Read Xitsonga 1 Chronicles 29 Bible Online

1 Chronicles 29 - Xitsonga bible

1 Chronicles 29

¹Hosi Davhida a ku eka nhlengeletano hinkwayo: “Solomoni, n'wananga, loyi a nga yena la hlawuriweke hi Xikwembu, a ha ri lontshwa, u pfumala matimba, kambe ntirho wukulu hikuva yindlu leyi, yi nga ka yi nga vi ya munhu, kambe i ya Yehovha Xikwembu.

²Ndzi endlile hi matimba hinkwawo ya mina ku hlengeletela yindlu ya Xikwembu xa mina, nsuku wa leswi nga ta va swa nsuku, ni silivhere ya leswi nga ta va swa silivhere ni koporo ya leswi nga ta va swa koporo ni nhumbu ya leswi nga ta va swa nhumbu, ni mirhi ya leswi nga ta va swa mirhi; maribye ya onikisi ni maribye ya ku namekiwa, ni maribye ya ku vangama, ni maribye ya mavala ya tinxakaxaka, ni tinxaka hinkwato ta maribye ya risima, ni mabulu ya ku basa ya ku tala ngopfu.

³Kambe, hi ku rhandza loku ndzi rhandzaka hakona yindlu ya Xikwembu xanga, leswi ndzi nga na swona swa nsuku ni swa silivhere, leswi nga swa mina kunene, ndza swi nyika swi va swa yindlu ya Xikwembu xanga, ehandle ka hinkwaswo leswi ndzi swi hlengeleteleke yindlu ya vukwetsimelo:

⁴ti ri titalenta ta 3 000 ta nsuku wa Ofiri, ni titalenta ta 7 000 ta silivhere leyi basisiweke, ku nameka emakhumbini ya tindlu;

⁵nsuku wu va wa leswi nga ta va swa nsuku, ni silivhere ya leswi nga ta va swa silivhere, ni swa mitirho hinkwayo ya mavoko ya vatirhi. I mani la rhandzaka namuntlha ku humesela Yehovha nhlengo wa yena xana?”

⁶Kutani tihosana ta tindlu ta vatatana, ni tihosana ta tinyimba ta Israele, ni tindhuna ta khume ra madzana, ni ta dzana, ni malandza lamakulu ya hosi, va humesa mihlengo hi timbilu hinkwato ta vona;

⁷va humesela ntirho wa yindlu ya Xikwembu, titalenta ta nsuku ta 5 000 leti nga ni tidarika ta 10 000 ni titalenta ta silivhere ta 10 000, ni titalenta ta koporo ta 18 000, ni titalenta ta nhumbu ta 100 000.

⁸Lava ngi va ri ni maribye ya risima, va ma nyika ku nghenisiwa exumeni xa yindlu ya Yehovha, va ma veka emavokweni ya Yehiele, wa ka Gerixoni.

⁹Tiko ri tsakela ku nyika ka vona, hikuva a va humeserile Yehovha mihlengo hi timbilu hinkwato ta vona, na yena hosi Davhida, a tsaka hi ku tsaka lokukulu.

¹⁰Kavaloko Davhida a khensa Yehovha emahlweni ka nhlengeletano hinkwayo, a ku: “A ku khensiwe Yehovha, Xikwembu xa Israele tata wa hina, hi masiku ni masiku!

¹¹Eka wena Yehovha ku ve vukulu, ni matimba ni ku twala, ni ku kwetsima, ni vuhosi, hikuva hinkwaswo leswi nga etilweni ni le misaveni, swi na wena; eka wena Yehovha, ku ve ku fuma, wena la titlakuseke ku va hosi ehenhla ka swilo hinkwaswo!

¹²Ku fuma ni ku twala ku hume eka wena; wa fuma ehenhla ka swilo hinkwaswo: matimba ni ku tiya swi le vokweni ra wena; hi wena la tivaka ku nyika vukulu hinkwabyo ni matimba hinkwawo.

¹³Oho! Xikwembu xa hina! Sweswi ha ku vonga, hi dzunisa vito ra wena leri kwetsimaka.

¹⁴Hikuva ndzi mani xana, ni tiko ranga i yini xana, leswaku hi tiva ku humesa swilo leswi? Hikuva hinkwaswo swi huma eka wena, kutani leswi hi ku humeselaka swona hi nyikiwile hi voko ra wena.

