Read Xitsonga 1 Kings 2 Bible Online

1 Kings 2 - Xitsonga bible

1 Kings 2

¹Loko Davhida a ri ekusuhi ni ku fa, a lerisa Solomoni, n'wana wa yena, a ku:

²“Ndza famba hi ndlela ya misava hinkwayo: Tiyisa mbilu, u va wanuna.

³Hlayisa milawu ya Yehovha, Xikwembu xa wena, u famba etindleleni ta yena, u hlayisa ku lerisa ka yena, ni milawu ya yena, ni ku avanyisa ka yena, ni vumbhoni bya yena, hilaha ku tsariweke hakona enawini wa Muxe leswaku, u tlhariha eswilweni hinkwaswo leswi u nga ta swi endla, ni hinkwako laha u nga ta hundzukela kona;

⁴leswaku Yehovha a tatisa rito ra yena leri a ri vuleke ehenhla ka mina, loko a te: ‘Kutakuloko vana va wena va tihlayisa etindleleni ta vona, va famba emahlweni ka mombo wa mina hi ntiyiso, etimbilwini ta vona hinkwato, ni le mimoyeni ya vona hinkwayo, a ku nga pfumari munhu wa yindlu ya wena exitshan'weni xa vuhosi xa Israele hilaha ku nga heriki.’

⁵“Wa swi tiva leswi Yowabu n'wana Seruya a ndzi endleleke swona, leswi a swi endleke eka tindhuna letimbirhi ta nyimpi ya Israele, a ri Abinere, n'wana Neri, na Amasa, n'wana Yetere; u va dlayile; u halatile eku rhuleni ngati ya nyimpi; u totile ngati ya nyimpi evambeni leri nga exisutini xa yena, ni le tintanghwini leti nga emilengeni ya yena.

⁶U ta n'wi endla hi ku tlhariha ka wena, kambe u nga tshiki misisi ya yena leyo basa yi xikela hi ku rhula exivandleni xa vafi.

⁷“Loko va ri vana va Barizilayi wa Giliyadi, u ta va endla hi tintswalo: Va ta dya etafuleni ra wena; hikuva va endlise sweswo eka mina loko ndzi ri karhi ndzi baleka emahlweni ka Abixalomu, makwenu.

⁸“Waswivo, ekusuhi na wena ku na Ximeyi, n'wana Gera, wa Benjamini, wa Bahurimi; u ndzi rhukanile hi mukhuva lowo biha ngopfu siku ndzi yaka eMahanayimi. Kambe u rhelele ku hlangana na mina eYordani, kutani ndzi n'wi hlambanyele hi Yehovha, ndzi te: ‘Ndzi nga ka ndzi nga ku dlayi hi tlhari.’

⁹Sweswi, u nga n'wi ringanisi ni la nga riki na nandzu, hikuva wena u munhu la tlhariheke, u tiva leswi u fanelaka ku swi endla; kambe u ta xikisa misisi ya yena leyo basa hi ngati exivandleni xa vafi.”

¹⁰Davhida a tietlelela ni vatata wa yena, kutani a lahliwa emutini wa Davhida.

¹¹Masiku hinkwawo lawa Davhida a nga fuma Israele ha wona a ma ri malembe ya mune wa makume: a fuma malembe ya ntlhanu na mambirhi eHebroni, ni malembe ya makume manharhu na manharhu eYerusalema.

¹²Solomoni a tshamisa exiluvelweni xa Davhida, tata wa yena, kutani vuhosi bya yena byi tiyisiwa swinene.

¹³Adoniya, n'wana Hagiti, a ya eka Batixeba, mana wa Solomoni. Kutani yena a ku: “Xana u tile hi ku rhula?” A ku: “Hi ku rhula.”

¹⁴A engeta a ku: “Ndzi ni rito leri ndzi rhandzaka ku ku byela rona.” Batixeba a ku: “Vulavula.”

¹⁵Kutani a ku: “Wa swi tiva leswaku vuhosi a byi ri bya mina, kutani Vaisraele hinkwavo a va languta eka mina, leswaku ndzi va hosi; kambe vuhosi byi hundzukile, byi ye eka makwerhu, hikuva leswi byi nga ya eka yena swi hume eka Yehovha.

