Read Xitsonga 1 Kings 10 Bible Online

1 Kings 10 - Xitsonga bible

1 Kings 10

¹Hosi ya wansati ya Xeba, kuteloko yi yingisile ku twala ka Solomoni hi vito ra Yehovha, yi ta ku n'wi ringa hi mawetana.

²Yi fika eYerusalema yi landziwa hi vanhu lavo tala ngopfu, va ri ni tikamela leti rhwalaka mirhi ya risuna, ni nsuku lowu teleke ngopfu, ni maribye ya risima. A ta eka Solomoni, a n'wi byela hinkwaswo leswi ngi swi ri embilwini ya yena.

³Solomoni a n'wi hlamusela marito hinkwawo ya yena, a ku nga ri na xilo ni xin'we lexi fihleriweke hosi, lexi a tsandzekeke ku n'wi hlamusela xona.

⁴Hosi ya wansati ya Xeba yi vona vutlhari hinkwabyo bya Solomoni, ni Yindlu leyi a yi akeke, ni swakudya swa tafula ra yena, ni tindlu ta malandza ya yena,

⁵ni ku tlakuka ka tindhuna ta yena, ni tinguvu ta vona, ni vatameri va mindzheko, ni tiholokosta leti a ti humeseke eNdlwini ya Yehovha, kutani a hela moya hi ku hlamala.

⁶A ku eka hosi: “A swi ri leswi tiyeke leswi ndzi swi tweke etikweni ra mina ehenhla ka marito ya wena ni vutlhari bya wena!

⁷A ndzi swi pfumelanga ndzi nga si ta, ndzi nga si swi vona hi mahlo ya mina. Kambe, waswivo, a va ndzi byelanga hafu ya swona: U tlula hi vutlhari ni rifuwo hinkwaswo leswi ndzi swi tweke.

⁸Ku katekile vanhu va wena, ku katekile malandza ya wena lama yimaka hi masiku emahlweni ka wena, lama yingisaka vutlhari bya wena!

⁹A ku khensiwe Yehovha, Xikwembu xa wena, loyi a titsakeleke ha wena ku ku veka exiluvelweni xa Israele! Leswi Yehovha a rhandzaka Israele hi masiku hi leswi a ku vekeke hosi ku avanyisa ni ku lulamisa timhaka.”

¹⁰Kutani a nyika hosi titalenta ta nsuku ta dzana ni makume mambirhi, ni mirhi ya risuna leyi teleke ngopfu, ni maribye ya risima. A ku fikanga ni siku ni rin'we mirhi ya risuna leyi teleke ku fana ni leyi hosi ya wansati ya Xeba yi yi nyikeke hosi Solomoni.

¹¹Tingalava ta Hiramu, leti tisaka nsuku wa Ofiri, ti tisa ni mirhi ya sandal leyi teleke ngopfu, ni maribye ya risima, swi huma eOfiri.

¹²Kutani hosi yi endla hi murhi wa sandal timhandze ta Yindlu ya Yehovha ni ta yindlu ya hosi, ni tiharipa, ni timbila ta vayimbeleri. A ku nga si fika murhi wa sandal lowo tano ni siku ni rin'we, kambe a wa ha voniwanga lowo tano ku fika namuntlha.

¹³Hosi Solomoni a nyika hosi ya wansati ya Xeba hinkwaswo leswi yi swi naveleke ni leswi yi swi kombeleke; kambe ehenhla ka swona, a yi nyika tinyiko ta vuhosi leti ngi ti fanela hosi Solomoni. Kutani yi tlhela yi muka etikweni ra yona ni malandza ya yona.

¹⁴Ku tika ka nsuku lowu fikeleke Solomoni hi lembe rin'wana ni rin'wana, a ti ri titalenta ta 666 ta nsuku,

¹⁵ehandle ka leswi a swi kumeke eka vapindzuri ni ka vaxavisi, ni ka tihosi hinkwato ta Arabiya, ni ka tindhuna ta tiko.

¹⁶Hosi Solomoni a endla switlhangu swa madzana mambirhi hi nsuku lowu furiweke; xitlhangu xin'wana ni xin'wana xi va ni tixikele ta 600 ta nsuku;

¹⁷a endla ni tinhlungula ta madzana manharhu hi nsuku lowu furiweke; nhlungula yin'wana ni yin'wana yi endliwa hi timina tinharhu ta nsuku, hosi yi ti veka endlwini ya Lebanoni ya le xihlahleni.

¹⁸Kutani hosi yi endla xitshamo lexikulu xa xiluvelo, xa timhondzo ta tindlopfu, a xi nameka hi nsuku lowo saseka.

¹⁹Xiluvelo a xi ri ni swikhandziyo swa ntlhanu na xin'we; ehenhla ka xitshamo a ku ri ni xirhendzevutana endzhaku; ematlhelweni ya xona a ku ri ni mavoko; ni tinghala timbirhi a ti yimile ematlhelweni ya mavoko,

²⁰tinghala tin'wana ta khume na timbirhi a ti yimile eswikhandziweni, ematlhelweni mambirhi. Xilo lexo tano a xi endleriwanga vuhosi byin'wana ni siku ni rin'we.

²¹Swinwelo hinkwaswo swa hosi Solomoni a swi ri swa nsuku, ni swibya hinkwaswo swa yindlu ya xihlahla xa Lebanoni, a swi ri swa nsuku lowo saseka. A ku vanga na swibya swin'we swa silivhere. Emasikwini ya Solomoni a ku vuriwanga nchumu hi silivhere.

²²Hikuva hosi a yi ri ni tingalava ta Tarxixi elwandle swin'we ni ta Hiramu kan'we hi malembe manharhu, tingalava ta Tarxixi a ti fika ti rhwele nsuku, ni silivhere, ni timhondzo ta tindlopfu, ni tifenhe, ni tiphikoko (mapavawu).

²³Hosi Solomoni yi tlula tihosi hinkwato ta misava hi rifuwo ni vutlhari,

²⁴vanhu hinkwavo va misava a va lava ku vona Solomoni, ku yingisa vutlhari lebyi Xikwembu xi byi vekeke embilwini ya yena;

²⁵un'wana ni un'wana a tisa nhlengo wa yena, swi ri swibya swa silivhere ni swa nsuku, ni tinguvu, ni matlhari, ni mirhi ya risuna, ni tihanci, ni timula, lembe rin'wana ni rin'wana.

²⁶Solomoni a hlengeleta makalichi ni vakhandziyi va tihanci, kutani a va ni makalichi ya 1 400, ni vakhandziyi va tihanci va 12 000; a va yisa emitini ya makalichi, ni le hosini, eYerusalema.

²⁷Hosi yi endla leswaku silivhere yi tala ku fana ni maribye eYerusalema, ni tikedari ti tala ku fana ni mikuwa leyi nga erivaleni.

²⁸Solomoni a lava tihanci ta yena eEgipta; va ti tisa hi mitlhambi: Vapindzuri va hosi va ya lava ntlhambi hi mali leyi vuriweke;

²⁹va humesa kalichi eEgipta hi tixikele ta 600, ni hanci hi tixikele ta 150; va swi tisela ni tihosi hinkwato ta Vahiti, ni tihosi ta Siriya.