Read Xitsonga 1 Kings 13 Bible Online

1 Kings 13 - Xitsonga bible

1 Kings 13

¹Kakuloko Yerobuwamu a yimile ealitarini ku hisa mirhi ya risuna, maswivo, munhu wa Xikwembu, la humeke etikweni ra Yuda, a fika eBetele, hi ku lerisa ka Yehovha.

²A huwelela emahlweni ka alitari hi rito ra Yehovha, a ku: “Alitari, alitari! Yehovha u vurisa sweswo, a ku: ‘Waswivo, ku ta velekeriwa yindlu ya Davhida n'wana wa wanuna, vito ra yena u ta va Yosiya; u ta tlhava ehenhla ka wena vaprista va swivandla leswi tlakukeke, lava hisaka mirhi ya risuna ehenhla ka wena, va ta hisa ni marhambu ya vanhu ehenhla ka wena!’ ”

³Kutani hi siku rolero a endla masingita, a ku: “Hi xona xikombiso leswaku Yehovha u vulavurile: ‘Waswivo, alitari yi ta handzuka ni nkuma lowu nga ehenhla ka yona wu ta hangalasiwa.’ ”

⁴Kuteloko hosi Yerobuwamu a twile rito leri munhu wa Xikwembu a ri huwelelaka emahlweni ka alitari ya Betele, a tshambuluta voko a ri ealitarini, a ku: “N'wi khomeni!” Kasi voko leri a ri tshambuluteleke yena, ri oma, a tsandzeka ku ri tlherisa eka yena.

⁵Kavaloko alitari yi handzuka, nkuma lowu nga ehenhla ka yona wu hangalaka; hilaha munhu wa Xikwembu a va nyikeke xikombiso hakona hi rito ra Xikwembu.

⁶Kutani hosi yi vulavula yi ku eka munhu wa Xikwembu: “Wa nga khongela Yehovha, Xikwembu xa wena, u ndzi khongelela leswaku voko ra mina ri tlhela eka mina!” Munhu wa Xikwembu a khongela Yehovha, kutani voko ra hosi ri tlhela eka yena, ri va kukotisa khale.

⁷Hosi yi ku eka munhu wa Xikwembu: “Nghena na mina endlwini, u dya Swakudya, ndzi ta ku ha nyiko.”

⁸Munhu wa Xikwembu a hlamula a ku eka hosi: “Kungakuloko u ndzi nyika hafu ya yindlu ya wena, ndzi nga ka ndzi nga ngheni na wena; ndzi nga ka ndzi nga dyi swakudya, ni ku nwa mati exivandleni lexi.

⁹Hikuva ndzi lerisiwile sweswo hi rito ra Yehovha, ri ku: ‘U nga ka u nga dyi swakudya ni ku nwa mati, u nga ka u nga tlheri hi ndlela leyi u fambeke ha yena.’ ”

¹⁰Kutani a timukela hi ndlela yin'wana; a nga mukanga hi ndlela leyi a teke ha yona eBetele.

¹¹A ku ri ni muprofeta la dyuhaleke la akeke eBetele; kutani vana va yena va ya n'wi rungulela timhaka hinkwato leti munhu wa Xikwembu a ti endleke eBetele hi siku rolero, ni marito lawa a ma byeleke hosi; kuteloko va rungulele tata wa vona, a ku eka vona:

¹²“U tlherile hi ndlela yihi xana?” Kambe vana va yena a va vonile ndlela leyi munhu wa Xikwembu la humaka etikweni ra Yuda a fambeke ha yona,

¹³kutani a ku eka vana va yena: “Ndzi paneleni mbhongolo.” Va pana mbhongolo, kutani a yi khandziya.

¹⁴Kavaloko a suka a landza munhu wa Xikwembu, kutani a n'wi kuma a tshamisile ehansi ka nkuhlu; a ku eka yena: “Xana u munhu wa Xikwembu la humeke etikweni ra Yuda xana?” Yena a ku: “Hi mina.”

¹⁵Kutani a ku eka yena: “Tana na mina endlwini, u dya swakudya.”

