi ngati ya vanhu lava fambeke va nga hlayisanga vutomi bya vona xana?” Kutani a ala ku ma nwa. Tinhenha letinharhu ti endlise sweswo.

¹⁸Abixayi, makwa Yowabu, n'wana Seruya, a a ri ndhuna ya lavanharhu. A tlakusa tlhari ra yena ehenhla ka vanhu va madzana manharhu, a va dlaya, kutani a va ni vito exikarhi ka lavanharhu.

¹⁹A dzunisiwa exikarhi ka lavanharhu, a va hosi ya vona, kambe a nga kotisanga lavanharhu vo sungula.

²⁰Benaya, n'wana Yehoyada, n'wana wa nhenha ya Kabisele, a nga nkulukumba hi mitirho ya yena; a dlaya tinghala letimbirhi ta Mowabu; Kutani a ngirimela exihlobyeni a dlaya nghala kona hi siku ra gamboko.

²¹A dlaya ni Muegipta wa xiyimo lexi chavisaka; Muegipta loyi, a a ri ni tlhari evokweni ra yena; kutani a ya eka yena hi nhonga, a hlomula tlhari evokweni ra Muegipta, a n'wi dlaya hi tlhari ra yena.

²²Hi swona leswi endliweke hi Benaya, n'wana Yehoyada; a a ri ni vito exikarhi ka tinhenha letinharhu.

²³A a tlula hi ku twala lava makume manharhu, kambe a nga ringananga ni lavanharhu vo sungula. Kutani Davhida a n'wi endla ndhuna ya huvo ya yena.

²⁴Asahele, makwa Yowabu, a a ri un'wana wa lava makume manharhu; na Elihanani, n'wana Dodo, wa Betlehema.

²⁵Xama wa Haroda; Elika, wa Haroda.

²⁶Helese, wa Pelete, Ira n'wana Ikexe, wa Tekowa.

²⁷Abiezere wa Anatoto; Mebunayi, wa Huxa.

²⁸Salimoni, wa Ahohi; Maharayi wa Netofa.

²⁹Helebe, n'wana Baana wa Netofa; Itayi, n'wana Ribayi, wa Gibeya wa vana va Benjamini.

³⁰Benaya, wa Piratoni; Hidayi, wa Nakale-Gaaxi.

³¹Abi-Aliboni, wa Araba; Azimavhete, wa Bahurimi.

³²Eliyahaba wa Xaaliboni, Bene-Yaxeni, Yonatani.

³³Xama, wa Harari; Ayihama, n'wana, Xarare wa Harari;

³⁴Elifelete, n'wana Ahasibayi, n'wana wa Mumaaka; Eliyama, n'wana Ahitofele, wa Gilo.

³⁵Hesiro, wa Karmele; Paarayi, wa Araba.

³⁶Yigala, n'wana Natani, wa Soba, Bani, wa Gadi.

³⁷Seleke wa va Amoni, na Naharayi, wa Beroto, lava tameleke matlhari ya Yowabu, n'wana Seruya.

³⁸Ira wa Yitira; Garebe, wa Yitira.

³⁹Uriya wa ka Vahiti; a va ri 37 loko va hlayiwa hinkwavo.