Read Xitsonga 1 Chronicles 13 Bible Online

1 Chronicles 13 - Xitsonga bible

1 Chronicles 13

¹Davhida a endla makungu ni tindhuna ta khume ra madzana, ni ta dzana, ni tihosana hinkwato;

²kutani Davhida a ku eka nhlengeletano hinkwayo ya Israele: “Loko swi ri swona eka n'wina, ni loko swi hume eka Yehovha, Xikwembu xa hina, a hi rhumeni vanhu ematlhelweni hinkwawo eka vamakwerhu lava seleke ematikweni hinkwawo ya Israele, ni ka vaprista ni Valevhi emitini ya vona ni le swimitaneni swa vona, leswaku va ta hlangana na hina,

³hi ta vuyisela eka hina, areka ya Xikwembu xa hina, hikuva a hi vutisanga ta yona emikarhini ya Sawulo.”

⁴Kutani nhlengeletano hinkwayo yi pfumela ku endlisa sweswo hikuva mhaka leyi a yi lulamile emahlweni ka tiko hinkwaro.

⁵Kavaloko Davhida a hlengeleta Vaisraele hinkwavo, ku suka enambyeni wa Xihoro wa Egipta, ku fika enyangweni ya Hamata, ku ya teka areka ya Xikwembu eKiriyata-Yeyarimi.

⁶Kutani Davhida ni Vaisraele hinkwavo va tlhandluka eBaala (eKiriyata-Yeyarimi), lowu nga wa Yuda ku ya teka kona areka ya Xikwembu Yehovha loyi a tshamaka exikarhi ka tikerubu, laha ku khongeriwaka vito ra yena kona.

⁷Va veka areka ya Xikwembu egolonyini leyintshwa, kutani va yi susa endlwini ya Abinadaba; Uza na Ahiyo va fambisa golonyi,

⁸kutani Davhida ni Vaisraele hinkwavo va ri karhi va cina emahlweni ka Xikwembu, hi matimba hinkwawo ya vona, va yimbelela, va ri ni tiharipa, ni magubu, ni madzandzana, ni swiphambati, ni tinanga.

⁹Kuteloko va fikile exivuyeni xa Kidoni, Uza a tshambuluta voko ku khoma areka, hikuva tihomu a ti lava ku yi wisa.

¹⁰Kavaloko vukari bya Yehovha byi pfurhela Uza, a n'wi dlaya, hikuva a tshambulutile voko ra yena ehenhla ka areka, kwalaho a fa emahlweni ka Xikwembu.

¹¹Davhida a twa ku vaviseka hi leswi Yehovha a nga ba Uza; kutani va thya ndhawu leyi Perese-Uza ku fika ni namuntlha.

¹²Davhida a chava Xikwembu siku lero, a ku: “Ndzi ta yi nghenisisa ku yini areka ya Xikwembu endlwini ya mina xana?”

¹³Kutani Davhida a nga rhurhelanga areka ekaya ka yena, emutini wa Davhida, kambe a yi veka endlwini ya Obede-Edomu wa Gati.

¹⁴Areka ya Xikwembu yi tshame tin'hweti tinharhu emutini wa Obede-Edomu, endlwini ya yena; Yehovha a katekisa yindlu ya Obede-Edomu ni hinkwaswo leswi ngi swi ri swa yena.