¹⁶Sweswi, ndzi ta kombela xilo xin'we eka wena, u nga ndzi arisi!” Batixeba a ku eka yena: “Vulavula.”

¹⁷Yena a ku: “Wa nga byela hosi Solomoni (hikuva a nga ka a nga ku arisi nchumu) leswaku a ndzi nyika Abixaga wa Xuneme, a va nsati wa mina.”

¹⁸Batixeba a ku: “Hi swona! Ndzi ta ku vulavulela eka hosi.”

¹⁹Kutani Batixeba a ya eka hosi Solomoni ku vulavulela Adoniya. Hosi yi pfuka ku ya hlangana na yena, yi khinsama emahlweni ka yena; kutani yi tshamisa exiluvelweni xa yona, yi lerisa xiluvelo xin'wanyana xi vekeriwa mana wa hosi, kutani Batixeba a tshamisa evokweni ra yona ra xinene.

²⁰A ku: “Ndzi ta kombela mhaka leyitsongo eka wena, u nga ndzi ariseri yona.” Hosi yi ku eka yena: “Kombela, manana; hikuva ndzi nga ka ndzi nga ku ariseri nchumu.”

²¹A ku: “Abixaga wa Xuneme a a nyikiwe Adoniya, makwenu, a va nsati wa yena.”

²²Hosi Solomoni a hlamula, a ku eka mana wa yena: “U n'wi kombelelela yini Adoniya, Abixaga wa Xuneme xana? N'wi kombelele ni vuhosi, hikuva makwerhu i hosi ya mina; kunene, u byi kombelela yena, na Abiyatara, muprista, na Yowabu, n'wana Seruya!”

²³Kutani hosi Solomoni a hlambanya hi Yehovha, a ku: “Xikwembu a xi ndzi endle hi matimba ni ku engetela! Kunene Adoniya u vurile rito leri lovisaka vutomi bya yena!

²⁴Sweswi Yehovha wa hanya, la nga ndzi tiyisa ni ku ndzi tshamisisa exiluvelweni xa tatana Davhida, a ndzi endla ni yindlu hilaha a vuleke hakona! Kunene namuntlha Adoniya u ta dlawa.”

²⁵Kutani hosi Solomoni a rhuma Benaya, n'wana Yehoyada, a ya n'wi dlaya, a fa.

²⁶Loko a ri Abiyatara, muprista, hosi yi ku eka yena: “Suka u famba emasin'wini ya wena, eAnatoto, hikuva u fanekele hi rifu; kambe namuntlha a ndzi nga ku dlayi, hikuva u pingile areka ya Hosi Yehovha emahlweni ka Davhida, tata wa mina, kambe u tsongahatiwile na tatana, eku tsongahatiweni hinkwako ka yena.”

²⁷Kavaloko Solomoni a hlongola Abiyatara leswaku a nga ha vi muprista wa Yehovha, ni leswaku ku ta hetisiwa rito leri Yehovha a nga ri vula ehenhla ka yindlu ya Heli, eXilo.

²⁸Kambe mpfumawulo wu fikela Yowabu (hikuva Yowabu a a landzile Adoniya, hambi a nga landzanga Abixalomu); kutani Yowabu a ya chavela eTabernakeleni ya Yehovha, a khoma timhondzo ta alitari.

²⁹Va ya byela hosi Solomoni leswaku Yowabu u tsutsumele eTabernakeleni ya Yehovha u le kusuhi ni alitari; kutani Solomoni a rhuma Benaya, n'wana Yehoyada, a ku eka yena: “Famba u n'wi dlaya.”

³⁰Kutani Benaya a fika eTabernakeleni ya Yehovha, a ku eka Yowabu: “Hosi yi vurisa sweswo, yi ku: ‘Huma!’ ” Yena a ku: “E-e, hikuva ndzi ta fa kolaho.” Benaya a ya byela hosi, a ku: “Yowabu u vurisile sweswo, u ndzi hlamule sweswo.”

