Read Xitsonga 2 Kings 9 Bible Online

2 Kings 9 - Xitsonga bible

2 Kings 9

¹Muprofeta Elixa a vitana un'wana wa vana va vaprofeta, a ku eka yena: “Tibohe xisuti, u teka xikutswana lexi xa mafurha, u ya eRamoto wa Giliyadi.

²Kutakuloko u fikile kona u ta lava Yehu, n'wana Yoxafati, n'wana Nimxi, kutani u ta nghena u n'wi byela a yima exikarhi ka vamakwavo, u n'wi yisa ekamareni leyi nga exikarhi,

³u ta teka xikutswana xa mafurha, u xi chela enhlokweni ya yena, u ku: ‘Yehovha u vurisa sweswo, a ku: Ndzi ku cherile hi mafurha leswaku u va hosi ya Israele.’ Kutani u ta pfula nyangwa, u tsutsuma u nga yimi.”

⁴Kavaloko jaha leri, nandza wa muprofeta, ri suka ku ya eRamoto wa Giliyadi.

⁵Kuteloko ri fikile, ri kuma tindhuna ta nyimpi ti tshamile, kutani ri ku: “Ndzi ni rito ku ku byela, wee hosi!” Yehu a hlamula, a ku: “U vula mani exikarhi ka hina hinkwerhu.” Yena a ku: “Ndzi vula wena, hosi.”

⁶Kutani Yehu a pfuka a nghena ekamareni, nandza wa muprofeta a chela mafurha enhlokweni ya yena, a ku: “Yehovha, Xikwembu xa Israele u vurisile, a ku: ‘Ndzi ku cherile hi mafurha leswaku u va hosi ya Israele, etikweni ra Yehovha.

⁷U ta dlaya va yindlu ya Akabu, hosi ya wena, ndzi ta tirihisela eka Yezabele hikwalaho ka ngati ya malandza ya mina, vaprofeta, ni hikwalaho ka ngati ya malandza hinkwawo ya Yehovha.

⁸Yindlu hinkwayo ya Akabu yi ta herisiwa, ndzi ta susa munhu un'wana ni un'wana wa yona, hambi lonkulu, hambi lontsongo, etikweni ra Israele;

⁹ndzi ta endla hi yindlu ya Akabu kukotisa leswi ndzi swi endleke hi yindlu ya Yerobuwamu n'wana Nebati, ni yindlu ya Baaxa n'wana Ahiya.

¹⁰Loko a ri Yezabele, timbyana ti ta n'wi dya ensin'wini ya Yizriele; a ku nga vi na munhu la nga ta n'wi lahla.’ ” Kavaloko nandza wa muprofeta a pfula nyangwa a tsutsuma.

¹¹Yehu a huma eka malandza ya hosi ya yena, kutani ma ku eka yena: “Ku lulamile xana? Munhu loyi wa rihuhu u tele yini eka wena xana?” A va hlamula, a ku: “Ma tiva swinene munhu loyi ni mavulela ya yena.”

¹²Vona va ku: “Mavunwa! Hi byele leswi nga swona!” Yena a ku: “U ndzi byerile swo karhi ni swo karhi, u te: ‘Yehovha u vurisile sweswo, a ku: Ndzi ku cherile hi mafurha leswaku u va hosi ya Israele.’ ”

¹³Hi nomu lowu, un'wana ni un'wana a teka nguvu ya yena, va ti veka ehansi ka yena ehenhla ka xitulu; va yimba nanga, va ku: “Hosi i Yehu!”

¹⁴Yehu, n'wana Yoxafati, n'wana Nimxi, a endla makungu ku ya lwa na Yoramu. Kambe Yoramu a a hlayisa Ramoto wa Giliyadi a ri ni Vaisraele hinkwavo hikwalaho ka Hazaele, hosi ya Siriya.

¹⁵Ntsena hosi Yoramu a a tlherile eYizriele ku ya hola timbanga leti Vasiriya va n'wi tlhaveke loko a lwa na Hazaele, hosi ya Siriya, Yehu a ku: “Loko ku ri ku ehleketa ka n'wina, ku nga tshuki ku huma munhu ni un'we emutini ku ya tivisa mahungu eYizriele.”

¹⁶Kavaloko Yehu a khandziya egolonyini ya yena, a suka ku ya eYizriele, hikuva Yoramu a a ri kona esangwini; kutani Ahaziya, hosi ya Yuda, a ngirimerile kona, a ya vona Yoramu.

¹⁷Mulanguteri la ngi a ri endlwini leyi tlakukeke eYizriele, kuteloko a vonile nyimpi leyikulu ya Yehu yi ta, a ku: “Ndzi vona nyimpi leyikulu.” Kutani Yoramu a ku: “Rhuma mukhandziyi wa hanci a ya hlangana na vona, a va vutisa, a ku: ‘Ku ni ku rhula xana?’ ”

¹⁸Mukhandziyi wa hanci a suka, a ya hlangana na Yehu, a ku: “Hosi yi vutisa, yi ku: ‘Ku ni ku rhula xana?’ ” Yehu a hlamula, a ku: “U ni mhaka yihi ni ku rhula-ke? Hundzela endzhaku ka mina.” Kutani mulanguteri a tivisa hosi, a ku: “Ntsumi yi fikile eka vona, kambe a yi vuyi.”

