Read Xitsonga 1 Chronicles 16 Bible Online

1 Chronicles 16 - Xitsonga bible

1 Chronicles 16

¹Kuteloko va tisile areka ya Xikwembu, va yi veka eTabernakeleni leyi Davhida a yi akeleke yona, kutani va humesa tiholokosta ni magandzelo ya ku khensa emahlweni ka Xikwembu.

²Kuteloko Davhida a hetile ku humesa tiholokosta ni magandzelo ya ku khensa, a katekisa tiko hi vito ra Yehovha.

³Kutani a avela Vaisraele hinkwavo, vavanuna ni vavasati, un'wana ni un'wana xinkwa, ni nhluvi wa nyama ni buwu ra mihandzu ya vhinya.

⁴A veka Valevhi van'wana emahlweni ka areka ya Yehovha ku tirha ntirho ni ku twarisa, ni ku dzunisa, ni ku vonga Yehovha, Xikwembu xa Israele:

⁵Asafa a a ri hosana, na Zakariya wa vumbirhi, endzhaku ka yena; na Yaaziele, na Xemiramoto, na Yehiele, na Matitiya na Eliyabu, na Benaya, na Obede-Edomu, na Yehiele. Va ri ni magubu ni tiharipa, Asafa, yena, a a pfumisa swiphambati.

⁶Vaprista Benaya na Yahaziele a va fanele ku yima hi masiku emahlweni ka areka ya ntwanano wa Xikwembu, va tamele tinanga.

⁷Siku lero, Davhida a sungula ku lerisa Asafa ni vamakwavo ku dzunisa Yehovha va ku:

⁸“Dzunisani Yehovha, khongelani vito ra yena! Tivisani exikarhi ka matiko, mitirho leyikulu ya yena!

⁹Yimbelelani, mi tlangela vito ra yena! Anakanyani masingita hinkwavo ya yena!

¹⁰Mi tidzunisa hi vito lero kwetsima ra yena! Timbilu ta lava lavaka Yehovha a ti tsake!

¹¹Lavani Yehovha ni matimba ya yena! Lavisisani mombo wa yena hi masiku!

¹²Anakanyani masingita lawa a ma endleke, Mahlori ni ku avanyisa ka nomu wa yena,

¹³Wena, rixaka ra Israele, nandza wa yena, Na n'wina, vana va Yakobo, vahlawuriwa va yena!

¹⁴Yena Yehovha i Xikwembu xa hina; Ku avanyisa ka yena ku kona emisaveni hinkwayo.

¹⁵Tsundzukani ntwanano wa yena hi masiku, Ni ku lerisa ka yena etinxakeni ta khume ra madzana.

¹⁶Ni ntwanano lowu a wu endleke na Abrahama, Ni lowu a wu hlambanyeleke Isaka;

¹⁷U swi vekile kukotisa nawu eka Yakobo, Kukotisa ntwanano lowu nga heriki eka Israele,

¹⁸A ku: ‘Ndzi ta ku nyika tiko ra Kanana, Ri va ra wena kukotisa ndzhaka.’

¹⁹Enkarhini lowu mi nga riki vangani, Mi ri van'wana ntsena lava luveleke etikweni,

²⁰A mi sukela etikweni rin'wana ku ya etikweni rin'wanyana, Ni ku fuma kun'wana ku ya eku fumeni kun'wanyana;

²¹A nga pfumelelanga munhu ku va xanisa, A bile tihosi hikwalaho ka vona, a ku:

²²‘Mi nga khumbi vahlawuriwa va mina, Mi nga vavisi vaprofeta va mina!’

²³Yimbelelani Yehovha, n'wina va misava hinkwayo! Tivisani ku hlayiseka ka yena hi masiku;

²⁴Vulani xidzumo xa yena exikarhi ka matiko, Ni masingita ya yena exikarhi ka vanhu hinkwavo!

²⁵Hikuva Yehovha u nkulukumba, u fanele ku dzunisiwa, Wa chavisa ku tlurisa swikwembu hinkwaswo;

²⁶Hikuva swikwembu hinkwaswo swa vamatiko i swifaniso ntsena, Kambe Yehovha u endlile matilo.

²⁷Vukulu ni ku kwetsima swi le mahlweni ka yena, Matimba ni ku tsaka swi le vuakweni bya yena.

²⁸Tlheriselani Yehovha, n'wina vamatiko, Tlheriselani Yehovha ku twala ni matimba!

²⁹Tlheriselani Yehovha ku twala ka vito ra yena! Tlakulani, mihlengo mi ta emahlweni ka yena, Khinsamelani Yehovha hi swibombiso leswi hlawuriweke!

³⁰Rhurhumelani emahlweni ka yena, n'wina va misava hinkwayo! Misava yi tiyile yi nga ka yi nga tsekatseki.

³¹A ku tsake matilo, ni misava a yi tsakisise! A va vule exikarhi ka matiko, va ku: ‘Ku fuma Yehovha!’

³²A ku huwelele elwandle ni leswi teleke eka rona. A ku tsake switsunga ni hinkwaswo leswi nga eka swona!

³³Kavaloko mirhi hinkwayo ya swihlahla Yi ta huwelela hi ku tsaka emahlweni ka Yehovha! Hikuva wa ta ku avanyisa misava!

³⁴Dzunisani Yehovha, hikuva u lulamile, Hikuva tintswalo ta yena ti kona hi masiku!

³⁵Mi ku: ‘Oho! Xikwembu xa ku hlayiseka ka hina hi ponise! Hi hlengelete, hi kutsule exikarhi ka vamatiko, Leswaku hi tlangela vito ra wena lero kwetsima, Hi va hi tidzunisa hi xidzumo xa wena!’

³⁶A ku khensiwe Yehovha, Xikwembu xa Israele! Hi masiku lama nga heriki!” Kutani tiko hinkwaro ri ku: “Amen!” Tlangelani Yehovha.

³⁷Davhida a siya kona emahlweni ka areka ya ntwanano wa Yehovha, yena Asafa ni vamakwavo, leswaku va khoma ntirho hi masiku emahlweni ka areka, hilaha swi fanelaka hi siku rin'wana ni rin'wana.

³⁸A nghenisa entirhweni Obede-Edomu ni vamakwavo, va ri 68, a veka Obede-Edomu, n'wana Yedutuni, na Hosa, valanguteri va nyangwa.

³⁹A veka Sadoki, muprista, ni vamakwavo vaprista, emahlweni ka yindlu ya Yehovha, exitsungeni lexi ngi xi ri eGibiyoni,

⁴⁰ku humesela Yehovha hi masiku tiholokosta ealitarini ya tiholokosta, nimixo ni madyambu, ni ku endla hinkwaswo hilaha ku tsariweke hakona enawini wa Yehovha, lowu a wu leriseke Israele.

⁴¹Hemani a a ri na vona, na Yedutuni ni van'wana lava hlawuriweke lava vitaniweke hi mavito ya vona ku dzunisa Yehovha; hikuva tintswalo ta yena ti tshama hi masiku.

⁴²Hemani na Yedutuni a va ri na vona, va ri ni tinanga, ni swiphambati swa vayimbeleri, ni timbila ta ku yimbelela tinsimu ta Xikwembu, vana va Yedutuni a va ri etinyangweni.

⁴³Kutani tiko hinkwaro ri muka, un'wana ni un'wana a ya ekaya ka yena; na yena Davhida a muka ku ya katekisa yindlu ya yena.