¹⁶Yena a ku: “Ndzi nga ka ndzi nga tlheri na wena, hambi ku ri ku nghena na wena; ndzi nga ka ndzi nga dyi swakudya ni ku nwa mati na wena exivandleni lexi,

¹⁷hikuva ndzi byeriwile hi rito ra Yehovha, ri te: ‘U nga ka u nga dyi swakudya kona, hambi ku ri ku nwa mati kona; loko u vuya, u nga ka nga fambi hi ndlela leyi u fambeke ha yona loko u ya kona.’ ”

¹⁸Kutani a ku eka yena: “Na mina ndzi muprofeta kukota wena, kambe ntsumi ya Xikwembu yi ndzi byerile hi rito ra Yehovha, ri te: ‘N'wi tlherise endlwini ya wena, a ta dya swakudya, a nwa mati.’ ” Kambe a a hemba mavunwa.

¹⁹Kavaloko munhu wa Xikwembu a tlhela na yena; a dya swakudya, a nwa mati endlwini ya yena.

²⁰Kuteloko va ha tshamisile etafuleni, rito ra Yehovha ri ta eka muprofeta la n'wi tlheriseke.

²¹Kutani a huwelela eka munhu wa Xikwembu la nga ta a sukile etikweni ra Yuda, a ku: “Yehovha u vula sweswo, a ku: ‘Leswi u nga ka u nga yingisanga rito ra Yehovha, u nga ka u nga hlayisanga ku lerisa loku Yehovha, Xikwembu xa wena, a ku leriseke kona;

²²kambe u tlherile, u dya swakudya, u nwa mati exivandleni lexi a nga ku byela, a ku: “U nga tshuki u dya swakudya kona, hambi ku ri ku nwa mati,” ntsumbu wa wena wu nga ka wu nga ngheni esirheni ra vatata wa wena!’ ”

²³Muprofeta loyi a n'wi tlheriseke, kuteloko a dyile swakudya, a nwile mati, a n'wi panela mbhongolo.

²⁴Kavaloko munhu wa Xikwembu a suka a famba; kutani nghala yi hlangana na yena endleleni, yi n'wi dlaya. Ntsumbu wa yena wu etlela endleleni, mbhongolo yi ri kusuhi na wona, na yona nghala yi yimile ekusuhi ni ntsumbu.

²⁵Kutani waswivo, vanhu lava fambaka va vona ntsumbu wu etlele endleleni, ni nghala leyi yimaka ekusuhi ni ntsumbu; va ya fika emutini laha muprofeta la dyuhaleke a akeke kona kutani va vula mhaka leyi.

²⁶Muprofeta la n'wi tlheriseke endleleni a swi twa a ku: “I munhu wa Xikwembu la nga yingisangiki ku lerisa ka Yehovha; kutani Yehovha u n'wi nyiketile nghala leyi n'wi handzuleke yi n'wi dlaya hilaha Yehovha a nga n'wi byela hakona.”

²⁷Kutani a byela vana va yena, a ku: “Ndzi paneleni mbhongolo.” Va yi pana,

²⁸kutani a suka a famba, a ya kuma ntsumbu wu etlele endleleni, ni mbhongolo yi ri ni nghala swi yimile ekusuhi ni ntsumbu: Nghala yi nga dyanga ntsumbu, yi nga handzulanga mbhongolo.

²⁹Kavaloko muprofeta a tlakula ntsumbu wa munhu wa Xikwembu, a wu veka embhongolweni, a wu tisa ekaya. Muprofeta la dyuheleke a tlhela emutini ku n'wi rila ni ku n'wi lahla.

³⁰A lata mufi esirheni ra yena, kutani va n'wi rila, va ku: “Yo, makwerhu!”

³¹Kuteloko a n'wi lahlile, a byela vana va yena, a ku: “Kutakuloko ndzi fa, mi ta ndzi lahla esirheni leri munhu wa Xikwembu a lahliweke eka rona: mi ta veka marhambu ya mina ekusuhi ni marhambu ya yena.

³²Hikuva ri ta hetiseka rito leri a nga ri huwelela hi ku lerisa ka Yehovha, emahlweni ka alitari ya Betele ni le mahlweni ka tindlu hinkwato ta swivandla leswi tlakukeke, leswi nga emitini ya Samariya.”

³³Endzhaku ka timhaka teto, Yerobuwamu a nga hundzukanga endleleni leyo biha ya yena. A engeta a veka vaprista va switsunga lava humaka exikarhi ka tiko hinkwaro; a hlawula loyi a swi rhandzaka, kutani a va muprista wa xitsunga.

³⁴Mhaka leyi, xi va xidyoho lexikulu xa yindlu ya Yerobuwamu; hikwalaho ka xona, yi herisiwile ehenhla ka misava.