Read Xitsonga 1 Chronicles 22 Bible Online

1 Chronicles 22 - Xitsonga bible

1 Chronicles 22

¹Kutani Davhida a ku Yindlu ya Yehovha Xikwembu yi ta va kwalaho ni alitari ya tiholokosta ta Israele yi ta va kwala na yona.

²Davhida a hlengeleta valuveri lava ngi va ri etikweni ra Israele, kutani a lerisa vavatli va maribye ku vatla maribye ya ku aka yindlu ya Xikwembu.

³Davhida a lunghisa ni tinsimbhi ta ku tala ta swipikiri, ni ta marimba ya timbanti, ni ta timhingu, ni koporo ya ku tala ngopfu, yi nga ri na mpimo,

⁴ni mirhi ya kedari leyi nga hlayiwiki hikuva Vasidoni ni Vatiri, a va tisile eka Davhida mirhi ya kedari leyi teleke ngopfu.

⁵Hikuva Davhida a a ku: “N'wana wa mina, Solomoni, wa ha ri lontshwa, a pfumala matimba, kutani yindlu leyi fanelaka ku akeriwa Yehovha, yi fanele ku tlakuka ngopfu hi ku twala ni ku dzunisiwa ematikweni hinkwawo; ndzi rhandza ku n'wi lunghisela mitirho.” Kutani Davhida a lunghisa leswo tala, a nga si fa.

⁶Kavaloko a vitana Solomoni n'wana wa yena a n'wi lerisa ku akela Yehovha, Xikwembu xa Israele, yindlu.

⁷Davhida a byela Solomoni, n'wana wa yena a ku: “Loko ndzi ri mina, a ndzi rhandzile ku akela vito ra Yehovha, Xikwembu xanga, yindlu.

⁸Kambe rito ra Yehovha ri tile eka mina ri te: ‘U halatile ngati ya ku tala, u lwile tinyimpi letikulu; u nga ka u nga akeli vito ra mina yindlu, hikuva u halatile ngati ya ku tala emisaveni emahlweni ka mina.

⁹Waswivo, u ta velekeriwa n'wana; u ta va munhu wo rhula; ndzi ta n'wi nyika ku rhula eka valala hinkwavo va yena va matlhelo hinkwawo; hikuva vito ra yena a ta va Solomoni (wa ku rhula), kutani ndzi ta nyika Israele ku rhula, ni ku tsaka eku hanyeni ka yena.

¹⁰Hi yena la nga ta akela vito ra mina yindlu; u ta va n'wana wa mina, mina ndzi va tata wa yena; ndzi ta tiyisa xiluvelo xa vuhosi bya yena ehenhla ka Israele hi masiku.’

¹¹“Sweswi, n'wananga, Yehovha a a ve na wena, u va u kateka kutani u aka yindlu ya Yehovha, Xikwembu xa wena, hilaha a vuleke hakona ehenhla ka wena.

¹²Ntsena Yehovha a a ku nyike vutlhari ni ku twisisa, a a ku fumise ehenhla ka Israele, a a ku nyike ku hlayisa nawu wa Yehovha, Xikwembu xa wena.

¹³Hi kona u nga ta kateka loko u chivirika ku hlayisa milawu ni ku lerisa loku Yehovha a ku leriseleke Israele ha Muxe. Tiyisa mbilu u tiya! U nga chavi, u nga heli mbilu!

¹⁴Waswivo, hi ku tirha ka mina, ndzi lunghisele yindlu ya Yehovha titalenta ta nsuku ta 100 000, ni titalenta ta silivhere ta 1 000 000, ni koporo ni tinsimbhi, swi ri leswi nga pimiwiki exikalweni hikuva swi tele ngopfu. Ndzi lunghisile ni mirhi, ni maribye, u ta swi engetela kambe.

¹⁵U ni vatirhi lavo tala: vavatli va maribye, ni vaaki, ni vavatli va mapulangi, ni tinxaka hinkwato ta vanhu lava tlhariheke emitirhweni yihi ni yihi.

¹⁶Loko wu ri nsuku ni silivhere, ni koporo ni nhumbu, a swi hlayiwi. Pfuka u tirha! Yehovha a a ve na wena!”

¹⁷Kutani Davhida a lerisa tindhuna hinkwato eka va Israele ku pfuna Solomoni, n'wana wa yena;

¹⁸a ku eka tona: “Xana Yehovha, Xikwembu xa n'wina, u na n'wina-ke; a nga mi nyikangi ku wisa ematlhelweni hinkwawo xana? Hikuva u nyiketile emavokweni ya mina vaaki va tiko kutani tiko ri rhula emahlweni ka Yehovha ni le mahlweni ka tiko ra yena.

¹⁹Sweswi lavani Yehovha, Xikwembu xa n'wina, hi timbilu hinkwato ta n'wina ni mimoya hinkwayo ya n'wina; pfukani, mi aka vukwetsimelo bya Yehovha Xikwembu, mi ta tisa areka ya ntwanano wa Yehovha, ni swigotso leswi hlawuriweke swa Xikwembu, endlwini leyi nga ta akeriwa vito ra Yehovha.”