³¹Kutani hosi yi ku eka yena: “Endla hilaha a nga vula hakona; n'wi dlaye, u n'wi lahla; sweswo u ta susa ehenhla ka mina ni le henhla ka yindlu ya tatana, ngati leyi Yowabu a yi halateke ntsena.

³²Yehovha u ta veka ngati ya yena enhlokweni ya yena, hikuva u dlayile vavanuna vambirhi lavo lulama lavanene ku tlula yena, a va dlaya hi tlhari, tatana Davhida a nga tivanga nchumu: a ri Abinere, n'wana Neri, ndhuna ya nyimpi ya Israele, na Amasa, n'wana Yetere, ndhuna ya nyimpi ya Yuda.

³³Ngati ya vona yi ta wela enhlokweni ya Yowabu, ni le tinhlokweni ta vatukulu va yena hi masiku; kambe ku rhula ku ta va eka Davhida ni le vatukulweni va yena, ni le ndlwini ya yena, ni le xiluvelweni xa yena hi masiku.”

³⁴Kutani Benaya n'wana Yehoyada, a tlhandluka, a tlhava Yowabu, a n'wi dlaya; kutani a lahliwa endlwini ya yena, emananga.

³⁵Kavaloko hosi yi veka Benaya, n'wana Yehoyada, ematshan'weni ya Yowabu, enhlokweni ya nyimpi; kutani hosi yi veka Sadoki, muprista, ematshan'weni ya Abiyatara.

³⁶Hosi yi rhuma leswaku va ya vitana Ximeyi, kutani yi ku eka yena: “Tiakele yindlu eYerusalema, u tshama eka yona, u nga humi kona ku ya kwihi ni kwihi.

³⁷Kutaku siku u humaka, u pela xinambyana xa Kedroni, tiva swinene leswaku u ta fa kunene! Ngati ya wena yi ta va enhlokweni ya wena.”

³⁸Ximeyi a ku eka hosi: “Rito leri, rinene; hilaha hosi, n'wini wanga, yi nga vula hakona, nandza wa wena u ta endlisa sweswo.” Kutani Ximeyi a tshama eYerusalema, masiku layo tala.

³⁹Kuteloko ku hundzile malembe manharhu, malandza mambirhi ya Ximeyi ma tsutsumela eka Akixi, n'wana Maaka, hosi ya Gati; kutani va ya byela Ximeyi, va ku: “Waswivo, malandza ya wena ma le Gati.”

⁴⁰Kavaloko Ximeyi a pfuka, a pana mbhongolo ya yena, a ya eGati, eka Akixi, ku lava malandza ya yena; sweswo Ximeyi a famba a vuyisa malandza ya yena hi le Gati.

⁴¹Va tivisa Solomoni leswaku Ximeyi u sukile eYerusalema, u ye eGati, a tlhela a vuya.

⁴²Kavaloko hosi yi rhuma va ya vitana Ximeyi, yi ku eka yena: “Xana a ndzi ku hlambanyelanga hi Yehovha, a ndzi tiyisanga xana ndzi ku eka wena: ‘Tiva swinene leswaku siku u nga ta huma ku ya kwihi na kwihi u ta fa kunene’? Kutani u te eka mina: ‘Rito leri, rinene; ndzi swi twile.’

⁴³A ku hlayisanga ha yini ku hlambanya ka Yehovha ni ku lerisa loku ndzi ku vekeleke kona xana?”

⁴⁴Kutani hosi yi ku eka Ximeyi: “Wa tiva ku biha hinkwako loku u ku endleleke Davhida, tata wa mina, mbilu ya wena ya swi tiva; Yehovha u wisele enhlokweni ya wena lunya ra wena;

⁴⁵hosi Solomoni u ta katekisiwa, ni xiluvelo xa Davhida xi ta tiyisiwa emahlweni ka Yehovha hi masiku.”

⁴⁶Kavaloko hosi yi lerisa Benaya, n'wana Yehoyada, a huma a ya dlaya Ximeyi; kutani a fa. Kutani vuhosi byi tiyisiwa emavokweni ya Solomoni.