Read Xitsonga 1 Chronicles 5 Bible Online

1 Chronicles 5 - Xitsonga bible

1 Chronicles 5

¹Vana va xinuna va Rhuveni, mativula ya Israele. Hikuva a a ri mativula, ntsena hi leswi a nga nyamisa xilawu xa tata wa yena, vuhosi bya yena byi nyikiwile vana va Yosefa, n'wana Israele; swi nga ri leswaku Yosefa a tsariwa mativula;

²hikuva Yuda a a ri nkulukumba exikarhi ka vamakwavo, kutani hosi yi humile eka yena; kambe vuhosi a byi ri bya Yosefa.

³Vana va xinuna va Rhuveni, mativula ya Israele: Hanoko, Palu, Hesironi, Karimi.

⁴N'wana wa wanuna wa Yuwele: Xemaya, n'wanakwe; Gogo, n'wanakwe; Ximeyi, n'wanakwe;

⁵Mika n'wanakwe, Reyaya, n'wanakwe; Baali, n'wanakwe;

⁶Bera, n'wanakwe; la yisiweke evukhumbini i Tiglata-Pilezere, hosi ya Asiriya: a a ri hosana ya va Rhuveni.

⁷Ni vamakwavo hi tindlu ta vona, hilaha va tsariweke hakona hi tinxaka ta vona: hosana Yeyiele, na Zakariya;

⁸na Bela, n'wana Azaza, n'wana Xema, n'wana Yuwele. A a akile eArowere ni ku fika eNebo ni le Baala-Meoni.

⁹Evuxeni a a akile ku fika emananga la fikaka enambyeni wa Yufrata, hikuva mitlhambi ya vona a yi ri leyikulu etikweni ra Giliyadi.

¹⁰Enkarhini wa Sawulo, va lwa ni va Hagara, va va hlula, kutani va aka emitsongeni ya vona, tlhelo hinkwaro ra vuxa ra tiko ra Giliyadi.

¹¹Vana va xinuna va Gadi a va akile etikweni ra Baxani ku fika eSaleka, va langutene na vona.

¹²Yuwele, hosana, na Xafami wa vumbirhi, na Yanayi na Xafati, etikweni ra Baxani.

¹³Vamakwavo, hi tindlu ta vatata wa vona, a a ri Mikaele, Mexulama, Xeba, Yorayi, Yakani, Ziya, Ebere, ntlhanu na vambirhi.

¹⁴Hi vona vana va xinuna va Abihayili, n'wana Huri, n'wana Yarowa, n'wana Giliyadi, n'wana Mikaele, n'wana Yexixayi n'wana Yahado, n'wana Buzi;

¹⁵Ahi n'wana Abidiele, n'wana Guni a a ri hosana ya yindlu ya vatata wa vona.

¹⁶Va akile eGiliyadi wa Baxani, ni le mitini ya kona ni le vudyelweni hinkwabyo bya Xaroni, ku fika emindzilekaneni ya kona.

¹⁷Va tsariwile hinkwavo emasikwini ya Yotamu, hosi ya Yuda, ni le masikwini ya Yerobuwamu, hosi ya Israele.

¹⁸Vana va Rhuveni, ni va Gadi ni hafu ya nyimba ya Manase, leti nga tinhenha, lava tamelaka switlhangu ni matlhari, lava copaka hi vurha lava tlharihiseriweke nyimpi va ri vavanuna va 44 760, lava hlomaka;

¹⁹va huma nyimpi, va ya hlasela va Hagara, na Yeturu, na Nafixi, na Nodaba.

²⁰Va pfuniwile loko va lwa na vona, kutani va Hagara ni hinkwavo lava ngi va ri na vona, va nyiketiwa emavokweni ya vona. Hikuva, loko va ha lwa va huwelela eka Xikwembu, kutani Xikwembu xi va yingisa, hikuva a va xi tshembile.

²¹Va teka mitlhambi ya vona, ti ri tikamela ta 50 000 ni tinyimpfu ta 250 000, ni timbhongolo ta 2 000, ni vanhu va 100 0000.

²²Hikuva lavo tala va dlayiwile, hikuva nyimpi a yi huma eka Xikwembu; kutani va aka ematshan'weni ya vona, ku fika nkarhi lowu va yisiwaka evukhumbini ha wona.

²³Vana va hafu ya nyimba ya Manase va aka na vona etikweni leri, ku suka eBaxani ku fika eBaala-Hermoni, na Seniri ni le ntshaveni ya Hermoni, a va ri lavo tala.

²⁴Hi tona tihosana ta tindlu ta vatata wa vona: Efere, Yixi, Eliele, Azariele, Yeremiya, Hodavhiya, Yahadiele, ti ri tinhenha ni vanhu lava twaleke, ni tihosana ta tindlu ta vatata wa vona.

²⁵Kambe va dyohele Xikwembu xa vatata wa vona, va tinyiketa vuoswi hi ku landza swikwembu swa matiko lawa Xikwembu xi ma heriseke emahlweni ka vona.

²⁶Xikwembu xa Israele xi kucetela moya wa Pulu, hosi ya Asiriya, ni moya wa Tiglata-Pilezere hosi ya Asiriya, kutani a yisa evukhumbini va Rhuveni, ni va Gadi ni va hafu ya nyimba ya Manase, a va yisa eHala na le Habori na le Hara, ni le nambyeni wa Gozana, laha va akeke kona ku fika namuntlha.