¹⁹A rhuma mukhandziyi wa hanci wa vumbirhi, kutani a ya fika eka vona, a ku: “Hosi yi vutisa, yi ku: ‘Ku ni ku rhula xana.’ ” Yehu a hlamula, a ku: “U ni mhaka yihi ni ku rhula-ke? Hundzela endzhaku ka mina.”

²⁰Mulanguteri a tivisa hosi, a ku: “U fikile eka vona, kambe a nga vuyi, ntsena mafambele ma fana ni mafambele ya Yehu, n'wana Nimxi, hikuva a fambisa hi matimba.”

²¹Kutani Yoramu a ku: “Pana golonyi!” Va pana golonyi ya yena; kutani Yoramu, hosi ya Israele a huma na Ahaziya, hosi ya Yuda, un'wana ni un'wana a ri egolonyini ya yena; va ya hlangana na Yehu, va n'wi kuma ensin'wini ya Naboto, wa Yizriele.

²²Kuteloko Yoramu a vonile Yehu a ku eka yena: “Ku ni ku rhula, wee Yehu xana?” A hlamula, a ku: “Ku rhula ku nga va kwihi loko mikhuva ya mbhisa ya Yezabele, mana wa wena, ni ku tala ka vuloyi bya yena swa ha ri kona?”

²³Yoramu a hundzuka a tlhela hi ku tsutsuma, a ku eka Ahaziya: “Ku ni ku xengiwa, wee Ahaziya!”

²⁴Kavaloko Yehu a teka vurha bya yena, a tlhava Yoramu exikarhi ka makatla, nseve wu ya huma embilwini, kutani Yoramu a wa egolonyini ya yena.

²⁵Yehu a ku eka Bidikara, ndhuna ya yena: “N'wi tlakule u n'wi cukumeta ensin'wini ya ndzhaka ya Naboto wa Yizriele; hikuva u nga tsundzuka leswaku, kakuloko mina na wena a hi khandziyile tihanci hi landza swin'we Akabu tata wa yena Yehovha a vula rito leri ehenhla ka yena:

²⁶‘Kukotisa loko ndzi vonile tolo ngati ya Naboto, ni ngati ya vana va yena, ndzi ta ku tlherisela sweswo ensin'wini yoleyo,’ ku vula Yehovha. Sweswi, n'wi tlakule u n'wi cukumeta ensin'wini yoleyo hilaha Yehovha a nga vula hakona.”

²⁷Ahaziya, hosi ya Yuda, kuteloko a swi vonile, a tsutsuma hi ndlela ya yindlu ya ntanga, kambe Yehu a n'wi hlongola a ku: “N'wi tlhaveni, na yena,” kutani va n'wi tlhava egolonyini ya yena eku tlhandlukeni ka Guri, lowu nga ekusuhi na Yibiliyamu; a tsutsuma a ya eMegido, a fa kona.

²⁸Malandza ya yena ma n'wi vuyisela eYerusalema, ma n'wi lahla esirheni ra yena ni vatata wa yena, emutini wa Davhida.

²⁹Ahaziya a a sungurile ku fuma etikweni ra Yuda hi lembe ra khume na rin'we ra Yoramu, n'wana Akabu.

³⁰Kutani Yehu a fika eYizriele. Yezabele, kuteloko a swi twile, a titota mahlo, a bombisa nhloko ya yena, kutani a languta hi fasitere.

³¹Kakuloko Yehu a nghena enyangweni, a ku: “Ku ni ku rhula xana, wee Zimri, mudlayi wa hosi ya wena?”

³²Yehu a tlakusa mahlo ya yena tlhelo ra fasitere, a ku: “I mani la yimaka na mina? I mani xana?” Kavaloko malandza mambirhi kumbe manharhu ma tshinelela fasitere ma languta tlhelo ra yena; kutani a ku:

³³“N'wi hoxeni ehansi!” Va n'wi hoxa, kutani ngati ya yena yi phyandlukela ekhumbini ni le tihancini, kutani ti n'wi phyandlasa hi mikondzo ya tona.

³⁴Kavaloko a nghena, a dya, a nwa, kutani a ku: “Hlayisani murhuketeriwa loyi, mi n'wi lahla, hikuva i n'wana wa hosi.”

³⁵Va famba va ya n'wi lahla, kambe va kuma pala ra yena ntsena, ni mikondzo ni swandla.

³⁶Va vuya, va ya tivisa Yehu, kutani a ku: “Hi rona rito ra Yehovha leri a nga ri vula hi nandza wa yena, Eliya wa Tixibe, loko a ku: ‘Emasin'wini ya Yizriele, timbyana ti ta dya nyama ya Yezabele.

³⁷Ntsumbu wa Yezabele wu ta fana ni vulongo emasin'wini, etikweni ra Yizriele, leswaku va nga ka va nga vuli: Hi yena Yezabele!’ ”