Read Xitsonga 2 Kings 21 Bible Online

2 Kings 21 - Xitsonga bible

2 Kings 21

¹Manase a a ri wa malembe ya khume na mambirhi loko a sungula ku fuma, a fuma malembe ya 55 eYerusalema. Vito ra mana wa yena a a ri Hefesiba.

²A endla leswo biha emahlweni ka Yehovha, a landza manyala ya matiko lawa Yehovha a ma hlongoleke emahlweni ka vana va Israele.

³A pfuxa tindhawu leti tlakukeke leti mbundzuxiweke hi Hezekiya, tata wa yena, a akela Baali tialitari, a endla xifaniso xa Axera hilaha Akabu, hosi ya Israele, a endleke hakona, a khinsama emahlweni ka vandla hinkwaro ra matilo, a ri tirhela.

⁴A aka tialitari endlwini ya Yehovha, hambi leswi Yehovha ingi a te: “Ndzi ta akisa vito ra mina eYerusalema.”

⁵A akela vandla hinkwaro ra matilo tialitari eswivaveni leswimbirhi swa yindlu ya Yehovha.

⁶A hisa n'wana wa yena endzilweni, a namarhela vungoma ni vuloyi, kutani a veka vangoma ni vabvumbi, a ri karhi a endla leswo biha hi ku tlurisa emahlweni ka Yehovha ku n'wi pfuka.

⁷A veka xifaniso xa Axera lexi a xi endleke endlwini leyi Yehovha a nga te hikwalaho ka yona eka Davhida ni le ka Solomoni, n'wana wa yena a ku: “Endlwini leyi, ni le mutini wa Yerusalema, lowu ndzi wu hlawuleke exikarhi ka tinxaka hinkwato ta Israele, ndzi ta akisa vito ra mina kona hi masiku.

⁸Ndzi nga ka ndzi nga rhendzelekisi hala ni hala milenge ya Israele ehandle ka tiko leri ndzi ri nyikeke vatata wa vona, loko va chivirika ku endla hinkwaswo leswi ndzi va leriseke swona, va hlayisa nawu hinkwawo lowu nandza wa mina Muxe a va leriseke wona.”

⁹Kambe a va yingisanga, kutani Manase a va rhendzelekisa ku endla leswo biha ku tlurisa matiko lawa Yehovha a ma heriseke emahlweni ka vana va Israele.

¹⁰Kavaloko Yehovha a vulavula hi malandza ya yena, vaprofeta, a ku:

¹¹“Leswi Manase, hosi ya Yuda, a endleke manyala lawa, a dyoheke ku tlurisa Vaamori lava ngi va ri emahlweni ka yena, a dyohise ni Vayuda hi swifaniso swa yena;

¹²hikwalaho ka swona, Yehovha, Xikwembu xa Israele a ku: ‘Ndzi ta tisela Yerusalema, ni tiko ra Yuda khombo lerikulu swonghasi, leswaku mani na mani la nga ta ri yingisa, tindleve ta yena ti ta pfuma.

¹³Ndzi ta pima Yerusalema, hi ngoti ya Samariya ni levele ya yindlu ya Akabu; ndzi ta hlantswa Yerusalema kukotisa loko va hlantswa nkambana, va wu hlantswa kutani va wu siveka.

¹⁴Ndzi ta tshika lexi seleke xa ndzhaka ya mina, kutani ndzi ta va nyiketa emavokweni ya valala va vona; va ta phangiwa ni ku khomiwa hi valala hinkwavo va vona,

¹⁵hikuva va endlile leswo biha emahlweni ka mina, va ndzi pfukile ku sungula siku leri vatata wa vona va humeke eEgipta ku fika namuntlha.’ ”

¹⁶Kambe Manase a halata hi ku tala ngati leyi nga riki na nandzu a ko a tata Yerusalema, ha yona, ku sukela enyangweni yin'wana ku fikela yin'wana, ehandle ka xidyoho xa yena lexi a dyohiseke Yuda ha xona, hi ku endla leswo biha emahlweni ka Yehovha.

¹⁷Leswi seleke swa timhaka ta Manase, ni hinkwaswo leswi a swi endleke, ni xidyoho lexi a xi endleke, a swi tsariwanga ebukwini ya Tikronika ta tihosi ta Yuda xana?

¹⁸Manase a etlela ni vatata wa yena, a lahliwa entangeni wa yindlu ya yena, entangeni wa Uza; kutani Amoni, n'wana wa yena a fuma ematshan'weni ya yena.

¹⁹Amoni a a ri wa malembe ya 22 loko a sungula ku fuma, kutani a fuma malembe mambirhi eYerusalema. Vito ra mana wa yena a a ri Mexulemete, n'wana Harusi, wa Yotiba.

²⁰A endla leswo biha emahlweni ka Yehovha hilaha Manase tata wa yena a endleke hakona.

²¹A famba endleleni hinkwayo leyi tata wa yena a fambeke ha yona, a tirhela swifaniso swahava leswi tata wa yena a swi tirheleke, a khinsama emahlweni ka swona.

²²A tshika Yehovha, Xikwembu xa vatata wa yena, a nga fambanga endleleni ya Yehovha.

²³Malandza ya Amoni ma endla makungu ku n'wi pfukela, kutani va dlaya hosi endlwini ya yena.

²⁴Kavaloko tiko ra Yuda ri dlaya hinkwavo lava pfukeleke hosi Amoni, kutani tiko ri veka Yosiya, n'wana wa yena, ku va hosi ematshan'weni ya yena.

²⁵Leswi seleke swa timhaka ta Amoni ni leswi a swi endleke, xana a swi tsariwanga ebukwini ya Tikronika ta tihosi ta Yuda xana?

²⁶Va n'wi lahla esirheni ra yena, entangeni wa Uza; kutani Yosiya, n'wana wa yena, a fuma ematshan'weni ya yena.