¹⁵Hikuva hi valuveri emahlweni ka wena ni vaendzi, kukotisa vatata wa hina hinkwavo, masiku ya hina ma fana ni ndzhuti emisaveni, kutani ku tshemba a ku kona.

¹⁶Yehovha, Xikwembu xa hina, swilo leswi hinkwaswo leswi hi swi hlengeleteke ku akela vito ra wena lero kwetsima yindlu, swi hume evokweni ra wena, hinkwaswo i swa wena.

¹⁷Oho! Xikwembu xanga! Ndzi tiva leswaku u kamba mbilu, ni leswaku! U tsakela ku lulama; loko ndzi ri mina, ndzi humesile swilo leswi hinkwaswo hi ku lulama ka mbilu yanga, kutani sweswi, tiko ra wena leri nga kwala, ndzi ri vonile hi ku tsaka loko ri ku humesela mihlengo ya rona.

¹⁸Oho! Yehovha, Xikwembu xa vatata wa hina, Abrahama, na Isaka, na Israele! Hlayisa hi masiku etimbilwini ta tiko ra wena, ku rhandza loku ka miehleketo ya vona, u tiyisa timbilu ta vona eka wena.

¹⁹Loko a ri n'wananga, Solomoni, n'wi nyike mbilu leyo tiya ku hlayisa milawu ya wena, ni marito ya wena, ni ku lerisa ka wena, ni ku heta hinkwaswo, ni ku aka yindlu leyi ndzi yi lunghiseke!”

²⁰Davhida a ku eka nhlengeletano hinkwayo: “Dzunisani Yehovha, Xikwembu xa n'wina!” Kutani nhlengeletano hinkwayo yi dzunisa Yehovha, Xikwembu xa vatata wa vona, va korhama, va khinsama emahlweni ka Yehovha ni le mahlweni ka hosi.

²¹Siku leri tlhandlamaka, va tlhavela Yehovha magandzelo, va n'wi humesela ni tiholokosta, ti ri tinkunzi ta 1 000, ni makhuna ya 1 000 ni swinyimpfana swa 1 000, ni vuchelo bya swona, ni magandzelo ya ku tala ngopfu ya Vaisraele hinkwavo.

²²Va dya, va nwa siku lero, emahlweni ka Yehovha, va ri ni ku tsaka lokukulu; kutani Solomoni, n'wana Davhida a vekiwa hosi ra vumbirhi, va n'wi chela hi mafurha emahlweni ka Yehovha, ku va hosi, na Sadoki ku va muprista.

²³Solomoni a tshamisa exiluvelweni xa Yehovha a va hosi ematshan'weni ya Davhida, tata wa yena, a kateka kutani Vaisraele hinkwavo va n'wi yingisa.

²⁴Tindhuna hinkwato, ni tinhenha, na vona vana hinkwavo va hosi Davhida, va tiveka ehansi ka hosi Solomoni.

²⁵Yehovha a tlakusa ngopfu Solomoni emahlweni ka Vaisraele hinkwavo, a twarisa ku fuma ka yena ku tlurisa ku fuma ka tihosi ta Israele leti ngi ti ri emahlweni ka yena.

²⁶Davhida, n'wana Yese, a fumile ehenhla ka Vaisraele hinkwavo.

²⁷Nkarhi lowu a fumeke Vaisraele ha wona, a ma ri malembe ya mune wa makume, a fuma malembe ya ntlhanu na mambirhi eHebroni, kutani a fuma malembe ya 33 eYerusalema.

²⁸Kutani a fa eku dyuhaleni lokunene, a taleriwa hi masiku, ni rifuwo, ni ku twala; kutani Solomoni, n'wanakwe, a fuma ematshan'weni ya yena.

²⁹Timhaka ta hosi Davhida, ta ku sungula ni ta ku hetelela, ti tsariwile ebukwini ya Samiele, muvoni, ni le bukwini ya Natani, muprofeta, ni le bukwini ya Gadi, muvoni;

³⁰ku tsariwile ni ta ku fuma ka yena hinkwako ni matimba lamakulu ya yena, ni leswi humeleleke enkarhini wa yena, hambi ku ri etikweni ra Israele ni le matikweni man'wana hinkwawo.