Read Xitsonga 2 Samuel 5 Bible Online

2 Samuel 5 - Xitsonga bible

2 Samuel 5

¹Kutani tinyimba hinkwato ta Israele ti ta eka Davhida, eHebroni, ti ku: “Hi hina lava hi nga marhambu ya wena ni nyama ya wena.

²Khale, loko Sawulo a hi fuma, a a ri wena u tshamaka u humesa ni ku vuyisa Israele. Kutani Yehovha a ku eka wena: ‘Hi wena la nga ta risa tiko ra mina ra Israele; hi wena la nga ta va hosi ya Israele.’ ”

³Kutani vakulukumba hinkwavo va Israele va ta ehosini, eHebroni, kutani hosi Davhida a endla xinakulobye na vona, eHebroni, emahlweni ka Yehovha; kutani va chela Davhida hi mafurha va n'wi veka hosi ya Israele.

⁴Davhida a a ri ni malembe ya makume manharhu loko a sungula ku fuma, kutani a fuma hi malembe ya mune wa makume.

⁵A fuma ehenhla ka Yuda, eHebroni, hi malembe ya ntlhanu na mambirhi, ni tin'hweti ta ntlhanu na yin'we; ni le Yerusalema, a fuma malembe ya makume manharhu na manharhu ehenhla ka Vaisraele ni Vayuda hinkwavo.

⁶Kutani hosi yi famba eYerusalema, ni vanhu va yona, yi ya lwa ni Vayebusi, vaaki va tiko. Kambe va byela Davhida, va ku: “U nga ka u nga ngheni halenu; hikuva hambi va ri vo fa mahlo ni swilema va ta ku hlongola!” Hi leswaku: “Davhida a nga ka a nga ngheni halenu.”

⁷Kutani Davhida a teka khokholo ra Siyoni (i muti wa Davhida).

⁸Siku leri, Davhida a ku: “Ku katekile mani na mani la nga ta hlasela Vayebusi a ya fika enkovotlweni, a heta swilema leswi ni vo fa mahlo lava vengiwaka hi moya wa Davhida!” Hikwalaho va te: “Mufa mahlo ni swilema swi nga ka swi nga ngheni endlwini.”

⁹Davhida a aka ekhokholweni, a ri thya muti wa Davhida. Kutani a aka ematlhelweni hinkwawo, ku suka ekhokholweni, ni le ndzeni ka rona.

¹⁰Davhida a a ri karhi a ya emahlweni a kula, kutani Yehovha, Xikwembu xa mavandla a a ri na yena.

¹¹Kutani Hiramu, hosi ya Tiri, a rhumela Davhida tintsumi, ni mirhi ya Kedari, ni vavatli va mapulangi ni va maribye va ta akela Davhida yindlu.

¹²Kutani Davhida a tiva leswaku Yehovha u n'wi tiyisile evuhosini bya Israele, ni leswaku u tlakusile vuhosi bya yena hikwalaho ka tiko ra yena ra Israele.

¹³Davhida, kuteloko a tile a suka eHebroni, a engeta a teka tinhlantswa ni vavasati va Yerusalema, kutani vana va varisanyana ni va vanhwanyana va velekeriwa Davhida.

¹⁴Hi wona mavito ya lava velekeriweke yena eYerusalema: Xamuwa na Xobabu, na Natani, na Solomoni;

¹⁵na Yibehari, na Elixuwa na Nefege, na Yafiya;

¹⁶na Elixama, na Eliyada, na Elifelete.

¹⁷Kambe Vafilista va twa leswaku va cherile Davhida hi mafurha, va n'wi veke hosi ya Israele, kutani Vafilista hinkwavo va tlhandluka ku ya lava Davhida; Davhida a swi twa, kutani a ngirimela ekhokholweni.

¹⁸Vafilista va ta va hangalaka enkoveni wa Varefayimi. Kavaloko Davhida a vutisa Yehovha, a ku: “Xana ndzi ta tlhandluka ndzi ya lwa ni Vafilista xana?

¹⁹Xana u ta va nyiketa emavokweni ya mina?” Yehovha a hlamula, a ku eka Davhida: “Tlhandluka, hikuva kunene ndzi ta nyiketa Vafilista emavokweni ya wena.”

²⁰Kutani Davhida a ta eBaala-Perasimi. Kutani a va hlula kona, a ku: “Yehovha u hangalasile valala va mina emahlweni ka mina, kukotisa mati loko ma boxa ma hangalaka,” hikwalaho a thya xivandla lexi Baala-Perasimi (n'wini wa ku boxa).

²¹Va tshika kona swifaniso swa vona, kutani swi tekiwa hi Davhida ni vanhu va yena.

²²Vafilista va tlhandluka kambe va hangalaka enkoveni wa Varefayimi.

²³Kutani Davhida a vutisa Yehovha, yena a te: “U nga tlhandluki, kambe u va rhendzelekela hi le ndzhaku, kutani u ta ya hlangana na vona laha ku langutaneke ni mirhi ya mirhibeila.

²⁴“Kutakuloko u twa vunyingi bya milenge eswicapilweni swa mirhibeila, hi kona u nga ta huma hi matimba, hikuva Yehovha u ta va a humile emahlweni ka wena ku hlula nyimpi ya Vafilista.”

²⁵Davhida a endlisa sweswo, hilaha Yehovha a n'wi leriseke hakona, kutani a hlula Vafilista ku suka eGeba ku lava ku fika eGezere.